🔴 संस्कारांची शिदोरी, कर्तृत्वाची भरारी डॉ. वैष्णवी गोरडवार यांचा कुंभार समाजाच्या वतीने गौरव.

🔴 संस्कारांची शिदोरी, कर्तृत्वाची भरारी! डॉ. वैष्णवी गोरडवार यांचा कुंभार समाजाच्या वतीने गौरव.

शिवगर्जना न्यूज,

नांदेड प्रतिनिधी :

नांदेड : वैद्यकीय क्षेत्रातील पदवीचे शिक्षण यशस्वीरीत्या पूर्ण करून डॉक्टर होण्याचा मान मिळविल्याबद्दल कु. डॉ. वैष्णवी उत्तमराव गोरडवार (मांजरमकर) यांचा सकल कुंभार समाज विकास परिषद, नांदेड जिल्ह्याच्या वतीने विशेष गौरव करण्यात आला. हा गौरव सोहळा डॉ. वैष्णवी यांच्या शैक्षणिक यशासह त्यांच्या आई-वडिलांच्या संस्कारांचा, त्यागाचा आणि कष्टांचा सन्मान करणारा ठरला.

परिषदेचे जिल्हाध्यक्ष गणपतराव शेवाळकर यांच्या संकल्पनेतून व मार्गदर्शनाखाली आयोजित या कार्यक्रमाचे सूत्रसंचालन आदर्श शिक्षक तथा उत्कृष्ट निवेदक शंकरराव कुर्णापल्ले यांनी केले. यावेळी गणपतराव शेवाळकर यांनी तरुणांनी शिक्षणाला सर्वोच्च प्राधान्य देऊन विविध क्षेत्रांत प्रगती साधावी आणि समाजसेवेसाठी पुढाकार घ्यावा, असे आवाहन केले. चैतन्य पिंपळढोहकर यांनीही डॉ. वैष्णवी यांच्या यशाचे कौतुक करून पुढील वाटचालीस शुभेच्छा दिल्या.

ॲड. संजय रुईकर यांनी संस्कृत सुभाषितातील ‘स्वदेशे पूज्यते राजा, विद्वान् सर्वत्र पूज्यते’ या विचारातून शिक्षण आणि ज्ञानाचे महत्त्व स्पष्ट केले. डॉक्टर ही पदवी केवळ नावापुढे लावण्याची उपाधी नसून रुग्णसेवा, सामाजिक बांधिलकी आणि माणुसकी जपण्याची मोठी जबाबदारी असल्याचे त्यांनी सांगितले. वैद्यकीय क्षेत्रात कार्यरत असताना गरजू, वंचित आणि आर्थिकदृष्ट्या दुर्बल रुग्णांपर्यंत आरोग्यसेवा पोहोचविण्यासाठी डॉ. वैष्णवी यांनी प्रयत्न करावेत, असे मार्गदर्शनही त्यांनी केले.

डॉ. वैष्णवी यांच्या यशामागे त्यांचे वडील उत्तम मांजरमकर आणि आई सौ. शकुंतला मांजरमकर यांचे संस्कार, प्रोत्साहन, त्याग आणि मोलाचे पाठबळ आहे. पालकांनी पाहिलेली स्वप्ने आणि घेतलेल्या कष्टांचे सार्थक त्यांच्या कन्येने वैद्यकीय क्षेत्रात यश मिळवून केले आहे. त्यामुळे हा गौरव केवळ एका डॉक्टर कन्येचा नसून तिच्या पालकांच्या संस्कारांचाही असल्याची भावना यावेळी व्यक्त करण्यात आली.

वैद्यकीय पदवीसोबत सेवाभावाची जोड द्या.

डॉ. वैष्णवी यांनी आपल्या ज्ञानाचा उपयोग समाजाच्या आरोग्यविषयक उन्नतीसाठी करावा, रुग्णांच्या वेदना कमी करून त्यांच्या आयुष्यात आशेचा किरण निर्माण करावा आणि आपल्या कार्यातून समाजाचा विश्वास संपादन करावा, अशा सदिच्छा मान्यवरांनी व्यक्त केल्या. त्यांच्या यशातून समाजातील इतर मुलींनाही मोठी स्वप्ने पाहण्याची आणि ती पूर्ण करण्यासाठी प्रयत्न करण्याची प्रेरणा मिळावी, अशी अपेक्षा यावेळी व्यक्त करण्यात आली.

या कार्यक्रमास गोविंदराव पाटोदेकर, चैतन्य पिंपळढोहकर, शिक्षक नेते बालाजीराव चक्रधर, रमेश नामपल्ले, हनुमंत रावणपल्ले, शंकरराव कुर्णापल्ले, ॲड. संजय रुईकर, उत्तम मांजरमकर, सौ. शकुंतला मांजरमकर यांच्यासह समाजातील अनेक मान्यवर व नागरिक उपस्थित होते.

डॉ. वैष्णवी यांनी आभार प्रदर्शनातून उपस्थित मान्यवर आणि सर्व सहकार्यकर्त्यांप्रति कृतज्ञता व्यक्त केली. एका कन्येचे डॉक्टर होणे ही एका कुटुंबाची स्वप्नपूर्ती असली, तरी तिच्या हातून समाजसेवा घडणे ही संपूर्ण समाजासाठी अभिमानाची बाब आहे. डॉ. वैष्णवी यांची यशस्वी वाटचाल नव्या पिढीसाठी प्रेरणादायी ठरत आहे.

🔴मुख्य संपादक: श्री शहाजी वरखिंडे                   मो. 9923072242