🛑 ४० वर्षांच्या प्रामाणिक सेवेनंतर भव्य नागरी सत्कार

🔴 निष्कलंक सेवेला मानाचा मुजरा! महाराष्ट्र जीवन प्राधिकरणातील ४० वर्षांच्या प्रामाणिक सेवेनंतर गंगाधरराव देशमुखांचा नायगावात भव्य नागरी सत्कार

शिवगर्जना न्यूज,

नायगाव : प्रतिनिधी बाळासाहेब पांडे

■ सेवानिवृत्तीनंतर समाजकार्यातही सक्रिय व्हा; शिवराज पाटील होटाळकर यांचा सल्ला

■ विविध क्षेत्रातील मान्यवरांच्या उपस्थितीत सेवाभावी कार्याचा गौरव

महाराष्ट्र जीवन प्राधिकरणात तब्बल ४० वर्षे निष्कलंक, प्रामाणिक व कर्तव्यदक्ष सेवा बजावून सेवानिवृत्त झालेल्या गंगाधरराव दिगंबरराव देशमुख (नरंगलकर) यांचा रविवारी नायगाव येथील अंबिका मंगल कार्यालयात भव्य सत्कार व कार्यगौरव सोहळा उत्साहात पार पडला. राजकीय, सामाजिक, शैक्षणिक, व्यापारी तसेच पत्रकारिता क्षेत्रातील मान्यवरांच्या उपस्थितीत झालेल्या या सोहळ्यात देशमुख यांच्या सेवाभिमान, सचोटी आणि कर्तव्यनिष्ठेचा गौरव करण्यात आला.

कार्यक्रमाच्या प्रारंभी सर्जेराव देशमुख यांनी प्रास्ताविक करताना आपल्या भावना व्यक्त केल्या. “आम्ही सर्वसामान्य कुटुंबातून पुढे आलो. माझे ज्येष्ठ बंधू गंगाधरराव देशमुख हे माझ्यासाठी वडिलांच्या जागी असून त्यांच्या संस्कारांमुळेच आज सामाजिक क्षेत्रात कार्य करण्याची प्रेरणा मिळाली. उपस्थित सर्व मान्यवरांचे प्रेम व आशीर्वाद आमच्या कुटुंबावर कायम राहावेत,” अशी भावना त्यांनी व्यक्त केली.

प्रमुख पाहुणे राष्ट्रवादी काँग्रेस नांदेड दक्षिण जिल्हाध्यक्ष शिवराज पाटील होटाळकर यांनी आपल्या मनोगतात गंगाधरराव देशमुख यांच्या सेवेचे कौतुक करताना सांगितले की, “चार दशके प्रामाणिकपणे शासकीय सेवा बजावणे ही मोठी उपलब्धी आहे.

सेवानिवृत्तीनंतर कुटुंबास वेळ देतानाच समाजकार्यातही सक्रिय सहभाग घ्यावा. त्यांच्या अनुभवाचा लाभ समाजाला होणे ही काळाची गरज आहे. देशमुख कुटुंबाची सामाजिक परंपरा पुढेही अशीच कायम राहो,” अशा शब्दांत त्यांनी शुभेच्छा दिल्या.

प्रकाश पाटील भिलवंडे यांनी आपल्या मनोगतात, “गंगाधरराव देशमुख यांनी निष्कलंक सेवेद्वारे आदर्श निर्माण केला आहे. त्यांनी केवळ संपत्ती नव्हे तर सुसंस्कारित कुटुंब घडविले असून त्यांचे पुढील आयुष्य सुख, समाधान आणि उत्तम आरोग्याने भरलेले जावो,” अशा भावना व्यक्त केल्या.

भाजप महिला आघाडी तालुकाध्यक्षा पल्लवीताई वडजे यांनी, “कोणत्याही अपेक्षेशिवाय चार दशके प्रामाणिकपणे सेवा करणारे गंगाधरराव देशमुख हे अनेकांसाठी प्रेरणादायी व्यक्तिमत्त्व आहे,” असे गौरवोद्गार काढले.

सकल मराठा समाजाकडून विशेष सन्मान

सकल मराठा समाज, नायगाव तालुक्याच्या वतीने गंगाधरराव देशमुख यांचा शाल, श्रीफळ व पुष्पगुच्छ देऊन विशेष सत्कार करण्यात आला. यावेळी बालाजी पाटील धनजकर, हणमंत पाटील शिंदे, गजानन पाटील कदम, चंद्रकांत पाटील पवार, श्रीहरी पाटील कदम आणि संतोष पाटील कदम यांची प्रमुख उपस्थिती होती.

“आई-वडिलांची पुण्याई आणि सर्वांचे प्रेमच माझी खरी संपत्ती”

सत्काराला उत्तर देताना गंगाधरराव देशमुख यांनी भावना व्यक्त करताना सांगितले, “आज मी जे काही आहे ते माझ्या आई-वडिलांच्या पुण्याईमुळे आणि आपणा सर्वांच्या प्रेम, सहकार्य व आशीर्वादामुळेच आहे. सेवाकाळात साथ देणाऱ्या सर्व अधिकारी, कर्मचारी, मित्रपरिवार आणि कुटुंबीयांचा मी मनःपूर्वक ऋणी आहे.”

या सोहळ्यास राष्ट्रवादी काँग्रेसचे नांदेड दक्षिण जिल्हाध्यक्ष शिवराज पाटील होटाळकर, एज्युकेशन सोसायटीचे सचिव केशवराव पाटील चव्हाण, हणमंतराव पाटील चव्हाण, प्रकाश पाटील भिलवंडे, भाजप प्रदेश सरचिटणीस श्रावण पाटील भिलवंडे, चंद्रकांत पाटील पवार, भाऊसाहेब पाटील चव्हाण, हणमंत पाटील शिंदे, संतोष पाटील कदम, गजानन पाटील कदम, पल्लवीताई वडजे, रवींद्र भिलवंडे, संजय पाटील चव्हाण, शिवाजी वडजे, शंकर पाटील कल्याण, जीवन पाटील चव्हाण, रमेश पाटील शिंदे, माणिकराव लोहगावे, राजेश भिलवंडे यांच्यासह देशमुख कुटुंबीय, व्यापारी, पत्रकार आणि नागरिक मोठ्या संख्येने उपस्थित होते.

कार्यक्रमाचे प्रास्ताविक सर्जेराव देशमुख यांनी केले, तर रणजित देशमुख यांनी उपस्थित मान्यवर व नागरिकांचे आभार मानले. भावनिक आणि उत्साहपूर्ण वातावरणात संपन्न झालेल्या या सोहळ्याने प्रामाणिक सेवेला समाजाकडून मिळालेला मानाचा मुजरा अधोरेखित केला.

🔴मुख्य संपादक: श्री शहाजी वरखिंडे

मो. 9923072242