🛑 नायगावात थरारक प्रसंग : पुरात अडकलेल्या विद्यार्थ्यांची तब्बल सात तासांनी सुटका

🔴 नायगावात थरारक प्रसंग : पुरात अडकलेल्या ग्रीन व्हॅली स्कूलच्या विद्यार्थ्यांची तब्बल सात तासांनी सुटका. 

शिवगर्जना न्यूज, 

नायगाव : बाळासाहेब पांडे

नायगाव, गुरुवारी रात्री व दिवसभर झालेल्या मुसळधार पावसाने नायगाव तालुक्यातील ग्रीन व्हॅली इंग्लिश स्कूलमध्ये शिकणाऱ्या दहा विद्यार्थ्यांचा जीव टांगणीला लागला होता. अतिवृष्टीमुळे आलेल्या पुरात अडकून हे सर्व विद्यार्थी हळदा व कोलंबी रस्त्यावरील नदीच्या पुरामध्ये तब्बल सात तास ट्रॅव्हल्समध्ये जीव मुठीत धरून बसले होते. अखेर पालक, ज्येष्ठ पत्रकार बाळासाहेब पांडे, नागेश महाराज हळदेकर पंडित पाटील हाळदेकर, स्थानिक कार्यकर्ते यांच्या मदतीने थरारक प्रयत्नांतून या लहान मुलांची सुटका करण्यात यश आले.

गुरुवारी सकाळी साडेआठ वाजता हळदा (ता. कंधार) येथून हे विद्यार्थी ग्रीन व्हॅली इंग्लिश स्कूल नायगाव तालुका नायगाव शाळेसाठी निघाले. मात्र कोलंबी जवळील पुलावरून जोरदार पाणी वाहू लागल्याने सचिन गोरे कोलंबीकर या ट्रॅव्हल्स चालकाने धोका टाळत गाडी थांबवली. परत हळदा गावाकडे जाण्याचा निर्णय घेतला असता, तो पर्यंत हळदा गावाजवळच्या दत्ता पाटील शिंदे यांच्या शेताजवळील नदीला पूर आल्याने दोन्ही बाजूने मार्ग बंद झाला. यामुळे चालकाने विद्यार्थ्यांना सुरक्षित ठेवण्यासाठी ट्रॅव्हल्स कंधार व नायगाव तालुक्याच्या सीमेवर उंच टेकडीवर नेऊन उभी केली.

दुपार उलटून गेली तरी काहीच उपाययोजना होऊ शकल्या नाहीत. विद्यार्थ्यांनी आपले डबे काढून तेथेच जेवण उरकले. उपजिल्हाधिकारी मॅडम व प्रभारी गट शिक्षणाधिकारी सूर्यवंशी सर यांनी घटनास्थळी धाव घेतली तरी नदीच्या पलिकडे अडकल्याने मदत पोहोचू शकली नाही. 

यावेळी कोलंबी केंद्राचे प्रभारी केंद्रप्रमुख डोमशेर सर यांनी ज्येष्ठ पत्रकार बाळासाहेब पांडे यांना संपर्क करून मदतीची मागणी केली. पांडे यांनी कोलंबी रहिवासी ट्रॅव्हल्स चालक मालक सचिन गोरे यांना संपर्क करून माहिती मिळवली, तात्काळ सिद्धतीर्थ धाम हळदा येथील सेवाधारी नागेश महाराज हळदेकर याना पांडे यांनी संपर्क केला नागेश महाराज व पंडित पाटील यांनी या कामी पुढाकार घेतला. त्यांनी कृजर गाडी मध्ये पालकांना घेऊन घटनास्थळी धाव घेतली. नदीच्या अलीकडील व पलीकडील दोन गाड्यांना रस्सी बांधून पालकांच्या मदतीने विद्यार्थ्यांची सुटका करण्याचे प्रयत्न हाती घेण्यात आले. तब्बल सात तासानंतर सुटका करण्यात यश आले आणि जवळपास आठ तासांनी सर्व बालकांना सुरक्षित बाहेर काढण्यात आले.

आपल्या लेकरांना सुखरूप पाहून पालकांच्या चेहऱ्यावरचा आनंद ओसंडून वाहत होता. या थरारक बचाव कारवाईबद्दल स्थानिकांनी व प्रशासन यांनी मदतकार्यकर्त्यांचे प्रयत्न करणाऱ्या सर्वांचे मनापासून कौतुक केले.

♦️नायगाव प्रशासनाच्या अजब कारभार. 

पाऊस नसताना सुट्टी, नदी नाले तुडूंब भरून वाहताना सुट्टी नाही. गुरुवारी रात्र भर एवढा पाऊस पडून ही नायगाव तहसीलदार व प्रशासन यांनी शाळेला सुट्टी जाहीर न केल्याने हा प्रसंग ओढवला अशी प्रतिक्रिया सर्व सामन्यातून व्यक्त होत आहे. नायगावच्या तहसीलदार श्रीमती गायकवाड मॅडम यांनी या पुढे तरी प्रसंगावधान ओळखून काळजी घ्यावी अशी अपेक्षा पालक वर्गातून व्यक्त होत आहे.

शिवगर्जना न्यूज संपादक : श्री शहाजी वरखिंडे बातम्या व जाहिराती साठी संपर्क 🗣📲📞(9923072242)