♦️दुःखातला विठ्ठल भक्त

दुःखातला विठ्ठल भक्त

शिवगर्जना न्यूज, 

कोणी मारले काठीन

कोणी उभारला हात

मळा भक्तीचा चोख्याने

फुलविला काळजात

• देव उभा देवळात

चोखा जळे अंधारात

वेदनेच्या वादळात

चमकतो अभंगात

• उभा घामाने भिजतो चोखा भक्तीमध्ये दंग

नामजप सदा ओठी

भुलविला पांडुरंग

• रक्त सर्वांचेच लाल

झाले चोखोबाचे हाल वाटेवरचा धुराळा

झाला अबीर गुलाल

• भक्तीरसात भिजून

ओळी अभंगाच्या आल्या

सारं काळीज फाटलं चिंध्या आयुष्याच्या झाल्या

• देह चेंगरून मेला

दगडांच्या ढिगार्‍यात

दिवा दुःखाने जळतो विठ्ठलाच्या गाभाऱ्यात

• चोखा प्रांजळ पवित्र

दुःख सोसत राहिला

नामा जप विठ्ठलाचा हाडातून ऐकू आला

• त्याला छळले लोकांनी

त्याची पाहुनिया जातं

समतेची वाट जाते ममतेचा अंगणात

स्वाती भास्कर बंगाळे ✍️