🛑 लक्षवेध कर्तृत्व गौरव सन्मान सोहळा थाटात संपन्न.

🛑 लक्षवेध कर्तृत्व गौरव सन्मान सोहळा थाटात संपन्न. 

 (१२० कर्तृत्ववान व्यक्तींचा सन्मान)

शिवगर्जना न्यूज,

प्रतिनिधी

अमरावती – समाजातील विविध क्षेत्रांत उल्लेखनीय कार्य करणाऱ्या कर्तृत्ववान व्यक्तींच्या योगदानाचा गौरव करण्यासाठी आयोजित ‘लक्षवेध कर्तृत्व गौरव संमेलन, अमरावती २०२६’ तसेच ‘विलोभनीय सत्कार समारंभ सोहळा २०२६’ उत्साहपूर्ण वातावरणात दिमाखात संपन्न झाला.

युवा कर्तृत्व फाउंडेशन, महाराष्ट्र, मानव चेतना जनविकास बहुउद्देशीय सेवा संस्था, नागपूर आणि शुभम क्रिएशन्स, अमरावती यांच्या संयुक्त विद्यमाने रविवार, दि. २३ ऑगस्ट २०२६ रोजी श्री संत गाडगेबाबा समाधी मंदिर सभागृह, गाडगे नगर, अमरावती येथे या सोहळ्याचे आयोजन करण्यात आले होते.

या भव्य सोहळ्यात विविध क्षेत्रांत उल्लेखनीय योगदान देणाऱ्या तब्बल १२० कर्तृत्ववान व्यक्तींना पुरस्कार देऊन सन्मानित करण्यात आले. सामाजिक, सांस्कृतिक, साहित्यिक, शैक्षणिक, आरोग्य तसेच इतर विविध क्षेत्रांत आपल्या कार्यातून समाजासाठी योगदान देणाऱ्या व्यक्तींचा यावेळी गौरव करण्यात आला.

कार्यक्रमाला पद्मश्री ज्येष्ठ समाजसेवक डॉ. रवींद्र कोल्हे प्रमुख अतिथी व शुभहस्ते म्हणून उपस्थित होते. तसेच समाजसेवक तथा मानव चेतना जनविकास संस्थेचे संस्थापक अध्यक्ष धनंजय हरडे, अभिनेते व निर्माते रविकुमार गजभिये, अभिनेत्री राजश्री कोळी, अभिनेत्री ईशा भिसे, प्रसिद्ध रंगकर्मी माधुरी सुधा यांच्यासह युवा कर्तुत्व संस्थेच्या अध्यक्षा सौ. रूपाली घाडगे यांच्यासह विविध क्षेत्रांतील मान्यवरांची उपस्थिती लाभली.

कार्यक्रमाचे स्वागताध्यक्ष प्रा. डॉ. बी. एन. खरात यांनी मान्यवरांचे स्वागत केले. यावेळी सन्मानित करण्यात आलेल्या १२० पुरस्कारार्थींनी आपल्या कार्यातून समाजात सकारात्मक परिवर्तन घडवून आणण्याचा प्रयत्न केला आहे. त्यांच्या कार्याची दखल घेत त्यांचा गौरव करणे हा या संमेलनाचा प्रमुख उद्देश होता.

साहित्य क्षेत्रातील लेखक, कवी व साहित्यिक, सांस्कृतिक क्षेत्रातील कलाकार, सामाजिक क्षेत्रात कार्य करणारे समाजसेवक, शैक्षणिक क्षेत्रातील योगदान देणारे शिक्षक व शिक्षणप्रेमी तसेच आरोग्य क्षेत्रात सेवा देणाऱ्या व्यक्तींचा सन्मान करण्यात आल्याने या सोहळ्याला व्यापक स्वरूप प्राप्त झाले.

कर्तृत्वाचा सन्मान आणि समाजासाठी प्रेरणादायी कार्य करणाऱ्यांना प्रोत्साहन देण्याच्या उद्देशाने आयोजित करण्यात आलेल्या या सोहळ्यात मान्यवरांनी आपल्या मनोगतातून पुरस्कारार्थींचे अभिनंदन केले. समाजाच्या विकासासाठी विविध क्षेत्रांत कार्य करणाऱ्या व्यक्तींच्या योगदानाची दखल घेणे ही काळाची गरज असल्याचे यावेळी नमूद करण्यात आले.

कार्यक्रमाच्या आयोजक व निमंत्रक युवा कर्तृत्व फाउंडेशनच्या संस्थापक अध्यक्षा रुपाली घाडगे यांनी या सोहळ्यासाठी पुढाकार घेतला. संस्था पदाधिकारी, हितचिंतक आणि कार्यकर्त्यांच्या सहकार्याने कार्यक्रमाचे नियोजन करण्यात आले.

एकाच व्यासपीठावर विविध क्षेत्रांतील १२० कर्तृत्ववान व्यक्तींचा गौरव झाल्याने लक्षवेध कर्तृत्व गौरव संमेलन हे अमरावतीतील प्रेरणादायी आणि उल्लेखनीय आयोजन ठरले. पुरस्कार मिळाल्याने सन्मानित व्यक्तींमध्ये आनंदाचे वातावरण होते. समाजासाठी कार्य करणाऱ्या व्यक्तींना अशा प्रकारे प्रोत्साहन मिळाल्याने भविष्यातही विविध क्षेत्रांत अधिक जोमाने कार्य करण्याची प्रेरणा मिळणार आहे.

🔴मुख्य संपादक: श्री शहाजी वरखिंडे

मो. 9923072242