🛑 नोटिसांकडे दुर्लक्ष महागात; नरसीतील दोन दशकांची अतिक्रमणे काही तासांत जमीनदोस्त.

🔴 नोटिसांकडे दुर्लक्ष महागात; नरसीतील दोन दशकांची अतिक्रमणे काही तासांत जमीनदोस्त.

रामतीर्थ पोलिसांचा कडक बंदोबस्त; विक्रम हराळे यांच्या नेतृत्वाखाली धडक कारवाई

शिवगर्जना न्यूज,

नायगाव प्रतिनिधी – दिपक गजभारे

नरसी येथील मुख्य चौकासह नरसी-मुखेड, नरसी-बिलोली, नरसी-देगलूर आणि नरसी-नांदेड या प्रमुख मार्गांवरील गेल्या वीस ते पंचवीस वर्षांपासून फोफावलेल्या अतिक्रमणांवर बुधवारी प्रशासनाने बुलडोझर चालवत मोठी धडक कारवाई केली. अनेक वर्षांपासून देण्यात आलेल्या नोटिसा, सूचना आणि प्रशासनाच्या इशाऱ्यांकडे दुर्लक्ष करणाऱ्या अतिक्रमणधारकांना अखेर कारवाईचा दणका बसला असून, संपूर्ण परिसरात या मोहिमेची जोरदार चर्चा रंगली आहे.

महामार्ग व सार्वजनिक रस्त्यांच्या हद्दीत अनधिकृतपणे उभारण्यात आलेली दुकाने, पत्र्याच्या शेड्स, ओटे, तात्पुरती बांधकामे, व्यावसायिक गाळे आणि विविध प्रकारची अतिक्रमणे हटविण्यासाठी ही संयुक्त मोहीम राबविण्यात आली. सार्वजनिक बांधकाम विभागाकडून संबंधितांना यापूर्वी वारंवार नोटिसा बजावण्यात आल्या होत्या. स्वखर्चाने अतिक्रमणे हटविण्याची संधीही देण्यात आली होती. मात्र, त्याकडे सातत्याने दुर्लक्ष झाल्याने प्रशासनाने थेट कारवाईचा मार्ग स्वीकारला.

कारवाईची चाहूल लागताच अनेक अतिक्रमणधारकांनी स्वतःहून आपापली दुकाने, शेड्स आणि साहित्य हटविण्यास सुरुवात केली. रामतीर्थ पोलिसांची खाकी आणि प्रशासनाचा निर्धार पाहून काही जणांनी घाईघाईने अतिक्रमणे काढून घेतली. मात्र, जे अतिक्रमणधारक हट्टी भूमिका घेत होते, त्यांची अतिक्रमणे जेसीबीच्या सहाय्याने काही तासांत जमीनदोस्त करण्यात आली.

या कारवाईसाठी बिलोलीचे उपविभागीय पोलीस अधिकारी (DySP) मा. श्याम पानेगावकर यांच्या मार्गदर्शनाखाली रामतीर्थ पोलीस ठाण्याचे पोलीस अधिकारी विक्रम हराळे यांनी स्वतः नेतृत्व केले. मोठा पोलीस बंदोबस्त तैनात करून कोणताही अनुचित प्रकार घडू नये याची विशेष दक्षता घेण्यात आली. कारवाईदरम्यान काही ठिकाणी नाराजी व्यक्त करण्यात आली असली तरी पोलीस व प्रशासनाने कोणतीही माघार न घेता मोहीम यशस्वीपणे पूर्ण केली.

नरसी चौक हा परिसरातील अत्यंत महत्त्वाचा वाहतूक केंद्रबिंदू मानला जातो. वाढत्या अतिक्रमणांमुळे रस्त्यांची रुंदी कमी झाली होती. परिणामी वारंवार वाहतूक कोंडी, अपघातांचा धोका आणि नागरिकांची गैरसोय वाढल्याच्या तक्रारी सातत्याने होत होत्या. विशेषतः बाजाराच्या दिवशी आणि सणासुदीच्या काळात नागरिकांना मोठ्या त्रासाला सामोरे जावे लागत होते.

बिलोलीचे DySP श्याम पानेगावकर यांच्या मार्गदर्शनाखाली झालेल्या या संयुक्त कारवाईत महसूल विभाग, सार्वजनिक बांधकाम विभाग आणि पोलीस प्रशासनाचे अधिकारी व कर्मचारी सहभागी झाले होते. यंत्रसामग्रीच्या सहाय्याने अनेक वर्षांपासून रस्त्यांवर अडथळा ठरत असलेली अतिक्रमणे हटवून रस्ते पूर्णपणे मोकळे करण्यात आले.

कारवाईनंतर नरसी चौक व प्रमुख मार्गांवरील वाहतूक सुरळीत झाल्याचे चित्र पाहायला मिळाले. वाहनचालक, व्यापारी आणि नागरिकांनी प्रशासनाच्या या निर्णयाचे स्वागत करत समाधान व्यक्त केले. अनेक वर्षांपासून अतिक्रमणांच्या विळख्यात अडकलेल्या नरसी चौकाला या कारवाईमुळे नवसंजीवनी मिळाल्याची भावना नागरिकांनी व्यक्त केली.

सार्वजनिक जागांवरील अतिक्रमणांविरोधात प्रशासनाने दाखविलेली ही कठोर भूमिका भविष्यातील मोहिमांसाठी दिशादर्शक ठरणार असून, नियमांचे उल्लंघन करणाऱ्यांना कायद्यापुढे झुकावे लागते, याची प्रचिती नरसीतील या धडक कारवाईतून पुन्हा एकदा आली आहे.

🔴मुख्य संपादक: श्री शहाजी वरखिंडे

मो. 9923072242