🛑हिंदी सक्ती विरोधात शिवसेनेचे आंदोलन, शासन निर्णयाची प्रत जाळून सरकारचा निषेध.

🔴 हिंदी सक्तीविरोधात शिवसेनेचे आंदोलन, शासन निर्णयाची प्रत जाळून सरकारचा निषेध. 

शिवगर्जना न्यूज, 

माहूर/ अनिल बंगाळे

महाराष्ट्र शासनाच्या शालेय शिक्षण विभागाने राज्यातील इंग्रजी माध्यमांच्या शाळांमध्ये इयत्ता १ ली ते ५ वी पर्यंत हिंदी भाषा तृतीय भाषा म्हणून सक्तीने शिकवावी, असा शासन निर्णय काढला आहे. या निर्णयामुळे महाराष्ट्रातील मातृभाषा व प्रादेशिक भाषांचे अस्तित्व धोक्यात येईल, असा आरोप करत शिवसेनेने या हिंदी सक्तीचा जोरदार विरोध केला आहे.

या पार्श्वभूमीवर माहूर येथे शिवसेना जिल्हाप्रमुख मा. ज्योतिबादादा खराटे यांच्या नेतृत्वाखाली आंदोलन करण्यात आले. शासन निर्णयाची प्रत जाळून निषेध नोंदवण्यात आला आणि ‘हिंदी सक्ती हटाव’, ‘मराठी वाचव’, ‘मातृभाषेला न्याय मिळाला पाहिजे’ अशा जोरदार घोषणा देत कार्यकर्त्यांनी परिसर दणाणून सोडला.

यावेळी विधानसभा प्रमुख अनिल रुणवाल, उपजिल्हाप्रमुख उमेश जाधव, युवासेना जिल्हाप्रमुख यश खराटे, तालुका प्रमुख जितू चोले, शहर प्रमुख बालाजी वाघमारे, युवासेना जिल्हा समन्वयक आकाश सातव, तालुका प्रमुख अक्षय वाघ, तसेच शिवसेनेचे कार्यकर्ते संदीप गोरडे, गजानन चव्हाण, मंगेश सुकळकर, अभिषेक जयस्वाल, दीपक कांबळे, अरविंद दवणे, वाशीम शेख, कनिष्क वानखेडे, आशीर्वाद आढावे, विनोद मार्गमवार यांच्यासह शेकडो शिवसैनिक मोठ्या संख्येने उपस्थित होते.

या वेळी बोलताना ज्योतिबा खराटे म्हणाले, “महाराष्ट्रात मराठी भाषेला दुय्यम वागणूक दिली जाणार नाही. केंद्र आणि राज्य सरकारने हिंदी सक्ती थांबवावी, अन्यथा शिवसेना रस्त्यावर उतरून संघर्ष करेल. मातृभाषेचा अपमान सहन केला जाणार नाही.”

यावेळी उपस्थितांनी शासन निर्णय त्वरित मागे घेण्याची मागणी केली. सरकारने जर हा निर्णय मागे घेतला नाही तर राज्यभर तीव्र आंदोलन छेडण्याचा इशारा देखील देण्यात आला आहे.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)