🔴 दुष्काळावर मात करण्यासाठी नांदेड जिल्ह्यात ठोस विकास आराखडा तयार करा.

🔴 दुष्काळावर मात करण्यासाठी नांदेड जिल्ह्यात ठोस विकास आराखडा तयार करा.

नांदेड क्रीडा संकुलाला दिवंगत अजितदादांचे नाव देण्याची मागणी; उपमुख्यमंत्री सुनेत्राताई पवार यांच्याकडे राष्ट्रवादीच्या शिष्टमंडळाचे साकडे

शिवगर्जना न्यूज,

नायगाव : बाळासाहेब पांडे

नांदेड जिल्ह्यातील दुष्काळ आणि पाणी टंचाईवर कायमस्वरूपी मात करण्यासाठी ठोस उपाययोजना राबवाव्यात, तसेच जिल्ह्यातील विविध विकासकामांसाठी नियोजनबद्ध आराखडा तयार करावा, अशी मागणी राष्ट्रवादी काँग्रेसच्या शिष्टमंडळाने उपमुख्यमंत्री तथा पक्षाच्या राष्ट्रीय अध्यक्षा सुनेत्राताई अजितदादा पवार यांच्याकडे केली. यासोबतच नांदेड येथील क्रीडा संकुलाला दिवंगत उपमुख्यमंत्री अजितदादा पवार यांचे नाव देण्याची मागणीही शिष्टमंडळाने केली.

नांदेड जिल्ह्यातील दुष्काळी परिस्थिती, पाणीटंचाई, ग्रामीण भागातील विकासकामे, युवकांसाठी क्रीडासुविधा आणि अल्पसंख्याक विद्यार्थ्यांच्या शैक्षणिक संधी या महत्त्वाच्या विषयांवर शिष्टमंडळाने उपमुख्यमंत्री सुनेत्राताई पवार यांच्याशी चर्चा केली.

या शिष्टमंडळात माजी आमदार मोहन हंबर्डे, माजी आमदार अविनाश घाटे, नांदेड दक्षिणचे जिल्हाध्यक्ष शिवराज पाटील होटाळकर, नांदेड उत्तरचे जिल्हाध्यक्ष बाळासाहेब रावणगावकर यांच्यासह राष्ट्रवादी काँग्रेसचे पदाधिकारी सहभागी झाले होते.

दुष्काळ आणि पाणीटंचाईवर कायमस्वरूपी उपाययोजनांची मागणी

नांदेड जिल्ह्यात दुष्काळ आणि पाणीटंचाईच्या समस्येवर मात करण्यासाठी केवळ तात्पुरत्या उपाययोजनांवर अवलंबून न राहता दीर्घकालीन नियोजन करणे आवश्यक आहे. जलसंधारण, पाणी उपलब्धता आणि ग्रामीण भागातील मूलभूत सुविधांच्या विकासासाठी ठोस कृती आराखडा तयार करून विकासकामांना गती द्यावी, अशी मागणी शिष्टमंडळाने केली.

क्रीडा संकुलाला अजितदादांचे नाव द्या

दिवंगत उपमुख्यमंत्री अजितदादा पवार यांनी नांदेड येथील क्रीडा संकुलाच्या विकासासाठी पुढाकार घेतला होता. त्यांच्या कार्याच्या स्मृती जतन करण्यासाठी नांदेड क्रीडा संकुलाला अजितदादा पवार यांचे नाव देण्यात यावे, अशी आग्रही मागणी शिष्टमंडळाने केली.

तसेच ग्रामीण भागातील गायरान जमिनीवर नियमानुसार क्रीडांगणे, धावपट्ट्या आणि ओपन जिम उभारण्यात याव्यात. यामुळे सैन्यदल आणि पोलीस भरतीची तयारी करणाऱ्या ग्रामीण भागातील तरुणांना सरावासाठी आवश्यक सुविधा उपलब्ध होतील, असा मुद्दाही शिष्टमंडळाने मांडला.

अल्पसंख्याक विद्यार्थ्यांसाठी स्वतंत्र शैक्षणिक योजना राबवा

अल्पसंख्याक समाजातील विद्यार्थ्यांना गुणवत्तापूर्ण शिक्षणाच्या अधिक संधी उपलब्ध करून देण्यासाठी दिवंगत अजितदादा पवार यांच्या नावाने नवीन शैक्षणिक योजना सुरू करावी, अशी मागणीही करण्यात आली. या योजनेच्या माध्यमातून विद्यार्थ्यांना इंग्रजी माध्यमाच्या शाळांमध्ये शिक्षण घेण्यासाठी प्रोत्साहन आणि आवश्यक सुविधा उपलब्ध करून द्याव्यात, अशी विनंती शिष्टमंडळाने केली.

मागण्यांवर सकारात्मक कार्यवाहीचे आश्वासन

नांदेड जिल्ह्याच्या सर्वांगीण विकासाशी संबंधित विविध मागण्या शिष्टमंडळाने उपमुख्यमंत्री सुनेत्राताई पवार यांच्यासमोर मांडल्या. या मागण्यांवर सकारात्मक विचार करून पुढील कार्यवाही करण्याचा प्रयत्न केला जाईल, असे आश्वासन त्यांनी दिले.

नांदेड जिल्ह्यातील दुष्काळ आणि पाणीटंचाईच्या प्रश्नांवर कायमस्वरूपी उपाययोजना, ग्रामीण युवकांसाठी क्रीडासुविधा आणि विद्यार्थ्यांसाठी शैक्षणिक संधी उपलब्ध झाल्यास जिल्ह्याच्या विकासाला नवी दिशा मिळू शकते, अशी अपेक्षा व्यक्त होत आहे.

🔴मुख्य संपादक: श्री शहाजी वरखिंडे                   मो. 9923072242