🔴 जिल्हा परिषद हायस्कूल येथे शाळा प्रवेशोत्सव उत्साहात

🔴 जिल्हा परिषद हायस्कूल घुंगराळा येथे प्रवेशोत्सव उत्साहात सजवलेल्या बैलगाडीतून विद्यार्थ्यांची भव्य मिरवणूक.

शिवगर्जना न्यूज,

नायगाव प्रतिनिधी : दिपक गजभारे

नायगांव : आज दिनांक १५ जून २०२६ रोजी घुंगराळा येथील जिल्हा परिषद हायस्कूल नवीन शैक्षणिक वर्षाची उत्साहपूर्ण सुरुवात करण्यात आली. शाळेच्या पहिल्याच दिवशी विद्यार्थ्यांचे आगळ्यावेगळ्या पद्धतीने स्वागत करण्यात आले.

शाळा प्रवेशोत्सवाच्या निमित्ताने प्रवेश पात्र विद्यार्थ्यांची गावातील मुख्य रस्त्यावरून आकर्षक सजवलेल्या बैलगाडीतून ढोल-वादकांच्या गजरात भव्य मिरवणूक काढण्यात आली. या मिरवणुकीमुळे संपूर्ण गावात उत्साहाचे आणि आनंदाचे वातावरण निर्माण झाले होते.

यावेळी नियोजित तपासणीसाठी नेमणूक करण्यात आलेले श्री.पुरजवार, ग्रामविकास अधिकारी, पंचायत समिती नायगाव हे मिरवणुकीत सहभागी झाले. त्यांनी विद्यार्थ्यांच्या उत्साहाचे कौतुक केले. त्यानंतर शाळेत उपस्थित विद्यार्थ्यांना पुस्तके व गणवेशाचे वाटप करण्यात आले. नवीन शैक्षणिक वर्षाच्या सुरुवातीला विद्यार्थ्यांच्या चेहऱ्यावर आनंद व उत्साह दिसून आला.

या शाळा प्रवेशोत्सव कार्यक्रमास मा.श्री.राजकुमार मुक्कावार, उपमुख्यकार्यकारी अधिकारी, सामान्य प्रशासन विभाग, नांदेड; मा.श्री.लकडे साहेब, कृषी विकास अधिकारी, जिल्हा परिषद नांदेड श्री.पुरजवार, ग्रामविकास अधिकारी, पंचायत समिती नायगाव तसेच प्रा.शाळा मुख्याध्यापक श्री.बोरगावे व्ही.व्ही.सर व सर्व शिक्षक वृंद उपस्थित होते.

यावेळी मा.श्री.राजकुमार मुक्कावार यांनी विद्यार्थ्यांच्या सहभागाचे कौतुक करून नवीन शैक्षणिक वर्षासाठी शुभेच्छा दिल्या. विद्यार्थ्यांनी मन लावून अभ्यास करून शाळेचे, पालकांचे व गावाचे नाव उज्ज्वल करावे, असे आवाहन त्यांनी केले. तसेच विद्यार्थ्यांच्या सर्वांगीण विकासासाठी शिक्षक घेत असलेल्या मेहनतीचे त्यांनी कौतुक केले.

घुंगराळा येथील जि. प. हायस्कूल ही गावाच्या शैक्षणिक विकासातील महत्त्वाची संस्था असून, ग्रामीण भागातील विद्यार्थ्यांना दर्जेदार शिक्षण, संस्कार व योग्य मार्गदर्शन देण्याचे कार्य सातत्याने करत आहे. शाळेतील मुख्याध्यापक व शिक्षकवृंद विद्यार्थ्यांच्या सर्वांगीण विकासासाठी प्रयत्नशील असून, अभ्यासासोबतच सांस्कृतिक, क्रीडा व विविध उपक्रमांमध्ये विद्यार्थ्यांना सहभागी करून त्यांच्या सुप्त गुणांना वाव देत आहेत.

या कार्यक्रमाची तयारी, नियोजन आणि विद्यार्थ्यांचा उत्स्फूर्त सहभाग पाहून उपस्थित मान्यवरांनी समाधान व्यक्त केले. हा कार्यक्रम यशस्वी करण्यासाठी प्रशालेचे मुख्याध्यापक श्री.बोरगावे व्ही.व्ही.सर, व सर्व शिक्षकवृंदांनी विशेष परिश्रम घेतले. ग्रामस्थ व पालकांनी शाळेच्या या अभिनव उपक्रमाचे कौतुक करून मुख्याध्यापक व शिक्षकांचे अभिनंदन केले.

🔴मुख्य संपादक: श्री शहाजी वरखिंडे

मो. 9923072242