🔴 विकास म्हणजे काय रे भाऊ ….

🔴 विकास म्हणजे काय रे भाऊ ….

शिवगर्जना न्यूज, 

किनवट प्रतिनिधी : अनिल बंगाळे 

भारत देश स्वतंत्र्याचा अमृत महोत्सव साजरा करत असताना म्हणजेच देशाच्या स्वातंत्र्याला ७५ वर्षे पूर्ण झाल्यानंतर. १५ व्या विधानसभेला सामोरे जाताना किनवट माहूर विधानसभा क्षेत्राची गाडी मात्र आजही वीज, पाणी, पायाभूत सुविधा आणि रस्त्या मध्येच अडकली. बेरोजगारांच्या हाताला काम मिळेल, शेतकऱ्यांच्या शेती मालावर प्रक्रिया होऊन त्यांना चांगला मावेजा मिळेल, शेतकऱ्याचे उत्पन्न वाढण्यासाठी मदत होईल किंवा पर्यटन क्षेत्राला चालना मिळून इथल्या तरुणांना इतरत्र रोजगारासाठी भटकावे लागणार नाही असा कोणताही उद्योग या आदिवासी बहुल विधानसभा क्षेत्रात आणण्यास आज पर्यंतचे राजकारणी पूर्ण पणे अपयशी ठरलेले आहेत. या मतदारसंघात डझन भर उमेदवार गुडघ्याला बाशिंग बांधून आमदारकीचे स्वप्न बघत आहेत परंतु या भागाचा शाश्वत सर्वांगीण विकास कसा होईल याचे कुणालाच सोयर सुतक नाही. त्यामुळे ग्रामीण भागातील मतदाराला विकास म्हणजे काय रे भाऊ, असा प्रश्न पडलेला असून या भागात तरुणांच्या हाताला काम देणार आहे एखादा प्रकल्प म्हणजे एक स्वप्नच राहिले काय असे वाटत आहे.

भारतामध्ये इंग्रजांनी जवळपास १५० वर्षे राज्य केले. गुलामगिरीत असतानाही इंग्रजांनी राबविलेल्या अनेक योजना, प्रकल्प आजही चांगल्या अवस्थेत उभे आहेत. स्वातंत्र्य प्राप्तीनंतर देशाचा आणि देशातील नागरिकांचा विकास सुरू झाला. देशामध्ये दळण वळणाच्या साधनांत आमूलाग्र बदल होत गेला. देशातील ८० टक्के जनता खेडे गावात रहाते. ग्रामीण भागातील जनतेच्या खेडेगावांचा विकास झाल्यास देशाचा विकास होईल, असे महात्मा गांधींनी म्हटले आहे. स्वातंत्र्य प्राप्तीला आता ६५ वर्षे उलटून गेली आहेत. तरी भारत देशातील घटनेतील तरतुदी नुसार स्थानिक स्वराज्य संस्थांपासून लोकसभेपर्यंत मतांच्या आधारे निवडणुका होत आहेत. ग्रामीण भागातील व्यक्तींचा विकास हा त्यांच्या कृषी, रोजगार, वीज, पाणी अशा प्रकारच्या मूलभूत प्राथमिक मूळ सुविधांवर अवलंबून आहे. याकरिता ग्रामपंचायत, पंचायत समिती, जि. प. ते थेट मंत्रालयापर्यंत विविध योजना आखल्या गेल्या आहेत मात्र शहरासह खेडे गावातील परिस्थिती भयानक अशीच आहे. गावामध्ये होणारे रस्ते, पाणी पुरवठा योजना, वीज पुरवठा या व्यतिरिक्त ग्रामीण भागात वेगळे उपक्रम राबविले गेले नाहीत. रस्ते किंवा इतर योजनेत टक्केवारी मुळे दुसऱ्या वर्षी रस्ता पहावयास मिळत नाही. त्यामुळे विकास म्हणजे काय रे भाऊ असे खेदाने म्हणावे लागत आहे.