🛑 नायगाव तालुक्यात शाळा प्रवेशोत्सवाचा जल्लोष तर नवागतांचे धुमधडाक्यात स्वागत

🔴 नायगाव तालुक्यात शाळा प्रवेशोत्सवाचा जल्लोष; नवागतांचे धुमधडाक्यात स्वागत.

पहिल्याच दिवशी मोफत गणवेश व पाठ्यपुस्तकांचे वाटप; गटशिक्षणाधिकारी यांची ‘सप्तसूत्री’ शैक्षणिक वाटचाल.

शिवगर्जना न्यूज,

नायगाव : बाळासाहेब पांडे

नवीन शैक्षणिक वर्ष २०२६-२७ च्या प्रारंभी पंचायत समिती नायगाव अंतर्गत येणाऱ्या सर्व शाळांमध्ये शाळा प्रवेशोत्सव उत्साहात आणि जल्लोषमय वातावरणात साजरा करण्यात आला. इयत्ता पहिलीत प्रवेश घेणाऱ्या चिमुकल्या विद्यार्थ्यांचे विविध उपक्रमांच्या माध्यमातून धुमधडाक्यात स्वागत करून त्यांचा शाळेतील पहिला दिवस अविस्मरणीय करण्यात आला.

विद्यार्थी जीवनातील शाळेचा पहिला दिवस हा अत्यंत महत्त्वाचा आणि संस्मरणीय ठरावा, या उद्देशाने तालुक्यातील विविध शाळांनी आगळे-वेगळे उपक्रम राबविले. काही ठिकाणी बैलगाड्यांमधून विद्यार्थ्यांची भव्य मिरवणूक काढण्यात आली, तर काही शाळांमध्ये ढोल-ताशांच्या गजरात आणि लेझीम पथकाच्या तालावर चिमुकल्यांना शाळेत प्रवेश देण्यात आला. औक्षण करून तसेच रंगीबेरंगी फुगे व आकर्षक सजावटीने शाळा सुशोभित करून नवागत विद्यार्थ्यांचे उत्स्फूर्त स्वागत करण्यात आले.

यावेळी शाळेच्या पहिल्याच दिवशी विद्यार्थ्यांना मोफत शालेय गणवेश आणि पाठ्यपुस्तकांचे वितरण करण्यात आले. पहिल्या दिवसापासूनच विद्यार्थ्यांमध्ये शिक्षणाबद्दल ओढ निर्माण व्हावी आणि कोणताही विद्यार्थी शैक्षणिक साहित्यापासून वंचित राहू नये, या हेतूने पंचायत समिती नायगावने हा स्तुत्य उपक्रम राबविला. पुस्तक व गणवेश हाती पडताच विद्यार्थ्यांच्या चेहऱ्यावर आनंद झळकत असल्याचे चित्र सर्वत्र पाहावयास मिळाले.

दरम्यान, नूतन गटशिक्षणाधिकारी यांच्या संकल्पनेतून शैक्षणिक वर्ष २०२६-२७ साठी शैक्षणिक प्रगतीची दिशा निश्चित करणारी सात सूत्रांची ‘सप्तसूत्री’ राबविण्यात येणार आहे. यामध्ये वक्तशीरपणा, सेवाभाव व कर्तव्यनिष्ठा, विद्यार्थी गुणवत्ता व सर्वांगीण विकास, विद्यार्थी सुरक्षा व सकस पोषण आहार, ‘माझा पोशाख-माझा अभिमान’ ‘चला निसर्ग वाचवू या’ तसेच ‘माझी शाळा सुंदर शाळा, समृद्ध शाळा’ या महत्त्वपूर्ण बाबींचा समावेश करण्यात आला आहे.

या सप्तसूत्रीच्या माध्यमातून विद्यार्थ्यांच्या सर्वांगीण विकासाचा नवा संकल्प शिक्षण विभागाने हाती घेतला असून, गुणवत्तापूर्ण व मूल्याधिष्ठित शिक्षणाची दिशा या उपक्रमातून निश्चित होणार असल्याचा विश्वास व्यक्त केला जात आहे.

📍नूतन गटशिक्षणाधिकारी सतीश दर्शनवाड यांचे सप्तसूत्री नियोजन.

शैक्षणिक गुणवत्ता वृद्धीसोबतच विद्यार्थ्यांमध्ये शिस्त, पर्यावरण संवर्धनाची जाणीव, स्वच्छता, सुरक्षितता आणि शाळेविषयी आत्मीयता निर्माण करण्यावर भर देणारे हे सप्तसूत्री नियोजन आगामी काळात नायगाव तालुक्याच्या शैक्षणिक प्रगतीसाठी दिशादर्शक ठरणार आहे. ढोल-ताशांच्या गजरात चिमुकल्यांचे स्वागत; नायगावात शाळा प्रवेशोत्सवाचा जल्लोष पुस्तक, गणवेश अन् आनंदाची उधळण; नायगाव तालुक्यात प्रवेशोत्सव उत्साहात.

‘सप्तसूत्री’ च्या दिशेने नायगाव शिक्षण विभागाची वाटचाल. नवागतांचे अविस्मरणीय स्वागत शाळेच्या पहिल्याच दिवशी चिमुकल्यांवर प्रेमाचा वर्षाव; प्रवेशोत्सवाने रंगली शाळा.

🔴मुख्य संपादक: श्री शहाजी वरखिंडे

मो. 9923072242