🛑 खाजगी दवाखान्यात खर्च करण्याआधी शासकीय आरोग्य केंद्रांची माहिती घ्या.

🛑 खाजगी दवाखान्यात खर्च करण्याआधी शासकीय आरोग्य केंद्रांची माहिती घ्या!

‘निरोगी देगलूर, स्वस्थ देगलूर’साठी आरोग्य सभापती रत्नमाला कौरवार यांचा स्तुत्य उपक्रम; शहरातील ६ शासकीय आरोग्य केंद्रांची माहितीपत्रिका प्रकाशित

शिवगर्जना न्यूज, देगलूर प्रतिनिधी

सामान्य नागरिकांना शासकीय आरोग्य सुविधांची पुरेशी माहिती नसल्यामुळे अनेकदा विनाकारण मोठा खर्च करून खाजगी दवाखान्यांचा आधार घ्यावा लागतो. ही अडचण लक्षात घेऊन देगलूर नगर परिषदेच्या आरोग्य सभापती तथा नगरसेविका सौ. रत्नमाला रमेशराव कौरवार यांनी नागरिकांच्या हितासाठी स्तुत्य उपक्रम हाती घेतला आहे.

शहरातील विविध शासकीय आरोग्य केंद्रे, तेथील उपलब्ध सुविधा तसेच केंद्रांची वेळ यांची सविस्तर माहिती नागरिकांना सहज उपलब्ध व्हावी, यासाठी माहितीपत्रिका तयार करण्यात आली असून, तिचे अनावरण देगलूरचे आमदार मा. प्रतापराव पाटील चिखलीकर यांच्या शुभहस्ते करण्यात आले.

‘निरोगी देगलूर, स्वस्थ देगलूर’चा कृतीतून संदेश

‘निरोगी देगलूर, स्वस्थ देगलूर’ हा केवळ नारा न ठेवता तो प्रत्यक्ष कृतीतून राबविण्याचा प्रयत्न असल्याचे यावेळी सांगण्यात आले. देगलूर शहराची लोकसंख्या झपाट्याने वाढत असताना नागरिकांच्या आरोग्याच्या गरजाही वाढत आहेत. अशा परिस्थितीत नगर परिषद अंतर्गत कार्यरत असलेली शासकीय आरोग्य केंद्रे नागरिकांसाठी महत्त्वाची सुविधा ठरत आहेत.

मात्र ही केंद्रे नेमकी कुठे आहेत आणि तेथे कोणत्या आरोग्य सुविधा उपलब्ध आहेत, याची माहिती अनेक नागरिकांना नसते. त्यामुळे ही माहिती घराघरापर्यंत पोहोचावी, या उद्देशाने माहितीपत्रिका तयार करण्यात आली आहे.

देगलूर शहरात ६ ठिकाणी आरोग्य सेवा

माहितीपत्रिकेत शहरातील ६ प्रमुख शासकीय आरोग्य केंद्रांची माहिती देण्यात आली आहे.

यामध्ये नागरी आरोग्य वर्धिनी केंद्र क्र. १ – खाजाबाबा नगर, केंद्र क्र. २ – रामपूर रोड, केंद्र क्र. ३ – नरंगल रोड, केंद्र क्र. ४ – आनंद नगर, नागरी प्राथमिक आरोग्य केंद्र – जुनी नगर पालिका पोलीस स्टेशनजवळ तसेच हिंदू हृदयसम्राट बाळासाहेब ठाकरे आपला दवाखाना – सरकारी गोदामाजवळ यांचा समावेश आहे.

तपासण्या, औषधोपचार आणि विविध सेवा मोफत

या आरोग्य केंद्रांमध्ये ओपीडी सेवा, माता व बालसंगोपन, कुटुंब कल्याण सल्ला, लसीकरण, रक्त तपासणी व विविध लॅब टेस्ट, किशोरवयीन मुलांसाठी समुपदेशन आणि पोषण आहार मार्गदर्शन अशा विविध सुविधा उपलब्ध आहेत.

तसेच रक्तदाब, मधुमेह आणि कर्करोग तपासणी व प्राथमिक उपचार, क्षयरोग, कुष्ठरोग आणि हत्तीरोग यांचे निदान व उपचारही मोफत केले जातात.

या आरोग्य केंद्रांची वेळ सकाळी ९ ते सायंकाळी ५ वाजेपर्यंत आहे. तर कामगार वर्गाच्या सोयीसाठी सुरू करण्यात आलेला ‘आपला दवाखाना’ दुपारी २ ते रात्री १० वाजेपर्यंत सुरू राहतो. त्यामुळे दिवसभर कामावर असलेल्या नागरिकांनाही रात्री शासकीय आरोग्य सेवेचा लाभ घेता येणार आहे.

शासकीय आरोग्य सुविधा नागरिकांपर्यंत पोहोचणे गरजेचे – आमदार चिखलीकर

यावेळी बोलताना आमदार प्रतापराव पाटील चिखलीकर यांनी आरोग्य सभापती सौ. रत्नमाला कौरवार यांनी नागरिकांच्या हिताचा विचार करून राबविलेल्या या उपक्रमाचे कौतुक केले. शासनाच्या विविध योजना आणि सुविधा समाजातील शेवटच्या घटकापर्यंत पोहोचविणे हे लोकप्रतिनिधींचे महत्त्वाचे काम असल्याचे त्यांनी सांगितले.

दरम्यान, या माहिती पत्रिकेमुळे नागरिकांमध्ये शासकीय आरोग्य सुविधांबाबत जनजागृती होईल आणि जास्तीत जास्त नागरिकांनी मोफत शासकीय आरोग्य सेवेचा लाभ घ्यावा, असा विश्वास सौ. रत्नमाला कौरवार यांनी व्यक्त केला.

🔴मुख्य संपादक: श्री शहाजी वरखिंडे                  मो.  9923072242