🛑 भाजप अनुसूचित जाती मोर्चा बैठक ठरली फसवी! आमदार राजेश पवारांची दांडी

🔴 भाजप अनुसूचित जाती मोर्चा बैठक ठरली फसवी! आमदार राजेश पवारांची दांडी. 

शिवगर्जना न्यूज, 

नायगाव प्रतिनिधी : बाळासाहेब पांडे

डॉ. बाबासाहेब आंबेडकर यांच्या १३५ व्या जयंतीनिमित्त नियोजनासाठी आयोजित भाजपाच्या अनुसूचित जाती मोर्चाच्या महत्त्वाच्या बैठकीकडे स्थानिक आमदार राजेश पवार यांनी पाठ फिरवल्याने कार्यकर्त्यांमध्ये तीव्र नाराजी उसळली आहे. लोकप्रतिनिधींच्या या गैरहजेरीमुळे बैठकीचा पूर्णतः फज्जा उडाल्याची चर्चा राजकीय वर्तुळात रंगली आहे.

नरसी येथील शासकीय विश्रामगृहात शनिवारी (दि.१२ एप्रिल) दुपारी पार पडलेल्या या बैठकीत नायगाव, देगलूर व बिलोली तालुक्यातील बोटावर मोजण्या इतके कार्यकर्ते उपस्थित होते. बैठकीस आमदार राजेश पवार, मोर्चाचे प्रदेश सरचिटणीस पंडित सूर्यवंशी तसेच जिल्हा सरचिटणीस पूनमताई पवार उपस्थित राहणार असल्याची चर्चा होती. मात्र, प्रत्यक्षात आमदारांनी दांडी मारल्याने कार्यकर्त्यांमध्ये संतापाची लाट उसळली.

दलित समाजाच्या प्रश्नांवर चर्चा करण्यासाठी आयोजित बैठकीकडेच लोकप्रतिनिधींनी दुर्लक्ष केल्याने कार्यकर्त्यांनी उघड नाराजी व्यक्त केली. रिपब्लिकन पक्षाचे नेते व राज्यसभा सदस्य रामदास आठवले यांच्या पाठबळावर निवडून आलेल्या आमदारांनी अशा बैठकीकडे पाठ फिरवणे हे अत्यंत खेदजनक असल्याची प्रतिक्रिया काही कार्यकर्त्यांनी उघड पने भावना व्यक्त केली.

दरम्यान, माजी जिल्हा परिषद सदस्य लक्ष्मणराव ठक्करवाड व माणिकराव लोहगावे यांनी केवळ औपचारिक उपस्थिती लावून बैठक सोडल्याचीही चर्चा रंगली.

या बैठक मोर्चाचे जिल्हाध्यक्ष प्रा. मनोहर पवार यांच्या आयोजनाखाली पार पडली. बैठकीत बुथनिहाय डॉ. आंबेडकर जयंती साजरी करण्याचे नियोजन, संघटनात्मक आढावा व आगामी कार्यक्रमांवर चर्चा झाल्याचे सांगण्यात आले. मात्र, प्रमुख नेत्यांच्या अनुपस्थितीमुळे बैठकीचे गांभीर्यच कमी झाले असून, पक्षांतर्गत नाराजी उफाळून आल्याचे चित्र दिसत आहे.

अनुसूचित जाती मोर्चा बैठकीचा फज्जा उडाला?

भाजपाच्या अनुसूचित जाती मोर्चाच्या बैठकीला अपेक्षित प्रतिसाद न मिळाल्याने कार्यक्रमावर प्रश्नचिन्ह निर्माण झाले आहे. अवघ्या ४० ते ५० कार्यकर्त्यांची उपस्थिती असल्याची चर्चा असून, त्यामुळे बैठकीचा फज्जा उडाल्याची कुजबुज सुरू आहे.

अल्प उपस्थिती आणि वरिष्ठ नेत्यांची गैरहजेरी यामुळे पक्षाच्या संघटनात्मक ताकदीवरही प्रश्न उपस्थित होत असून, स्थानिक पातळीवर नाराजीचा सूर अधिक तीव्र होत आहे.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)