🛑 कापूस उत्पादकांचा सन्मान; आधुनिक शेतीला सीसीआयचे बळ!

🔴 कापूस उत्पादकांचा सन्मान; आधुनिक शेतीलाही बळ! सीआयच्या ५६ व्या वर्धापन दिनानिमित्त कापूस वेचणी मशीनचे वितरण; CSR उपक्रमातून श्रेडर मशीन भेट.

शिवगर्जना न्यूज,

नायगाव : बाळासाहेब पांडे

भारतीय कापूस महामंडळाच्या (CCI) ५६ व्या वर्धापन दिनानिमित्त कापूस उत्पादक शेतकऱ्यांच्या कष्टाचा सन्मान करण्याबरोबरच आधुनिक कृषी तंत्रज्ञानाला चालना देण्यासाठी कृषी उत्पन्न बाजार समिती नायगाव बा.च्या उपबाजारपेठ कुंटूर येथे विविध उपक्रमांचे आयोजन करण्यात आले. यावेळी सीसीआय केंद्रावर सर्वाधिक कापूस विक्री करणाऱ्या कर्तृत्ववान शेतकऱ्यांचा कापूस वेचणी मशीन देऊन गौरव करण्यात आला.

कुंटूर येथील न्यू जय अंबिका जिनिंग अँड प्रेसिंग येथे आयोजित कार्यक्रमात कापूस उत्पादक शेतकऱ्यांचा सन्मान करण्यात आला. कापूस वेचणीसाठी आधुनिक यंत्राचा वापर केल्याने शेतकऱ्यांचा श्रम, वेळ आणि मजुरीचा खर्च कमी होण्यास मदत होणार आहे.

CSR उपक्रमातून श्रेडर मशीनचे वितरण

दरम्यान, CSR-2026 उपक्रमांतर्गत आनंदीमाई शेतकरी उत्पादक कंपनी, उमरीच्या संचालिका जाईताई देशमुख यांना श्रेडर मशीनचे वितरण करण्यात आले. शेतकरी उत्पादक कंपनीच्या माध्यमातून आधुनिक कृषी यंत्रसामग्रीचा वापर वाढविणे, शेतातील अवशेषांचे व्यवस्थापन करणे तसेच उत्पादन खर्च कमी करण्याच्या दृष्टीने या उपक्रमाचे महत्त्व असल्याचे यावेळी सांगण्यात आले.

कापूस खरेदीसाठी पूर्वनोंदणी सुरू

सन २०२६-२७ साठी सीसीआयच्या कापूस खरेदीची पूर्वनोंदणी १ सप्टेंबर ते ३१ ऑक्टोबर २०२६ या कालावधीत सुरू आहे. पूर्वनोंदणीसाठी शेतकऱ्यांच्या आधार कार्डला मोबाईल क्रमांक संलग्न असणे तसेच खरीप हंगाम २०२६ मध्ये कापूस पिकाचा पेरा असणे आवश्यक आहे.

शेतकऱ्यांनी आपला सातबारा अद्ययावत करून घ्यावा. आपल्या नावावर कापूस पिकाची नोंद असलेल्या सर्व गट क्रमांकांचे सातबारा उतारे ‘कापूस किसान’ ॲपवर अपलोड करून पूर्वनोंदणी प्रक्रिया पूर्ण करावी असे आवाहन कृषी उत्पन्न बाजार समिती नायगावच्या वतीने करण्यात आले.

आधुनिक यंत्रसामग्रीमुळे खर्चात बचत, कापूस वेचणी मशीन आणि श्रेडर मशीनच्या माध्यमातून शेतकऱ्यांना आधुनिक तंत्रज्ञानाची जोड मिळणार असून, श्रम, वेळ आणि उत्पादन खर्चात बचत होण्यास मदत होणार आहे. कापूस उत्पादकांच्या कष्टाचा सन्मान आणि आधुनिक शेतीला प्रोत्साहन देणारे हे उपक्रम शेतकऱ्यांसाठी प्रेरणादायी ठरले.

मान्यवरांची उपस्थिती

कार्यक्रमास रुपेश गंगाधरराव देशमुख कुंटूरकर, कृषी उत्पन्न बाजार समिती नायगावचे सचिव माधव कुलकर्णी, बाजार समितीचे कर्मचारी, सीसीआयचे अधिकारी तसेच आनंदीमाई शेतकरी उत्पादक कंपनीचे पदाधिकारी उपस्थित होते. भारतीय कापूस महामंडळाच्या वतीने प्रमोद मेश्राम, संजय खोडके, के. गोपी राजू आणि ध्रुबाज्योती यांची उपस्थिती होती. यावेळी कापूस उत्पादक शेतकऱ्यांनीही मोठ्या संख्येने सहभाग घेतला.

🔴मुख्य संपादक: श्री शहाजी वरखिंडे

मो. 9923072242