🔴पितृपक्ष निमित्त नाशिक सेवाकार्याचा उपक्रम; दिव्यांग विद्यार्थ्यांना पोषण आहार व जीवनकौशल्याचे मार्गदर्शन.

🔴 पितृपक्ष निमित्त नमस्ते नाशिक फाउंडेशनचा सेवाभावी उपक्रम; दिव्यांग विद्यार्थ्यांना पोषण आहारासह जीवनकौशल्याचे मार्गदर्शन.

शिवगर्जना न्यूज : नाशिक प्रतिनिधी

नाशिक : पितृपक्षाचे औचित्य साधून नमस्ते नाशिक फाउंडेशन, नाशिक यांच्या वतीने सिडको येथील कर्णबधिर विद्यालयातील दिव्यांग विद्यार्थ्यांसाठी विविध सेवाभावी उपक्रम आणि जनजागृतीपर कार्यक्रमाचे आयोजन करण्यात आले. “पूर्वजांचे स्मरण… सेवेतून समाधान!” या भावनेतून राबविण्यात आलेल्या या उपक्रमाद्वारे सामाजिक बांधिलकी जपत विद्यार्थ्यांना मदतीचा हात देण्यात आला.

या उपक्रमांतर्गत विद्यार्थ्यांना पोषण आहार म्हणून खजूर व राजगिऱ्याच्या चिक्क्या देण्यात आल्या. तसेच विद्यालयासाठी चप्पल-बूट स्टँड, किराणा साहित्य आणि दैनंदिन वापरासाठी आवश्यक वस्तू उपलब्ध करून देण्यात आल्या.

विद्यार्थ्यांचे आरोग्य, सुरक्षितता आणि सर्वांगीण विकास लक्षात घेऊन आरोग्य जनजागृती व जीवन कौशल्यविषयक मार्गदर्शन करण्यात आले. यावेळी ‘गुड टच–बॅड टच’ या महत्त्वपूर्ण विषयावर विद्यार्थ्यांना वैयक्तिक सुरक्षिततेची जाणीव करून देण्यात आली. सौ. स्नेहल देव यांनी विद्यार्थ्यांशी संवाद साधत सुरक्षित व असुरक्षित स्पर्श ओळखणे, स्वतःचे संरक्षण करणे आणि गरज पडल्यास विश्वासू व्यक्तीशी संवाद साधणे याबाबत मार्गदर्शन केले.

कार्यक्रमादरम्यान सौ. प्रतिभा कोतकर यांनी विद्यार्थ्यांशी संवाद साधून कविता आणि कवितेची आवड याविषयी माहिती दिली. या उपक्रमामुळे विद्यार्थ्यांना केवळ आवश्यक साहित्यच मिळाले नाही, तर त्यांच्या व्यक्तिमत्त्व विकासासाठीही प्रोत्साहन मिळाले.

या कार्यक्रमाला कार्यकारी समिती प्रमुख सौ. अलका येवले, सौ. रेखा धांडे, श्री. अनिल नाहर, श्री. राजेंद्र बाफना, श्री. संदीप देव आणि श्री. पी. एस. कोतकर यांची प्रमुख उपस्थिती होती.

“सेवा हीच खरी श्रद्धांजली आणि माणुसकी हाच खरा धर्म” या विचारातून नमस्ते नाशिक फाउंडेशनने हा उपक्रम राबविला. पितृपक्षाच्या निमित्ताने पूर्वजांचे स्मरण करत समाजातील गरजू घटकांना मदतीचा हात देण्याचा फाउंडेशनचा हा उपक्रम सामाजिक संवेदनशीलतेचा संदेश देणारा ठरला.

🔴मुख्य संपादक: श्री शहाजी वरखिंडे                  मो. 9923072242