🛑 दुष्काळी संकटात शेतकरी, शेतमजूर व कष्टकऱ्यांच्या पाठीशी काँग्रेस खंबीरपणे उभी राहणार.

🔴 दुष्काळी संकटात शेतकरी, शेत मजूर व कष्टकऱ्यांच्या पाठीशी काँग्रेस खंबीरपणे उभी राहणार. 

काँग्रेस नेते रामदास पाटील सुमठाणकर यांची ग्वाही; १०६ गावांत दुष्काळी संवाद दौऱ्यातून समस्या जाणून घेतल्या

शिवगर्जना न्यूज,

देगलूर : प्रतिनिधी 9923072242

नांदेड जिल्ह्यासह देगलूर विधानसभा मतदारसंघावर दुष्काळाचे गंभीर सावट निर्माण झाले असून, या संकटाचा सर्वाधिक फटका शेतकरी, शेतमजूर, कामगार आणि सर्वसामान्य नागरिकांना बसत आहे. अशा कठीण परिस्थितीत जनतेने खचून न जाता धैर्य राखावे. शेतकऱ्यांच्या विविध समस्या सोडविण्यासाठी जिल्हा प्रशासनापासून मंत्रालय स्तरापर्यंत पाठपुरावा करून शासनाकडून मदत मिळवून देण्यासाठी काँग्रेस पक्षाची संपूर्ण टीम प्रयत्नशील राहील, अशी ठाम ग्वाही काँग्रेस नेते रामदास पाटील सुमठाणकर यांनी दिली. यावेळी त्यांनी नांदेड लोकसभा व देगलूर विधानसभा मतदारसंघातील जनतेला दीपावलीच्या मनःपूर्वक शुभेच्छाही दिल्या.

गेल्या दीड महिन्यापासून काँग्रेसचे तालुकाध्यक्ष, विविध सेलचे पदाधिकारी आणि सर्कल अध्यक्ष यांच्या सहकार्याने देगलूर तालुक्यातील पाचही सर्कलमधील जवळपास १०५ ते १०६ गावांमध्ये दुष्काळी संवाद दौरा राबविण्यात आला. या दौऱ्यादरम्यान पाणीटंचाई, जनावरांचा चारा, पशुधन नोंदणी, वीजपुरवठा, बँकिंग सेवा, एसटी महामंडळ तसेच विविध शासकीय विभागांशी संबंधित समस्यांची माहिती घेण्यात आली. आगामी आठवड्यात खासदार आणि जिल्हाधिकाऱ्यांशी समन्वय साधून दुष्काळी परिस्थितीवर विशेष बैठक घेण्याचा प्रयत्न असल्याचेही त्यांनी स्पष्ट केले.

जनावरे कवडीमोल भावाने विकण्याची वेळ

दुष्काळामुळे शेतकरी आर्थिक संकटात सापडला असून, चारा व पाण्याअभावी पशुधन विक्रीचे प्रमाण वाढत आहे. देगलूर येथील मोंढा मैदानावरील जनावरांच्या बाजारात एक लाख रुपये किमतीचे जनावर अवघ्या ६० ते ६५ हजार रुपयांना विकावे लागत असल्याची गंभीर परिस्थिती निर्माण झाली आहे. त्यामुळे शेतकऱ्यांनी आपल्या सर्व जनावरांची पशुवैद्यकीय विभागाकडे शंभर टक्के नोंदणी करून घ्यावी, असे आवाहन रामदास पाटील यांनी केले. तसेच अनेक गावांमध्ये अपुऱ्या वीजपुरवठ्यामुळे शेतकऱ्यांना अडचणींचा सामना करावा लागत असून, संबंधित विभागांनी तातडीने लक्ष द्यावे, अशी मागणीही त्यांनी केली.

पाणीटंचाईवर मात करण्यासाठी जलसंधारणाची गरज

आगामी काळातील पाणीटंचाईचे संकट लक्षात घेता नागरिकांनी पाण्याचा काटकसरीने वापर करावा. करडखेड धरणातील गाळाची समस्या दूर करणे, पारंपरिक विहिरींचे खोलीकरण, नाल्यांचे खोलीकरण आणि जलसंधारणाची कामे मोठ्या प्रमाणावर हाती घेणे आवश्यक असल्याचे त्यांनी सांगितले. दुष्काळी परिस्थितीत खासगी फायनान्स कंपन्यांनी शेतकऱ्यांवर कर्जवसुलीसाठी अन्यायकारक दबाव आणू नये. अशा तक्रारी प्राप्त झाल्यास शेतकऱ्यांच्या बाजूने ठामपणे उभे राहू, असा इशाराही त्यांनी दिला.

शेतकरी टिकला तरच ग्रामीण अर्थव्यवस्था टिकेल

ग्रामीण भागातील घरफोड्या आणि जनावरांच्या चोरीच्या घटनांवर नियंत्रण मिळविण्यासाठी पोलीस प्रशासनाने विशेष लक्ष द्यावे, असे आवाहनही त्यांनी केले. शेतकरी हा ग्रामीण अर्थव्यवस्थेचा कणा असून, बळीराजा टिकला तरच समाजव्यवस्था टिकेल. त्यामुळे या संकटाच्या काळात सामाजिक संस्था, संघटना आणि दानशूर व्यक्तींनी शेतकऱ्यांच्या मदतीसाठी पुढे येण्याची गरज आहे.

शेतकरी, शेतमजूर आणि कामगारांच्या पाठीशी काँग्रेस पक्षासह महाविकास आघाडीचे सर्व पदाधिकारी खंबीरपणे उभे राहतील. जनतेने धीर सोडू नये. शासन दरबारी सातत्याने पाठपुरावा करून संकटग्रस्त जनतेला मदत मिळवून देण्यासाठी प्रयत्नशील राहू, अशी ग्वाही रामदास पाटील सुमठाणकर यांनी दिली. यावेळी त्यांनी सर्व नागरिकांना दीपावलीच्या मनःपूर्वक शुभेच्छा दिल्या.

🔴मुख्य संपादक: श्री शहाजी वरखिंडे                  मो. 9923072242