🔴 बसमध्ये सापडलेला महागडा टॅब पोलिसांकडे; पांडुरंग सूर्यवंशीचा प्रामाणिकपणा चर्चेत.

🔴 बस मध्ये सापडलेला महागडा टॅब पोलिसांकडे सुपूर्द; वझरग्याच्या पांडुरंग सूर्यवंशीचा प्रामाणिकपणाचा आदर्श. 

शिवगर्जना न्यूज : देगलूर प्रतिनिधी

देगलूर : बस प्रवासादरम्यान सापडलेला महागडा टॅब स्वतःकडे न ठेवता तो पोलिसांकडे सुपूर्द करून वझरगा येथील शाळकरी विद्यार्थी पांडुरंग वसंत सूर्यवंशी याने

प्रामाणिकपणाचा आदर्श समाजासमोर ठेवला आहे. त्याच्या या कृतीचे पोलीस प्रशासनासह देगलूर तालुक्यात कौतुक होत आहे.

पांडुरंग सूर्यवंशी हा वझरगा येथील रहिवासी असून, तो देगलूर येथील मानव्य विकास विद्यालयात इयत्ता दहावीमध्ये शिक्षण घेत आहे. सोमवार, दि. ५ ऑक्टोबर रोजी शाळा सुटल्यानंतर बसने घरी परतत असताना त्याला बसच्या सीटवर एक महागडा टॅब बेवारस अवस्थेत आढळला.

टॅब सापडल्यानंतर कोणत्याही आमिषाला बळी न पडता तो मूळ मालकाला परत मिळावा, या उद्देशाने पांडुरंगने तो सुरक्षित ठेवला. घरी पोहोचल्यानंतर त्याने ही माहिती आपल्या कुटुंबीयांना दिली.

त्यानंतर मंगळवारी सकाळी पांडुरंगने आपले वडील वसंत सूर्यवंशी यांच्यासह उपविभागीय पोलीस अधिकारी किरण पोपळघट यांच्या कार्यालयात जाऊन सदर टॅब परिविक्षाधीन पोलीस अधिकारी वैभव पडवळ यांच्या स्वाधीन केला. यावेळी DySP किरण पोपळघट यांची प्रमुख उपस्थिती होती.

पांडुरंगची प्रामाणिकपणा, सचोटी आणि सामाजिक भान पाहून DySP किरण पोपळघट व परिविक्षाधीन पोलीस अधिकारी वैभव पडवळ यांनी पांडुरंगसह त्याच्या पालकांचे विशेष कौतुक केले.

दरम्यान, सापडलेला टॅब पोलिसांकडे जमा करण्यात आला असून, ज्या नागरिकाचा हा टॅब गहाळ झाला असेल, त्यांनी आवश्यक कागदपत्रे व खात्रीशीर पुरावे घेऊन देगलूर पोलीस ठाण्याशी संपर्क साधावा, असे आवाहन पोलीस प्रशासनाच्या वतीने करण्यात आले आहे.

शाळकरी वयात पांडुरंगने दाखवलेल्या या प्रामाणिकपणामुळे वझरगा आणि देगलूर परिसरात त्याचे कौतुक होत आहे.

🔴मुख्य संपादक: श्री शहाजी वरखिंडे                     मो. 9923072242