🟢 जुलूस-ए-मोहम्मदी उत्साहात; ‘नारे तकबीर, अल्लाहू अकबर’च्या घोषणांनी शहर दुमदुमले!

🟢 नायगावात जुलूस-ए-मोहम्मदी उत्साहात; ‘नारे तकबीर, अल्लाहू अकबर’च्या घोषणांनी शहर दुमदुमले! सामाजिक सलोख्याचे दर्शन.

शिवगर्जना न्यूज,

नायगाव: बाळासाहेब पांडे

इस्लाम धर्माचे अंतिम प्रेषित हजरत मोहम्मद पैगंबर यांच्या जयंतीनिमित्त ईद-ए-मिलादुन्नबीचा पवित्र सण शनिवारी (दि. २९) नायगाव शहरात मोठ्या उत्साहात आणि भक्तिभावाने साजरा करण्यात आला. यानिमित्त काढण्यात आलेल्या जुलूस-ए-मोहम्मदीमध्ये मुस्लिम समाजबांधवांसह लहान मुले, मुली, युवक तसेच नागरिक मोठ्या संख्येने सहभागी झाले होते. ‘नारे तकबीर, अल्लाहू अकबर’च्या घोषणांनी शहराचा परिसर दुमदुमून गेला.

दरवर्षीप्रमाणे यंदाही ईद-ए-मिलादुन्नबीच्या पार्श्वभूमीवर शहरात विविध धार्मिक कार्यक्रमांचे आयोजन करण्यात आले होते. सकाळी सुमारे नऊ वाजता जुलूस-ए-मोहम्मदीला उत्साहात सुरुवात झाली. धार्मिक घोषणा देत समाजबांधवांनी शिस्त बद्ध पद्धतीने शहरातील प्रमुख मार्गावरून मार्गक्रमण केले.

नांदेड-हैदराबाद मार्गावरून सुरू झालेला जुलूस हेडगेवार चौक, शिवाजी चौक, नगरपंचायत रोड मार्गे हजरत तवकल शहावली दर्गाह येथे पोहोचला. तेथे फातेहखानी, सलाम व दुवा करण्यात आल्यानंतर जुलूसची सांगता झाली.

जुलूसमध्ये सहभागी झालेल्या नागरिकांच्या स्वागतासाठी शहरातील विविध ठिकाणी समाज बांधवांकडून सरबत, फळे, चॉकलेट, बिस्किटे, केक तसेच पाण्याच्या बाटल्यांचे वाटप करण्यात आले. त्यामुळे संपूर्ण मार्गावर उत्साह, आपुलकी आणि बंधुभावाचे वातावरण निर्माण झाले होते.

जुलूस-ए-मोहम्मदी यशस्वी करण्यासाठी कमिटीचे पदाधिकारी, सदस्य तसेच नवयुवकांनी विशेष परिश्रम घेतले. शांतता व शिस्तीचे पालन करत हा धार्मिक सोहळा उत्साहात पार पडला. ईद-ए-मिलादुन्नबीच्या निमित्ताने नायगाव शहरात धार्मिक उत्साहासोबतच सामाजिक सलोखा आणि बंधुभावाचे दर्शन घडले. कार्यक्रमाच्या पार्श्वभूमीवर नायगाव पोलिस स्टेशन वतीने शहरात चोख पोलिस बंदोबस्त ठेवण्यात आला होता.

सामाजिक सलोखा जपत मान्यवरांचा सहभाग

नरसी : ईद-ए-मिलादुन्नबीच्या निमित्ताने नरसी येथे आयोजित जुलूस-ए-मोहम्मदीमध्ये विविध राजकीय व सामाजिक क्षेत्रातील मान्यवरांनी सहभागी होत मुस्लिम समाजबांधवांना ईद-ए-मिलादुन्नबीच्या मनःपूर्वक शुभेच्छा दिल्या. यावेळी सामाजिक सलोखा आणि बंधुभावाचा संदेश देण्यात आला.

यावेळी राष्ट्रवादी काँग्रेस पक्षाचे जिल्हाध्यक्ष शिवराज पाटील होटाळकर, ज्येष्ठ नागरिक केशवराव पाटील चव्हाण, तंटामुक्ती समितीचे अध्यक्ष हनमंतराव पा. चव्हाण, माजी जिल्हा परिषद सदस्य माधवअप्पा बेळगे, जिल्हा मध्यवर्ती बँकेचे संचालक श्रीनिवास पाटील चव्हाण, उपनगराध्यक्ष विजय पाटील चव्हाण, नगरसेवक पंकज पाटील चव्हाण, रंजित पाटील चव्हाण, सुधाकर पाटील शिंदे, सुरेश पा. कल्याण, पंढरीनाथ भालेराव, विठ्ठल बेळगे, संजय पाटील चव्हाण, माणिक पाटील चव्हाण, अजिंक्य पा. कल्याण यांच्यासह अनेक मान्यवरांनी जुलूस मध्ये सहभागी होत मुस्लिम समाजबांधवांना शुभेच्छा दिल्या.

🔴मुख्य संपादक: श्री शहाजी वरखिंडे

मो. 9923072242