🛑 तो पर्यंत दलित साहित्य निर्मिती सुरु राहील… डॉ. बजरंग कोरडे

🔴 तो पर्यंत दलित साहित्य निर्मिती सुरु राहील… डॉ. बजरंग कोरडे. 

▪️प्रा. डॉ. बजरंग कोरडे यांचे मत

शिवगर्जना न्यूज,

पुणे : प्रतिनिधी

पुणे, भारतातील दलित साहित्याने भारतीय समाज व्यवस्थेच्या वैगुण्यांची लक्तरे जगाच्या वेशीवर रास्तपणे टांगलेली आहेत. त्यामुळे दलित विरोधी लोकांना दलित साहित्य प्रकार संपुष्टात यावा असे वाटत असावे. तर दलित प्रेमी पुरोगामी विचाराच्या लोकांनाही दलित साहित्याची गरज संपुष्टात यावी, असे वाटत असावे. कारण दलित साहित्याची गरज संपणे म्हणजेच दलित विरोधी मानसिकता व दलित विरोधी कारवाया पुर्णपणे व कायमस्वरुपी थांबणे होय. आणि दलितांना पुर्णतः अन्याय, अत्याचारमुक्त तसेच समानतेचे व सुरक्षिततेचे जीवन मिळणे होय. पण दुर्देवाने आजवर तरी दलित विरोधी कारवाया पुर्णतः थांबलेल्या नाहीत. त्यामुळे जोवर भारतीय दलितांवरील अन्याय, अत्याचार समूळ संपुष्टात येत नाहीत, तोवर दलित साहित्य निर्मिती सुरुच राहील असे मत सावित्रीबाई फुले पुणे विद्यापीठाच्या इंग्रजी विभागाचे सेवानिवृत्त प्रा. व माजी विभागप्रमुख डॉ. बजरंग कोरडे यांनी ऑनलाईन व्याख्यानात व्यक्त केले.

डॉ. कोरडे हे मुंबई विद्यापीठातील मालवीय मिशन टीचर ट्रेनिंग सेंटर या विभागाने आयोजित केलेल्या एका ऑनलाईन प्रबोधन उपक्रमात दलित साहित्यः भुत, वर्तमान व भविष्य या विषयावर बोलत होते.

डॉ. कोरडे पुढे म्हणाले की, भारतात दलितांवर होणारे प्राणघातक हल्ले व जीवघेणे अन्याय, अत्याचार आजही पुर्णतः थांबलेले नाहीत. उदा. हरियाणातील जझ्झर, राजस्थानातील एका शाळेतील एक दलित मुलगा त्याच्या शाळेत ठेवलेल्या पिण्याच्या पाण्याच्या माठातील पाणी पिला म्हणून त्याची प्रचंड मारहाण करुन झालेली हत्या कु. पायल तडवी व रोहित वेमुल्ला यांचा त्यांच्या शिक्षण संस्थांत झालेला असहय छळ व त्यामुळे त्यांनी केलेल्या आत्महत्या, उत्तर प्रदेशातील हाथरस व उन्नाव येथे दलित मुलींवर शारीरिक (लैंगिक) अत्याचार करुन त्यांच्या केलेल्या हत्या व त्यांच्या मृतदेहाची परस्पर लावलेली विल्हेवाट, दलित नवरदेव त्याच्या लग्नाच्या वरातीत घोड्यावर बसला म्हणून त्याचा झालेला छळ, एका दलित मुलाने केवळ मिश्या ठेवल्या म्हणून त्याच्यावर सवर्णाकडून झालेला अन्याय, तामिळनाडूतील एका दलित समाजातील भारतीय सैन्यात सेवा करणाऱ्या एका खेडयातील मुलाची प्रगती होत आहे ही गोष्ट न रुचल्यामुळे तेथील काही सवर्णांनी या सैनिकाची केलेली हत्या महाराष्ट्रात काही ठिकाणी दलितांनी गावच्या कार्यक्रमात वाद्ये वाजवायला नकार दिल्यामुळे त्यांच्यावर केले गेलेले अन्याय, अत्याचार तसेच काही दलित मुलांनी काही सवर्ण मुलींशी केलेल्या प्रेमामुळे किंवा विवाहामुळे संबंधित दलित मुलांच्या सवर्ण मुलीच्या नातेवाईकांकडून केल्या गेलेल्या हत्या, सर्वोच्च न्यायालय, उच्च न्यायालये, सचिवालये, केंद्रीय विद्यापीठे इ. विभागातील उच्चस्तरीय अधिकारी पदावर एस.सी.,एस.टी.,ओ.बी.सी. ई. संवर्गातील अत्यल्प किंवा मुळीच नसलेले प्रतिनिधीत्व इ. अशाच असंख्य घटनांवरुन हे सिध्द होते की आजही काही जातीयवादी, दलित विरोधी लोकांच्या डोक्यातून दलितांबद्दलचे पूर्वग्रह, गैरसमज पूर्णतः निघून गेलेले नाहीत. तसेच भारताच्या सर्वोच्च न्यायालयाचे माजी न्यायाधीश राहिलेले न्यायमूर्ती फली नरिमान यांनीही काही वर्षापुर्वी असे मत व्यक्त केले आहे की, आजही बहुसंख्य लोकांच्या मनातून अस्पृश्यता गेलेली नाही. त्यामुळे जोवर दलितांवरील अन्याय, अत्याचार, पुर्णतः व कायम स्वरुपी थांबणार नाहीत व त्यांना संपूर्ण स्वातंत्र्य, समता, बंधूता, न्याय मिळणार नाही तोवर दलित साहित्य निर्मिती सुरुच राहील असेही डॉ. कोरडे म्हणाले.

या कार्यक्रमास मालवीय मिशन टीचर ट्रेनिंग सेंटर संचालक, सदरील कार्यक्रमाचे आयोजक व मुंबई विद्यापीठाच्या इंग्रजी विभागाचे माजी विभाग प्रमुख प्रा. डॉ. शिवाजी सरगर व या प्रबोधन कार्यक्रमाचा प्रमुख भाग असलेले सहभागी प्राध्यापक बहुसंख्येने उपस्थित होते. 

शिवगर्जना न्यूज संपादक : श्री शहाजी वरखिंडे

बातम्या व जाहिरातीसाठी संपर्क 🗣📲📞(9923072242)