🛑 देगलूर मधील बोगस डॉक्टरांवर चौकशीची मागणी — अमृत पाटील

🔴 देगलूर मधील बोगस डॉक्टरांवर चौकशीची मागणी — अमृत पाटील

शिवगर्जना न्यूज,

देगलूर : ता. प्रतिनिधी

देगलूर तालुक्यात बोगस व अनधिकृत वैद्यकीय व्यवसाय करणाऱ्यांचे प्रमाण वाढत असून, वैद्यकीय पदवी, नोंदणी अथवा शासनाची आवश्यक परवानगी नसतानाही काही व्यक्ती स्वतःला डॉक्टर म्हणवून रुग्णांवर उपचार करत असल्याची तक्रार आलूर येथील अमृत सोपनराव पाटील यांनी जिल्हा आरोग्य अधिकाऱ्यांकडे निवेदनाद्वारे केली.

तालुक्यात बोगस डॉक्टरांचा वाढता सुळसुळाट ही केवळ एका व्यक्ती विरोधातील तक्रार नसून ग्रामीण आरोग्य व्यवस्थेसमोरील गंभीर समस्या आहे. वैद्यकीय पदवी, नोंदणी किंवा आवश्यक परवानगी नसतानाही काही जण सर्रासपणे रुग्णांवर उपचार करत असल्याचे आरोप होत असतील, तर त्याची तातडीने आणि निष्पक्ष चौकशी होणे आवश्यक आहे.

ग्रामीण भागातील अनेक नागरिक अज्ञान, आर्थिक अडचणी किंवा सहज उपलब्धतेमुळे अशा अनधिकृत व्यक्तींकडे उपचारासाठी जातात. यामुळे त्यांच्या आरोग्याशी खेळ होण्याची शक्यता वाढते. चुकीचे निदान, अपुरे उपचार किंवा बेकायदेशीर शस्त्रक्रियांमुळे अनेकांचे जीव धोक्यात येऊ शकतात. त्यामुळे आरोग्य विभागाने केवळ तक्रारींची नोंद घेऊन थांबता कामा नये, तर प्रत्यक्ष तपासणी करून सत्य समोर आणणे गरजेचे आहे.

♦️झोलाछाप डॉक्टरांकडून उपचार घेतल्यास गंभीर आणि जीवघेणे परिणाम होतात. योग्य वैद्यकीय पदवी नसताना चुकीची औषधे देणे किंवा शस्त्रक्रिया करणे यामुळे रुग्णांचा जीव धोक्यात येतो.

तक्रारीतील आरोप खरे ठरल्यास संबंधितांवर कठोर कायदेशीर कारवाई करून असे दवाखाने तात्काळ बंद करण्यात यावेत. त्याचबरोबर तालुकाभरातील खासगी दवाखाने, क्लिनिक आणि वैद्यकीय व्यवसाय करणाऱ्यांची पात्रता, नोंदणी व परवान्यांची व्यापक पडताळणी करण्याची गरज आहे. त्यामुळे बोगस डॉक्टरांच्या जाळ्याला आळा बसू शकतो. आरोग्य हा प्रत्येक नागरिकाचा मूलभूत अधिकार आहे. त्या अधिकाराचे संरक्षण करणे ही प्रशासनाची जबाबदारी आहे. त्यामुळे या प्रकरणात आरोग्य विभागाने पारदर्शक, निष्पक्ष आणि तातडीची भूमिका घेतल्यास नागरिकांचा विश्वास अधिक दृढ होईल. अन्यथा बोगस डॉक्टरांच्या वाढत्या धाडसाला प्रशासनाचे मौनच खतपाणी घालत असल्याची भावना निर्माण होण्याची भीती नाकारता येणार नाही.

🔴मुख्य संपादक: श्री शहाजी वरखिंडे

मो. 9923072242