🔴अवघा रंग झाला एक … धुळवंडी निमित्त रंगोत्सवाची दिमाखदार मैफल.

🔴अवघा रंग झाला एक … नायगावात धुळवंडी निमित्त रंगोत्सवाची दिमाखदार मैफल. 

शिवगर्जना न्यूज, 

उपसंपादक निळकंठ जाधव

धुळवंडीच्या मंगल पर्वावर संतवाणीचा गजर आणि रंगोत्सवाची उधळण करत नायगावातील माणिक नगर परिसरात धुळवंड विशेष रंगा रंग कार्यक्रम दिमाखात रंगणार आहे. संतश्रेष्ठ संत तुकाराम यांच्या “अवघा रंग एक झाला, रंगी रंगला श्रीरंग” या अभंगवाणीचा भावार्थ जपत या सांस्कृतिक उपक्रमाने १२ वर्षांची तपपूर्ती पूर्ण केली असून १३ व्या वर्षाची रंगाची उधळण करत रौप्य महोत्सवी पर्वाकडे वाटचाल सुरू केली आहे.

भक्ती, साहित्य, लोकसंस्कृती आणि हास्यरसाचा संगम घडवणारा हा कार्यक्रम ३ मार्च (मंगळवार) रोजी सकाळी ८ ते दुपारी १ या वेळेत पार पडणार आहे. याचा प्रारंभ वैष्णव कुंज, जेष्ठ पत्रकार बाळासाहेब पांडे यांच्या निवासस्थानापासून होऊन मुख्य कार्यक्रम व्ही.सी. जाधव (मुस्तापूरकर) यांच्या निवासस्थानी रंगणार आहे.

या कार्यक्रमास विशेष अतिथी म्हणून उपविभागीय पोलिस अधिकारी, बिलोली- मा. श्री. श्याम पानेगावकर साहेब, राजकीय व सामाजिक क्षेत्रातील मान्यवर व्हॉईस ऑफ मिडिया पत्रकार बांधव यांच्या उपस्थिती हा रंगा रंग कार्यक्रम होणार आहे.

प्रमुख पाहुणे व साहित्यिक मेजवानी, प्रसिद्ध कथाकार राम तरटे (नांदेड) प्रसिद्ध साहित्यिक व कवी वीरभद्र मिरेवाड (नांदेड), काव्यरत्न प्रा. शंकर राठोड, वेंकट आनेराये, बालाजी पेटेकर, शंकर कवळे, यांच्यासह इतर नवोदित कवी व सप्तसुर साथी संगीतरत्न कलाकारांची सुरेल मैफल रंगणार आहे.

या वेळी भक्ती संगीत, लोकगीत, काव्यरंग, कथा अमृत आणि विनोदी चुटकुल्यांच्या माध्यमातून हास्य फवारे उडणार आहेत. माणिकनगर, गजानन नगर, सहयोग नगर, श्री नगर, बळवंत नगर, शिवम नगर, सुंदर नगर, वेंकटेश नगर, बेळगे नगर तसेच रंगारंग मित्रमंडळींच्या उत्स्फूर्त सहभागामुळे कार्यक्रमाची रंगत अधिकच वाढणार आहे. धुळवंडीच्या निमित्ताने रंग, रस आणि विचारांची उधळण अनुभवण्यासाठी नागरिकांनी मोठ्या संख्येने उपस्थित राहावे, असे आवाहन रंगा रंग मित्रमंडळ आयोजकांकडून करण्यात आले आहे. विशेष म्हणजे या कार्यक्रमात भक्ती, साहित्य आणि मैत्रीचा श्रीरंग खुलणार आहे. 

शिवर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)