🛑 मी एकटाच मुंबईला येतोय आता तरी परवानगी नाकारणार का? — जरांगे पाटलाचे सरकारला थेट आव्हान

🛑 मी एकटाच मुंबईला येतोय आता तरी परवानगी नाकारणार का? — जरांगे पाटलाचे सरकारला थेट आव्हान. 

शिवगर्जना न्यूज,

छत्रपती संभाजीनगर : ज्योती हंगे

मराठा आरक्षणाच्या मागणीसाठी आंदोलन करणारे मनोज जरांगे पाटील यांनी मुंबई आंदोलनाबाबत सोमवारी मोठी घोषणा केली आहे. मंगळवारी आपण मोजक्या सहकाऱ्यांसह मुंबईकडे रवाना होणार असून, मराठा बांधवांनी मात्र आपापल्या ठिकाणी थांबावे, असे आवाहन त्यांनी केले आहे. त्यामुळे सरकार समोर आता नवा पेच निर्माण झाला आहे.

गणेशोत्सवाच्या पार्श्वभूमीवर मुंबईत मोठ्या प्रमाणावर गर्दी होऊ नये, तसेच कायदा-सुव्यवस्थेचा प्रश्न निर्माण होऊ नये, यासाठी मुख्यमंत्री देवेंद्र फडणवीस यांच्यासह सरकारमधील अनेक नेत्यांनी जरांगे पाटील यांना मुंबईत आंदोलनासाठी न येण्याचे आवाहन केले होते. मुंबई पोलिसांनीही मागील आंदोलनाचा अनुभव आणि न्यायालयाच्या आदेशांचा दाखला देत आंदोलनाला परवानगी नाकारली होती.

मात्र, जरांगे पाटील यांनी आता वेगळी भूमिका घेत “मी एकटाच मुंबईला जात आहे, आता तरी परवानगी नाकारणार का?” असा सवाल सरकारला केला आहे. त्यांच्या माहितीनुसार, ते दोन वाहने आणि दोन रुग्णवाहिकांसह अंतरवाली सराटीतून मुंबईकडे रवाना होणार आहेत.

सरकारवर गंभीर आरोप

गणेशोत्सवाच्या आडून मराठा समाजावर अन्याय केला जात असल्याचा आरोप जरांगे पाटील यांनी केला आहे. मराठा समाजावर दंगलीचा डाग लागावा, असा सरकारचा डाव असल्याचा गंभीर आरोपही त्यांनी केला. सरकारच्या भूमिकेला तोडीस तोड उत्तर देण्यासाठी आपण स्वतः मुंबईकडे जात असल्याचे त्यांनी स्पष्ट केले.

दरम्यान, मागील आंदोलनावेळी लाखो मराठा बांधव मुंबईत दाखल झाल्याने शहरातील वाहतूक आणि दैनंदिन व्यवहारांवर मोठा परिणाम झाला होता. या पार्श्वभूमीवर मुंबई उच्च न्यायालयानेही आंदोलनाबाबत कठोर भूमिका घेतली होती. त्यानंतर सरकारसोबत झालेल्या चर्चेतून तोडगा निघाल्यानंतर जरांगे पाटील यांनी आंदोलन मागे घेतले होते.

पुन्हा आंदोलनाची हाक; सरकारची परीक्षा

आता पुन्हा एकदा आपली फसवणूक होत असल्याचा आरोप करत जरांगे पाटील आक्रमक झाले आहेत. “हे आंदोलन शेवटचे असेल” असा इशारा देत त्यांनी सरकारवर दबाव वाढवला आहे. जरांगे पाटील मोजक्या सहकाऱ्यांसह मुंबईत पोहोचल्यानंतर त्यांच्या आंदोलनाला परवानगी द्यायची की नाही, याचा निर्णय सरकार आणि पोलिसांना घ्यावा लागणार आहे. दुसरीकडे, आंदोलन लांबल्यास मराठा बांधव मुंबईच्या दिशेने रवाना होण्याची शक्यता त्यांनी व्यक्त केली आहे.

त्यामुळे एकीकडे गणेशोत्सवातील कायदा-सुव्यवस्था राखण्याचे आव्हान आणि दुसरीकडे मराठा आरक्षणाचा प्रश्न, अशा दुहेरी कोंडीत राज्य सरकार सापडण्याची शक्यता आहे. जरांगे पाटलांचा हा नवा डाव सरकारसाठी कितपत अडचणीचा ठरतो, याकडे आता संपूर्ण राज्याचे लक्ष लागले आहे.

🔴मुख्य संपादक: श्री शहाजी वरखिंडे

मो. 9923072242