🛑 विहिरीत पडलेल्या काळविटाचा थरारक बचाव; वन विभागाची तत्पर धाव

🔴 विहिरीत पडलेल्या काळविटाचा थरारक बचाव; वन विभागाची तत्पर धाव, ग्रामस्थांचा मोलाचा हातभार, वन्य प्राण्याच्या जीवनाला आधार. 

शिवगर्जना न्यूज, 

नायगाव बाळासाहेब पांडे

नायगाव तालुक्यातील सावरखेड शिवारात पाण्याच्या शोधात आलेल्या एक काळविट विहिरीत पडल्याची घटना मंगळवारी उघडकीस आली. या घटनेत वन विभागाच्या कर्मचाऱ्यांनी वेळीच धाव घेत जीवाची पर्वा न करता केलेल्या बचावकार्यामुळे काळविटास सुखरूप बाहेर काढण्यात यश आले. यामुळे वन्य प्राण्याच्या जीवनात आनंद पसरला आहे.

सविस्तर, असे की सावरखेड परिसरातील शेतजमिनी मध्ये असलेल्या एका उघड्या विहिरीत पाण्याच्या शोधात आलेला काळविट घसरून पडला. ही बाब लक्षात येताच स्थानिक नागरिकांनी ता त्काळ वन विभागाला माहिती दिली. यानंतर वन विभागाचे कर्मचारी घटनास्थळी दाखल झाले.

यावेळी वनरक्षक गजानन कोतलवार तसेच वनमजूर कळककटवाड आदी कर्मचाऱ्यांनी परिस्थितीचे गांभीर्य ओळखून तातडीने बचावकार्य सुरू केले. विहिरीत जाळी टाकून आणि दोरांच्या साहाय्याने काळविटाला सुरक्षितरित्या वर काढण्यात आले. या कार्यात ग्रामस्थांनीही सक्रिय सहभाग घेतला, त्यामुळे बचावकार्य अधिक सुलभ झाले.

दरम्यान, सध्या परिसरात उन्हाचा तीव्रता वाढली असून जंगलातील नैसर्गिक पाणवठे आटल्यामुळे वन्यप्राणी पाण्यासाठी मानवी वस्तीकडे वळत असल्याचे दिसून येत आहे. यामुळे अशा घटनांची पुनरावृत्ती होण्याची शक्यता नाकारता येत नाही.

या पार्श्वभूमीवर वन्यप्राण्यांसाठी जंगलात व गावालगतच्या भागात पाण्याची व्यवस्था करण्याची गरज व्यक्त होत आहे. तसेच उघड्या विहिरींवर सुरक्षेच्या दृष्टीने जाळी किंवा झाकण बसवण्याची मागणीही ग्रामस्थांकडून करण्यात येत आहे.

नागरिकांच्या सावधानते मुळे व वन विभागाच्या तत्पर कारवाईमुळे एका निष्पाप जीवाचे प्राण वाचले असून, या कार्याबद्दल नागरिकांकडून कौतुक होत असून सर्वत्र समाधान व्यक्त करण्यात येत आहे.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)