🛑 शहरात पोलीस ठाण्यासमोरच एकाच रात्री पाच दुकाने फोडली; व्यापाऱ्यांमध्ये भीतीचे वातावरण

🔴 नायगाव शहरात पोलीस ठाण्यासमोरच एकाच रात्री पाच दुकाने फोडली; व्यापाऱ्यांमध्ये भीतीचे वातावरण.

शिवगर्जना न्यूज,

नायगाव प्रतिनिधी : दिपक गजभारे

नायगाव शहरात अज्ञात चोरट्यांनी धाडसी चोरी करत एकाच रात्री तब्बल पाच दुकाने फोडल्याची धक्कादायक घटना घडली. या घटनेमुळे व्यापारी वर्गात भीतीचे वातावरण निर्माण झाले असून, शहरातील सुरक्षेवर ही प्रश्नचिन्ह उपस्थित होत आहे.

चोरट्यांनी अजय फुटवेअर, जनार्धन किराणा जनरल स्टोअर्स, प्रिन्स मल्टी सर्विसेस, राजस्थान स्वीट होम आणि स्वरा वॉच अँड मोबाईल गॅलरी या दुकानांचे शटर व कुलूप तोडून चोरी केली. चोरीत किती रोख रक्कम व ऐवज लंपास झाला, याची माहिती उशिरापर्यंत स्पष्ट झाली नव्हती. संबंधित दुकानदारांकडून नुकसानीचा पंचनामा करण्यात येत असून, चोरीचा अचूक आकडा समोर येणे बाकी आहे.

विशेष म्हणजे, ही सर्व दुकाने नायगाव पोलीस ठाण्याच्या समोरच आहेत. त्यामुळे पोलीस ठाण्याच्या अगदी समोर सलग पाच दुकाने फोडण्याचे धाडस चोरट्यांनी कसे केले, असा प्रश्न व्यापारी व नागरिक उपस्थित करत आहेत. या घटनेनंतर शहरातील रात्रीच्या गस्तीच्या प्रभावी अंमलबजावणीबाबतही चर्चा सुरू झाली आहे.

घटनेची माहिती मिळताच पोलिसांनी घटनास्थळी भेट देऊन पंचनामा केला असून, परिसरातील सी.सी.टीव्ही. फुटेज तपासण्याचे काम सुरू केले आहे. अज्ञात चोरट्यांचा शोध घेण्यासाठी तपास पथके कार्यरत असून, आरोपींना लवकरात लवकर अटक करण्यासाठी प्रयत्न सुरू असल्याची माहिती पोलिसांकडून देण्यात आली.

या घटनेमुळे व्यापाऱ्यांमध्ये संतापाचे वातावरण असून, शहरात रात्रीची गस्त वाढविणे, बाजारपेठेत प्रभावी सुरक्षा व्यवस्था उभी करणे आणि आरोपींना तातडीने जेरबंद करून चोरीचा छडा लावणे, अशी मागणी व्यापारी व नागरिकांनी केली आहे.

लोकशाही व्यवस्थेत नागरिकांच्या जीवित आणि मालमत्तेचे संरक्षण ही प्रशासनाची महत्त्वाची जबाबदारी आहे. त्यामुळे या प्रकरणाचा सखोल तपास करून दोषींवर कठोर कारवाई करावी, तसेच भविष्यात अशा घटना टाळण्यासाठी प्रभावी उपाययोजना कराव्यात, अशी अपेक्षा व्यक्त होत आहे.

🔴मुख्य संपादक: श्री शहाजी वरखिंडे

मो. 9923072242