🛑 वायू प्रदूषणाविरुद्ध स्वदेशी संशोधनाची मोठी झेप.

🔴 वायू प्रदूषणाविरुद्ध स्वदेशी संशोधनाची मोठी झेप!

शिवगर्जना न्यूज,

नायगाव : बाळासाहेब पांडे

नायगाव : हवेतील सूक्ष्मजीव नियंत्रणाच्या तंत्रज्ञानाला भारत सरकारचे पेटंट; नायगावच्या प्रा. दर्शन तळहांडे यांचे संशोधन गाजले. वाढत्या वायू प्रदूषणामुळे सार्वजनिक आरोग्यासमोरील गंभीर आव्हानांवर मात करण्याच्या दिशेने नायगावच्या संशोधकाने महत्त्वाची झेप घेतली आहे. शरदचंद्र महाविद्यालयातील वनस्पतीशास्त्र विभागाचे सहाय्यक प्राध्यापक प्रा. दर्शन रामभाऊ तळहांडे यांनी विकसित केलेल्या हवेतील सूक्ष्म जीवांचे प्रमाण कमी करणाऱ्या स्वदेशी तंत्रज्ञानाला भारत सरकारच्या भारतीय पेटंट कार्यालयाने अधिकृत पेटंट मंजूर केले आहे. हरित नॅनो तंत्रज्ञानावर आधारित हे संशोधन घरातील हवा अधिक सुरक्षित करण्याबरोबरच धान्य साठवणुकीतील बुरशी जन्य संसर्ग रोखण्यासाठीही प्रभावी ठरणार असल्याने त्याला विशेष महत्त्व प्राप्त झाले आहे.

जागतिक आरोग्य संघटनेच्या अहवालानुसार, वायू प्रदूषणामुळे दरवर्षी लाखोह नागरिक श्वसन विकार, ॲलर्जी आणि फुफ्फुसांच्या आजारांना बळी पडतात. बाहेरील प्रदूषणा बरोबरच शाळा, महाविद्यालये, कार्यालये, रुग्णालये तसेच सार्वजनिक इमारतींमधील घरातील हवेत असलेले जीवाणू, बुरशीचे बीजाणू आणि इतर सूक्ष्म हंजैविक कण आरोग्यास गंभीर धोका निर्माण करतात. या शिवाय धान्य साठवण केंद्रांमध्ये बुरशीमुळे होणारी नासाडी अन्नसुरक्षेसाठीही मोठे आव्हान ठरत आहे.

यावर उपाय म्हणून संशोधकांनी ‘घरातील वातावरण आणि धान्य साठवण केंद्रांतील हवेमधील सूक्ष्मजीवांचे प्रमाण कमी करणारी गाळणी प्रणाली’ विकसित केली आहे. या अभिनव संशोधनाचे भारतीय पेटंट कार्यालयाने अधिकृत पेटंट प्रकाशन केले आहे.

या संशोधनात हरित नॅनो तंत्रज्ञानाचा वापर करून चांदी, जस्त, ऑक्साइड आणि तांबे ऑक्साइड नॅनो कणांनी युक्त प्रतिजैविक गाळणी प्रणाली विकसित करण्यात आली आहे. वनस्पतींच्या अर्कांच्या साहाय्याने पर्यावरण पूरक पद्धतीने तयार केलेल्या नॅनोकणांचा विशेष लेप गाळणीवर देण्यात आला असून, ही गाळणी धूळ व सूक्ष्मजीव अडविण्यासोबतच त्यांचा नाश करण्यासही सक्षम असल्याचे संशोधनातून सिद्ध झाले आहे.

या संशोधनात अमरावती येथील संशोधक अजिंक्य बोरकर, नागपूर येथील तायवाडे महाविद्यालयाच्या वनस्पतीशास्त्र विभागाच्या विभागप्रमुख प्रा. डॉ. सुवर्णा पाटील तसेच अमरावती येथील नरसम्मा महाविद्यालयाच्या पर्यावरणशास्त्र विभागाचे विभाग प्रमुख प्रा. डॉ. सचिन तिप्पट यांनी महत्त्वपूर्ण योगदान दिले. संशोधनासाठी सीअर भारत फाउंडेशनचे आर्थिक सहकार्य लाभले.

या उल्लेखनीय यशाबद्दल एज्युकेशन सोसायटी, नायगाव अध्यक्ष खा. रवींद्र चव्हाण, सचिव केशव पाटील चव्हाण, प्राचार्य डॉ. बलभीम वाघमारे, महाविद्यालयातील प्राध्यापक, कर्मचारी तसेच ग्रामस्थांनी प्रा. दर्शन तळहांडे यांचे अभिनंदन करून पुढील संशोधनासाठी शुभेच्छा दिल्या.

🔴मुख्य संपादक: श्री शहाजी वरखिंडे

मो. 9923072242