🌲 जीवन सुंदर आहे 🌲

           🌲  जीवन  सुंदर  आहे  🌲 

शिवगर्जना न्यूज, 

🎯 प्रा.समिंदर निवृत्तीराव शिंदे लातूर. 

जीवन हे दोन घडीचा डाव असून त्यात मन भरून जगावे लागते. आणि सुख दुःखाच्या हिंदोळ्यावर पुन्हा पुन्हा झुलावे लागते. आपल्या जीवनात कधीच सुख कायम राहू शकत नाही किंवा दुःखही कायम राहत नाही. त्यामुळे माणसाने आपल्या जीवनात दुःखी किंवा निराशावादी जीवन जगू नये. आपल्याला आपल्या जीवनात अमृत मिळाले नाही म्हणून निराश होऊन विष प्राशन करायचे नसते. जीवनाच्या मार्गावर चालत असताना त्यात अनेक चढ आणि उतार येतात. त्यालाच जीवन असे नाव आहे. त्यात सुखाचे क्षण कमी असून दुःखाचे क्षण अधिक असतात. दुःख वाट्याला आले तरी जीवनात खचून न जाता परत जोमाने प्रयत्न करावे.

आपल्याला जीवन हे एकदाच मिळत असून ते फार सुंदर आहे. त्यात जीवनाच्या मार्गातील काटे बाजूला सारून सुंदर फुले वेचावित. फुले वेचताना काटे रूततात तरी परंतु आपण पुन्हा खळखळून हसावे. हेच तर सुखी, आनंदी, समाधानी जीवनाचे खरे रहस्य आहे. कोणी काही आपल्याबद्दल बोलले म्हणून आपले जीवन थांबत नाही. माणसाने नेहमी आपल्या मनात सकारात्मक विचार मनात ठेवून प्रयत्न करायचे असतात. उशिरा का होईना त्याचे फळ आपल्याला नक्कीच मिळते. जीवनात माणसाला अनेक अडचणी येतात. अडचणी आल्या म्हणून खचून जायचे नाही तर उलट जोमाने त्यावर मात करून जीवनात यशस्वी व्हायचे असते.

माणसाच्या जीवनाचा मार्ग हा कधीच सोपा नसतो. आणि जीवन जगत असताना आपण एकटेच पुढे न जाता सर्व समाजाला सुध्दा पुढे घेऊन गेले पाहिजे. तरच समाजाचा पण विकास होतो आणि ते चांगले काम आपल्या व समाजाच्या उपयोगी पडले पाहिजे. म्हणून म्हटले आहे की मानवी जीवन सुंदर आहे.

तूच तुझ्या जीवनात

फुलव आता सुंदर बाग

कर चांगले कार्य मानवा

तूच तुझ्या कर्तृत्वाला जाग।।