🛑 विचार-अभिव्यक्तीचे स्वातंत्र्य हेच भारताचे बलस्थान ! — मा. संजय आवटे

🔴 विचार-अभिव्यक्तीचे स्वातंत्र्य हेच भारताचे बलस्थान ! – मा. संजय आवटे

शिवगर्जना न्यूज, 

संपादक : शहाजी वरखिंडे {9923072242}

देगलूर : “स्वतंत्र विचाराचे आणि अभिव्यक्तीचे स्वातंत्र्य हेच भारताचे बलस्थान असून सामान्य माणसामध्ये जुलमी व्यवस्था उलथून टाकण्याचे सामर्थ्य आहे. त्यासाठी खरा भारत नव्या पिढीला सांगणे गरजेचे असून हा देश कोणा एकाची मालमत्ता नसून तो सर्व भारतीयांचा आहे. महात्मा गांधी हे सामान्य माणूस म्हणूनच जन्माला आले. परंतु त्यांनी केलेल्या कार्याने त्यांना महात्मा बनविले. महात्मा गांधी, पंडित नेहरू आणि डॉ. आंबेडकर यांनी केलेल्या संघर्षातून, कार्यातून नवा सर्व समावेशक भारत अस्तित्वात आला आहे. भारतीय संविधानाने सर्वांना एका सूत्रात बांधले आहे. शोषणमुक्त आणि सशक्त भारतासाठी आजही गांधी-नेहरू-आंबेडकर यांचे कार्य प्रेरणादायी आणि मार्गदर्शक असून भारत जगाला नवी दिशा दाखवू शकतो.” असे प्रतिपादन महाराष्ट्रातील प्रसिद्ध पत्रकार, दैनिक लोकमत चे संपादक संजय आवटे यांनी केले. ते देगलूर येथे अठराव्या स्वातंत्र्य सेनानी पोशट्टीदादा उनग्रतवार स्मृती व्यख्यानमालेत प्रमुख वक्ते म्हणून बोलत होते. ते पुढे बोलताना म्हणाले की, “आजही भारतीय समाजात संविधानाला अपेक्षित समता आणि विकास झालेला दिसून येत नाही. देशात पाणी, वीज, आरोग्य, उत्तम शिक्षण, सार्वजनिक सुविधा मिळाव्यात, पिकवलेल्या मालाला भाव मिळावा म्हणून शेतकऱ्यांना आंदोलनं करावी लागत आहेत. ज्या देशात सर्वांना मोफत सर्वत्र पिण्याचे शुद्ध पाणी मिळते, आरोग्याच्या सुविधा मिळतात, उत्तम शिक्षण आणि सार्वजनिक सुविधा मिळतात तो देश खऱ्या अर्थाने विकसित असतो. वर्तमान भारतातील वास्तव मनाला अस्वस्थ करणारे असून, हे वास्तव बदलण्याची जबाबदारी प्रत्येक भारतीयाची आहे. गांधी म्हणजे परंपरेचे अधिष्ठान, नेहरू म्हणजे आधुनिकतेची कास आणि डॉ. आंबेडकर म्हणजे सामाजिक न्यायाचे आंदोलन होय. गांधी-नेहरू-बाबासाहेब समजून घेतल्यास नवा शोषणमुक्त, सामर्थ्यशाली भारत उभा राहील.”

कार्यक्रमाच्या प्रारंभी स्वातंत्र्य सेनानी पोशट्टीदादा उनग्रतवार यांच्या प्रतिमेस पुष्पहार अर्पण करून दीप प्रज्वलन करण्यात आले. प्रा. गौतम भालेकर आणि प्रकाश सोनकांबळे यांनी स्वागतगीत सादर केले. व्याख्यान मालेचे संयोजक तथा अडत व्यापारी शिक्षण संस्थेचे सचिव डॉ. कर्मवीर उनग्रतवार यांनी मा. संजय आवटे यांचे स्वागत केले. सूत्र संचलन डॉ. राजेश्वर दुडूकनाळे यांनी केले. तर उपस्थितांचे आभार डॉ. अशोक टिपरसे यांनी मानले.

या प्रसंगी अडत व्यापारी शिक्षण संस्थेचे अध्यक्ष प्रकाश पाटील बेंबरेकर, कोष्याध्यक्ष विलास तोटावार, कार्यकारिणी सदस्य रविंद्र द्याडे, गुरुराज चिद्रावार, प्राचार्य डॉ. मोहन खताळ, प्रा. गंगाधर हिंगोले, विजय पोशट्टीदादा उनग्रतवार, एच. एस. खंडागळे, संयोजन समितीचे सदस्य डॉ. सर्जेराव रणखांब आदींची उपस्थिती होती.

कार्यक्रमास मोठ्या संख्येने श्रोत्यांची उपस्थिती होती. कार्यक्रमाच्या यशस्वीतेसाठी कपिल उनग्रतवार, तिरुपती उरलागोंडावार, बालाजी माळेगावकर, पांडुरंग जाधव, हणमंत येरगुलवार आदींनी परिश्रम घेतले.

📍बातम्या व जाहिरातीसाठी संपर्क 🗣📲📞(9923072242)