🔴 देगलूरमध्ये १२० उत्कृष्ट शिक्षकांचा गौरव; नशामुक्तीचीही दिली शपथ

🔴 देगलूरमध्ये १२० उत्कृष्ट शिक्षकांचा गौरव; नशामुक्तीचीही दिली शपथ

शिक्षक हेच राष्ट्राचे खरे निर्माते.

शिवगर्जना न्यूज,

देगलूर : प्रतिनिधी

देगलूर दि. ८ प्रजापिता ब्रह्माकुमारी ईश्वरीय विश्वविद्यालय, देगलूर सेवा केंद्राच्या वतीने शिक्षक दिनाचे औचित्य साधून शहर व ग्रामीण भागातील १२० उत्कृष्ट शिक्षकांचा भव्य सन्मान सोहळा उत्साहपूर्ण वातावरणात संपन्न झाला. शिक्षकांच्या शैक्षणिक आणि सामाजिक योगदानाचा गौरव करत त्यांना सन्मानित करण्यात आले.

यावेळी मार्गदर्शन करताना ब्रह्माकुमारी मेनका बहन यांनी बदलत्या शिक्षणव्यवस्थेतील शिक्षकांच्या भूमिकेवर प्रकाश टाकला. डिजिटल तंत्रज्ञानामुळे शिक्षण क्षेत्रात झपाट्याने बदल होत असून शिक्षकांसमोर नवी आव्हाने उभी राहत आहेत. अशा परिस्थितीत विद्यार्थ्यांची प्रतिभा, क्षमता आणि सुप्त गुण ओळखून त्यांना योग्य दिशा देणारा समर्पित शिक्षकच विद्यार्थ्यांच्या जीवनातील खरा प्रेरणास्रोत ठरतो, असे त्यांनी सांगितले. “शिक्षक हेच देशाचे खरे निर्माते आहेत,” असे प्रतिपादन त्यांनी केले.

कार्यक्रमाला प्रमुख अतिथी म्हणून माजी जिल्हा शिक्षण सभापती भ्राता माधवराव मिसाळे, पोलीस उपअधीक्षक भ्राता वैभव पडवळ आणि गटशिक्षणाधिकारी भ्राता बालाजी गोडाजी उपस्थित होते. यावेळी त्यांनी शिक्षक दिनाचे महत्त्व सांगतानाच राष्ट्राच्या जडणघडणीत शिक्षकांची भूमिका अत्यंत महत्त्वपूर्ण असल्याचे नमूद केले.

रक्षासूत्र बांधून नशामुक्तीची शपथ

समारोपप्रसंगी उपस्थित शिक्षकांना रक्षासूत्र बांधून नशामुक्तीची प्रतिज्ञा देण्यात आली. विद्यार्थी आणि समाजाला व्यसनांपासून दूर ठेवण्यासोबतच निरोगी, सुसंस्कारित व व्यसनमुक्त समाजनिर्मितीचा संदेश यावेळी देण्यात आला.

कार्यक्रमाचे प्रभावी सूत्रसंचालन ब्रह्माकुमारी विद्या बहन यांनी केले. समारोहाच्या यशस्वितेसाठी बी.के. रामचंद्र भाई, भ्राता चंद्रकांत नाना मोरे, बी.के. एस. एन. बिरादार, राठोड सर, बी.के. रमेश कळसकर, डॉ. सुनील जाधव, बी.के. गजेंद्र यांच्यासह सेवा केंद्रातील भाई-बहिणींनी परिश्रम घेतले.

🔴मुख्य संपादक: श्री शहाजी वरखिंडे

मो. 9923072242