🛑तालयज्ञ २०२६ कार्यशाळेतून लय-तालाचे संस्कार; तबला-पखवाज साधनेची अनोखी पर्वणी.

🔴 तालयज्ञ २०२६ कार्यशाळेतून लय-तालाचे संस्कार; नांदेडमध्ये तबला-पखवाज साधनेची अनोखी पर्वणी. 

शिवगर्जना न्यूज, 

नांदेड : बाळासाहेब पांडे

नांदेड येथे आयोजित करण्यात आलेल्या ‘तालयज्ञ २०२६’ या तबला-पखवाज कार्यशाळेला विद्यार्थ्यांचा उत्स्फूर्त प्रतिसाद लाभला. तालयोगी तबला विद्यालयाचे संचालक व प्रख्यात तबलावादक प्रशांत गाजरे यांच्या मार्गदर्शनाखाली पार पडलेल्या या तीन दिवसीय कार्यशाळेत नांदेड, परभणी व लातूर येथील सुमारे ४० विद्यार्थ्यांनी सहभाग नोंदविला.

तबलावादनातील लय, ताल, गणित, व्याकरण आणि रियाज यांचा सखोल अभ्यास विद्यार्थ्यांना प्रत्यक्ष सरावातून करून घेण्यात आला. प्रारंभिक स्तरावरील विद्यार्थ्यांपासून ते अलंकार पर्यंतचे शिक्षण घेणाऱ्या विद्यार्थ्यांना एकत्रितपणे शिकविताना प्रशांत गाजरे यांनी दाखविलेली तळमळ आणि समर्पण उपस्थितांच्या मनाला भिडणारे ठरले.

कार्यशाळेत कायदा, रेला, तिहाई, दिव्य संकीर्ण, तिश्र जाती, चतुःश्र जाती, निकास, बल यांसारख्या तबल्यातील विविध पैलूंवर मार्गदर्शन करण्यात आले. विद्यार्थ्यांकडून तासनतास अक्षरांचा रियाज, लयकारीचे गणित आणि समेवर येण्याचे प्रत्यक्षिक करून घेताना निर्माण होणारा रोमांचक अनुभव सर्वांसाठी संस्मरणीय ठरला.

तबल्याचे गणित आणि व्याकरण हाच त्याचा आत्मा असून तो विद्यार्थ्यांपर्यंत पोहोचविणे हा कार्यशाळेचा मुख्य उद्देश असल्याचे आयोजकांनी सांगितले. तबला, पखवाज आणि कथ्थक नृत्य या तिन्ही कलांचा सुंदर संगम या कार्यशाळेत अनुभवायला मिळाला.

संगीत ही गुरु-शिष्य परंपरेतून हृदयातून हृदयात पोहोचणारी विद्या असून त्यासाठी दोघांचेही समर्पण महत्त्वाचे असते, असा सूर मान्यवरांनी व्यक्त केला. या उपक्रमामुळे तबल्याचा प्रचार-प्रसार निश्चितच वाढेल, असा विश्वासही व्यक्त करण्यात आला.

कार्यशाळे दरम्यान पं. संजय जोशी, सुरमणी प्रा. धनंजय जोशी, प्रा. डॉ. जगदीश देशमुख, अभिजीत आपस्तंभ, गिरीश देशमुख, नाट्यकर्मी सुहास देशपांडे, चेतन पांडे व सारिका पांडे आदी मान्यवरांनी भेट देऊन विद्यार्थ्यांचा उत्साह वाढविला.

समारोप कार्यक्रमास ज्येष्ठ पत्रकार व कलावंत बाळासाहेब पांडे मांजरमकर, राहेगावकर महाराज तसेच योगेश नेरळकर व राजेश नेरळकर उपस्थित होते. त्यांच्या हस्ते विद्यार्थ्यांना सहभाग प्रमाण पत्रांचे वितरण करण्यात आले. यावेळी पालकांचीही मोठ्या संख्येने उपस्थिती होती.

कार्यशाळेसाठी गिरीराज मंगल कार्यालयातील वातानुकूलित हॉल, विद्यार्थ्यांच्या निवासाची व्यवस्था तसेच चहा, नाश्ता व भोजनाची उत्कृष्ट सोय उपलब्ध करून दिल्याबद्दल योगेश व राजेश नेरळकर यांचे विशेष कौतुक करण्यात आले. त्रिदिवसीय कार्यक्रमाचे संचलन व आभार प्रदर्शन लय ताल विद्यालय सिडको नांदेड चे संचालक संजय देशपांडे मुगावकर यांनी केले.

🔴मुख्य संपादक: श्री शहाजी वरखिंडे. 9923072242