🛑 निर्मितीमूल्य शिक्षणातून समाजाचा सर्वांगीण विकास शक्य… डॉ. किन्हाळकर

🔴 निर्मितीमूल्य शिक्षणातून समाजाचा सर्वांगीण विकास शक्य… डॉ. किन्हाळकर

गजानन विद्यालयात गुणवंतांचा सत्कार. 

शिवगर्जना न्यूज, 

देगलूर : प्रतिनिधी

सध्याच्या काळात वरवरचे शिक्षण देण्याच्या पद्धती रुढ होत असून ते येणाऱ्या काळासाठी चिंताजनक आहे, शिक्षणातून समाजाला निर्मितीमूल्य देता आले पाहिजे. विवेकशील, संस्कारित, शिस्तप्रिय, शिक्षकच आदर्श नागरिक घडवतात. यासाठी खोलवर रुजवणारे शिक्षण देणाऱ्या संस्थाचा वाटा राष्ट्र उभारणीत मोलाचे योगदान देऊ शकतात असे प्रतिपादन माजी गृहराज्यमंत्री डॉ. माधवराव किन्हाळकर यांनी केले.

तडखेल येथील गजानन माध्यमिक विद्यालयात माजी गुणवंत विद्यार्थ्यांचा सत्कार समारंभ बुधवार ता. ११ रोजी आयोजित करण्यात आला होता. यावेळी विविध क्षेत्रात कर्तृत्वाचा ठसा उमटवणाऱ्या विद्यालयातील ५० माजी विद्यार्थ्यांचा मान्यवरांच्या हस्ते सत्कार करण्यात आला.

यावेळी प्रसिद्ध साहित्यिका डॉ. वृषालीताई किन्हाळकर, माजी शिक्षण सभापती व्यंकटराव पाटील गोजेगावकर, माजी सभापती शिवाजीराव देशमुख बळेगावकर, संपादक केशव घोणसे पाटील, प्रल्हादराव उमाटे, गटविकास अधिकारी श्रीकांत बळदे, विवेक पाटील, सरपंच श्री. कठारे, संस्थेचे अध्यक्ष बालाजीराव इंगळे,  दै.सकाळ अनिल  कदम  ईतर मान्यवरांची उपस्थिती होती.

गुणवत्तेवर आधारित शिक्षण दिले गेले तरच समाजाला त्याचा फायदा होईल. स्वतःच्या उन्नतीपेक्षा इतरांना काय देता आले पाहिजे, हे जोपर्यंत राज्यकर्त्यात रुजणार नाही, तोपर्यंत समाजाचा सर्वांगीण विकास अशक्य असल्याचे सांगून डॉ. किन्हाळकर यांनी माझ्या पालकमंत्री पदाच्या काळात शिक्षणाबाबतीत नांदेड जिल्हा राज्यात खालून दुसऱ्या स्थानावर होता. बृहत आराखडा तयार करून जिथे शिक्षण पोहोचले नव्हते, अशा दुर्गम भागात ११० शाळांना मान्यता देण्याचे काम त्या काळात केले गेले, त्यातून गजानन ही शाळा ही उभी राहिली. आज येथील विद्यार्थी विविध क्षेत्रात स्वतःचा ठसा उमटवीत असलेल्या विद्यार्थ्यांच्या सत्काराला उपस्थित राहता आले ही समाधानाची बाब असल्याचे ते म्हणाले.

यावेळी माजी शिक्षण सभापती व्यंकटरावजी पाटील गोजेगावकर यांनी पारंपारिक शिक्षणापेक्षा नवीन तंत्रज्ञान आत्मसात करणारे शिक्षण देण्यासाठी आता समूहाने पुढे येण्याची गरज असल्याचे सांगितले. साहित्यिका डॉ. वृषालीताई किन्हाळकर यांनी इंग्रजी ही एक भाषा असून तिचा बाऊ न करता विद्यार्थ्यांनी सकस, सहज, सरस या त्रिसूत्रीचा वापर करून ज्ञान आत्मसात करावे. शिक्षणातून उत्तम माणूस बनुन आपले उचित ध्येय गाठण्याचे आवाहन विद्यार्थ्यांना केले.

ग्रामीण भागात शिक्षण कसदार आहे. पण पायाभूत सुविधा नाहीत म्हणून पालकांचा मराठी शाळा कडे बघण्याचा दृष्टिकोन बदलण्यासाठी त्यांच्यात जनजागृती करण्यासाठी शासन स्तरावरच रचनात्मक बदल होण्याची अपेक्षा माजी सभापती शिवाजीराव देशमुख बळेगावकर यांनी व्यक्त केली. 

संपादक केशव घोणसे पाटील यांनी गजानन विद्यालयाच्या रोपट्याचे आज वटवृक्षात रूपांतर होताना संस्थेने राबवलेल्या उपक्रमांचा गौरवपूर्ण उल्लेख केला.

प्रास्ताविकात संस्थेचे अध्यक्ष बालाजीराव इंगळे यांनी विद्यालयाने गुणवंत विद्यार्थ्यांसाठी राबवलेल्या विविध उपक्रमांची माहिती दिली. तर सचिव राजेश्वर अटकळे यांनी विद्यार्थ्यांना पुढील शिक्षणासाठी तांत्रिक शिक्षणाची या भागात गरज असल्याचे सांगितले यावेळी गुणवंत विद्यार्थ्यांनी आपले मनोगत व्यक्त केले.

कार्यक्रमाचे सूत्रसंचलन प्रा. दाचावार यांनी तर उपस्थितांचे आभार नागनाथ सुकाळे यांनी मानले.कार्यक्रमाच्या यशस्वीतेसाठी मुख्याध्यापक संजय अटकळे, एकताच्या मुख्याध्यापीका प्रियाताई इंगळे यांच्यासह शिक्षक शिक्षकेतर कर्मचाऱ्यांनी परिश्रम घेतले. राष्ट्रगीताने कार्यक्रमाची सांगता झाली.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)