🛑 शेतमजुरी करून घरी परतणाऱ्या महिलेचा एसटी बसच्या धडकेत दुर्दैवी मृत्यू

🔴 शेतमजुरी करून घरी परतणाऱ्या महिलेचा एसटी बसच्या धडकेत दुर्दैवी मृत्यू, रातोळी शिवारातील घटना.

शिवगर्जना न्यूज,

नायगाव, बाळासाहेब पांडे :

नायगाव तालुक्यातील मुखेड नरसी रोडवर रातोळी शिवारात शेतमजुरी करून आपल्या घरी परतत असलेल्या महिलेचा महाराष्ट्र राज्य मार्ग परिवहन महामंडळाच्या (एस टी) बसच्या धडकेत जागीच मृत्यू झाल्याची दुर्दैवी घटना मंगळवारी सायंकाळी घडली. या अपघातामुळे परिसरात हळहळ व्यक्त होत असून मृत महिलेच्या कुटुंबावर दुःखाचा डोंगर कोसळला आहे.

मिळालेल्या माहितीनुसार, नरसबाई शंकर कांबळे या नेहमी प्रमाणे शेतमजुरीचे काम आटोपून आपल्या घरी पायी जात असताना एमएच १४ एनई ७४८९ क्रमांकाच्या एसटी बसची त्यांना जोरदार धडक बसली. धडक इतकी भीषण होती की, त्यांचा घटनास्थळीच मृत्यू झाला. अपघाताची माहिती मिळताच परिसरातील नागरिकांनी घटनास्थळी धाव घेतली. घटनेमुळे परिसरात शोककळा पसरली होती.

घटनेची माहिती मिळताच मुखेड आगार आगार प्रमुख यांनी घटनास्थळी भेट देऊन परिस्थितीची पाहणी केली. त्यांनी मृत महिलेच्या कुटुंबीयांचे सांत्वन करत शासनाच्या नियमानुसार मिळणारी सर्व आर्थिक व शासकीय मदत उपलब्ध करून देण्यासाठी आवश्यक कार्यवाही करण्यात येईल, असे आश्वासन दिले.

दरम्यान, नायगाव पोलिस ठाण्याचे पोलीस अधिकारी बालाजी शिंदे व त्यांच्या सहकाऱ्यांनी तातडीने घटनास्थळी धाव घेत पंचनामा करून पुढील कायदेशीर प्रक्रिया सुरू केली. मृतदेह ताब्यात घेऊन शवविच्छेदनासाठी नायगाव व येथील ग्रामीण रुग्णालयात पाठविण्यात आला असून शवविच्छेदनानंतर मृतदेह नातेवाईकांच्या ताब्यात देण्यात येणार आहे.

या प्रकरणी नायगाव पोलिस ठाण्यात अपघाताची नोंद करण्याची प्रक्रिया सुरू असून अपघात नेमका कशामुळे झाला, याचा अधिक तपास पोलिसांकडून करण्यात येत आहे.

या दुर्दैवी घटनेमुळे रातोळी परिसरात शोककळा पसरली असून शेत मजुरी करून कुटुंबाचा उदरनिर्वाह करणाऱ्या महिलेच्या अकाली निधनामुळे ग्रामस्थांकडून हळहळ व्यक्त केली जात आहे.

🔴 मुख्य संपादक: श्री शहाजी वरखिंडे

9923072242