🛑 अवैधरित्या गुटखा आणणाऱ्या चोंडी येथील किराणा दुकानदारास देगलूर पोलिसांनी केले अटक

🔴 तेलंगणातून अवैध गुटखा आणणाऱ्या चोंडी येथील किराणा दुकानदाराला देगलूर पोलिसांची अटक.

 ४६ हजारांचा ४४० रुपयांचा मुद्देमाल जप्त. 

शिवगर्जना न्यूज,

देगलूर प्रतिनिधी

महाराष्ट्र शासनाने प्रतिबंधित केलेल्या गुटखा व सुगंधित तंबाखूची तेलंगणा राज्यातून अवैधरित्या वाहतूक करणाऱ्या एका किराणा दुकानदारावर देगलूर पोलिसांनी धडक कारवाई करत सुमारे ४६ हजार ४४० रुपयांचा मुद्देमाल जप्त केला आहे. या कारवाईत एका आरोपीला अटक करण्यात आली असून, त्याच्याविरुद्ध अन्न सुरक्षा व मानके कायदा, २००६ अन्वये गुन्हा दाखल करण्यात आला आहे.

देगलूर पोलीस ठाण्याच्या हद्दीत १२ जुलै २०२६ रोजी दुपारी सुमारे २.३० वाजता नळंगल–हनुमान हिप्परगा मार्गावर ही कारवाई करण्यात आली.

पोलीस निरीक्षक यांच्या मार्गदर्शनाखाली पोलीस पथकातील पोलीस कॉन्स्टेबल बळीराम घुळे, पोलीस हेडकॉन्स्टेबल मोहन कनकवळे व पोलीस कॉन्स्टेबल नामदेव वानरे हे परिसरात गस्त घालत असताना, एका निळ्या रंगाच्या TVS XL 100 दुचाकीवरून प्रतिबंधित गुटखा आणला जात असल्याची गोपनीय माहिती मिळाली. त्यानुसार पंचांच्या उपस्थितीत सापळा रचून संबंधित वाहन अडवण्यात आले. वाहनाची झडती घेतली असता त्यामध्ये सागर पान मसाला २३ पाकिटे (किंमत ३,२२० रुपये) आणि एसआर-१ सुगंधित तंबाखूची २३ पाकिटे (किंमत ३,२२० रुपये) असा प्रतिबंधित माल आढळून आला. तसेच एमएच २६ बीजे ११७४ क्रमांकाची TVS XL 100 दुचाकी (अंदाजे किंमत ४० हजार रुपये) जप्त करण्यात आली. एकूण ४६ हजार ४४० रुपयांचा मुद्देमाल पोलिसांनी ताब्यात घेतला.

या प्रकरणी माधव राचप्पा चोंडीकर (वय ५१), व्यवसाय – किराणा दुकान चालक, रा. ईदगाह परिसर, चोंडी, ता. मुखेड, जि. नांदेड यास अटक करण्यात आली. प्राथमिक चौकशीत आरोपीने हा प्रतिबंधित माल तेलंगणा राज्यातून आणल्याची कबुली दिल्याची माहिती पोलिसांनी दिली. आरोपीविरुद्ध अन्न सुरक्षा व मानके कायदा, २००६ अंतर्गत गुन्हा नोंद करण्यात आला असून, पुढील तपास पोलीस उपनिरीक्षक हणमंत शिंदे करीत आहेत.

 सीमावर्ती भागातून होणाऱ्या प्रतिबंधित गुटखा व तंबाखूच्या अवैध वाहतुकीवर देगलूर पोलीस सातत्याने लक्ष ठेवून असून, अशा कारवाया पुढेही सुरू राहणार…. पोलीस उपनिरीक्षक हणमंत शिंदे

🔴 मुख्य संपादक: श्री शहाजी वरखिंडे

मो. 9923072242