🛑 अधिक मासानिमित्त महाप्रसादाचा भव्य सोहळा.

🔴 अधिक मासानिमित्त येवती येथे तुप-पुरणपोळी महाप्रसादाचा भव्य सोहळा.

श्री सदगुरु नराशाम महाराज मठ संस्थानात पन्नास हजार भाविकांनी घेतला प्रसादाचा लाभ.

शिवगर्जना न्यूज,

नांदेड प्रतिनिधी निळकंठ जाधव

मुखेड तालुक्यातील येवती येथील श्री परमपूज्य सदगुरु नराशाम महाराज मठ संस्थान (लघु आळंदी) व समस्त ग्रामस्थांच्या वतीने अधिक मासानिमित्त गुरुवारी दि. २८ मे रोजी भव्य तुप-पुरणपोळी महाप्रसाद सोहळ्याचे आयोजन करण्यात आले होते. धार्मिक वातावरण, भक्तिमय नामस्मरण आणि सेवाभावाच्या पवित्र संगमाने संपूर्ण मठ परिसर भक्तिरसात न्हाऊन निघाला होता.

अधिक मास हा हिंदू धर्मामध्ये अत्यंत पवित्र आणि पुण्यप्रद मानला जातो. या महिन्यात जप, तप, दानधर्म, अन्नदान आणि भक्ती यांना विशेष महत्त्व असते. त्यानिमित्ताने आयोजित करण्यात आलेल्या या महाप्रसाद सोहळ्यात पंचक्रोशीतील हजारो भाविक भक्तांनी उत्स्फूर्त सहभाग नोंदविला. मठ संस्थान परिसरात पहाटेपासूनच भाविकांची मोठी गर्दी पाहायला मिळाली.

श्री सदगुरु नराशाम महाराजांच्या कृपेने प्रेम, सेवा आणि भक्तीभावाने संपन्न झालेल्या या प्रसादरूपी भोजनाचा लाभ तब्बल पन्नास हजार भाविकांनी घेतला. तुप-पुरणपोळी, विविध पारंपरिक खाद्यपदार्थ आणि प्रसादाचे नियोजन अत्यंत शिस्तबद्ध पद्धतीने करण्यात आले होते. महिला-पुरुष, वृद्ध, युवक तसेच लहान मुलांनीही मोठ्या श्रद्धेने महाप्रसादाचा लाभ घेतला. “अन्नदान हेच श्रेष्ठ दान” या भावनेतून आयोजित करण्यात आलेल्या या पुण्यकार्याला गावातील सेवेकरी, तरुण मंडळे, महिला भगिनी तसेच ग्रामस्थांनी मोलाचे सहकार्य केले. संपूर्ण कार्यक्रमात सेवाभाव, भक्ती आणि सामाजिक एकोप्याचे दर्शन घडले.

मठ संस्थान परिसरात दिवसभर भजन, नामस्मरण व धार्मिक कार्यक्रमांचे आयोजन करण्यात आले होते. भाविकांनी सद्गुरूंच्या चरणी प्रार्थना करून सुख, समृद्धी आणि समाजकल्याणासाठी आशीर्वाद घेतले. या धार्मिक सोहळ्यामुळे येवती गावात भक्तिमय वातावरण निर्माण झाले असून, अधिक मासानिमित्त आयोजित करण्यात आलेला हा महाप्रसाद सोहळा पंचक्रोशीत आकर्षणाचा विषय ठरला.

🎯 अधिक मास निमित्ताने दररोज महाप्रसादाची सेवा. 

श्री परमपूज्य सदगुरु नराशाम महाराज मठ संस्थान, येवती येथे अधिक मासानिमित्त दि. १७ मे २०२६ ते १६ जून २०२६ या कालावधीत दररोज सकाळ व सायंकाळच्या वेळेस भाविकांसाठी महाप्रसादाची व्यवस्था करण्यात आली आहे. या सेवेतून दररोज पंचक्रोशीतील सुमारे पाच हजार भाविक लाभ घेत आहेत. ज्या भक्तांना पंगत देण्याची इच्छा आहे त्यांनी मठ संस्थानाशी संपर्क साधून या पुण्यकार्यात सहभागी व्हावे, असे आवाहन श्री परमपूज्य सदगुरु नराशाम महाराज येवतीकर यांनी केले आहे.

🔴मुख्य संपादक: श्री शहाजी वरखिंडे

मो. 9923072242