🛑 धुळवडमध्ये बेकायदेशीर खडी क्रेशर व उत्खननाचा धुमाकूळ; प्रशासनाचे जाणीवपूर्वक दुर्लक्ष ❓

♦️नागरीकांचा तिव्र संताप, तात्काळ कारवाईची मागणी 

शिवगर्जना न्यूज, 

नाशिक प्रतिनिधी : डॉ शाम जाधव 

 सिन्नर.धुळवड गाव ता. सिन्नर जिल्हा नाशिक धुळवड गाव परिसरात बेकायदेशीररित्या सुरू असलेल्या खडी क्रेशर व उत्खनन व्यवसायामुळे परिसरातील नागरिक त्रस्त झाले असून प्रशासनाच्या भूमिकेबाबत गंभीर प्रश्नचिन्ह निर्माण झाले आहे. दिवस-रात्र सुरू असलेल्या उत्खननामुळे पर्यावरणाचे मोठ्या प्रमाणात नुकसान होत असून धुळीचे प्रदूषण, प्रचंड आवाज व अवजड वाहनांची सततची वर्दळ यामुळे ग्रामस्थांचे आरोग्य धोक्यात आले आहे.स्थानिक नागरिकांच्या म्हणण्यानुसार संबंधित खडी क्रेशर व उत्खनन व्यवसायासाठी आवश्यक असलेल्या प्रदूषण नियंत्रण मंडळाच्या परवानग्या, महसूल विभागाची मंजुरी तसेच गौण खनिज उत्खननाचे नियम पायदळी तुडवले जात असल्याचा आरोप होत आहे. अनेक वेळा तक्रारी करून ही प्रशासनाकडून ठोस कारवाई होत नसल्याने संशयाचे वातावरण निर्माण झाले आहे.

विशेष म्हणजे, रात्रीच्या वेळेस मोठ्या प्रमाणावर उत्खनन सुरू असल्याची माहिती समोर येत असून महसूल विभाग, पोलीस प्रशासन व प्रदूषण नियंत्रण मंडळ यांच्या कार्यक्षमतेवर नागरिकांनी प्रश्न उपस्थित केले आहेत. परिसरातील शेती रस्ते खराब झाले असून धुळीमुळे पिकांचे नुकसान मोठ्या प्रमाणात होत असल्याचा आरोप शेतकऱ्यांनी केला आहे. 

ग्रामस्थांनी जिल्हाधिकारी नाशिक, पोलीस प्रशासन सिन्नर तसेच महाराष्ट्र प्रदूषण नियंत्रण मंडळ नाशिक यांनी तात्काळ समक्ष पाहणी करून संबंधित खडी क्रेशर व उत्खननावर कठोर कारवाई करून तात्काळ वीजपुरवठा बंद करावा अशी जोरदार मागणी केली जात आहे. 

अन्यथा नागरिक आंदोलनाचा इशारा देत असून, स्थानिक सामाजिक कार्यकर्त्यांनी देखील या प्रकरणाची उच्चस्तरीय चौकशी करून संबंधित अधिकाऱ्यांची जबाबदारी निश्चित करण्याची मागणी केली आहे. धुळवड गाव परिसरातील पर्यावरण व नागरिकांचे आरोग्य धोक्यात घालणाऱ्या या बेकायदेशीर व्यवसायावर प्रशासन नेमकी कधी कारवाई करणार, याकडे सर्व गावकरी यांचे लक्ष लागले आहे.

🔴मुख्य संपादक: श्री शहाजी वरखिंडे

मो. 9923072242