🛑 घरकुल अभियंता तांबोळी कार्यमुक्त; प्रशासनाची कारवाई

🔴 घरकुल अभियंता तांबोळी कार्यमुक्त; पैशांच्या मागणीच्या आरोपाने नायगाव पंचायत समितीत खळबळ

लाभार्थ्यांकडून बिल काढण्यासाठी पैशांची मागणी केल्याचा आरोप; मुख्य कार्यकारी अधिकाऱ्यांच्या आदेशानंतर कारवाई

शिवगर्जना न्यूज

नायगाव : बाळासाहेब पांडे

नायगाव पंचायत समितीतील घरकुल योजनेच्या कामकाजावरून पुन्हा एकदा प्रश्नचिन्ह निर्माण झाले आहे. घरकुल योजनेतील लाभार्थ्यांचे बिल काढण्यासाठी पैशांची मागणी केल्याचा आरोप करणारी कथित ध्वनिचित्रफीत जिल्हा परिषदेच्या मुख्य कार्यकारी अधिकाऱ्यांपर्यंत पोहोचल्यानंतर या प्रकरणाची गंभीर दखल घेण्यात आली. त्यानंतर गटविकास अधिकारी प्रविण वानखेडे यांनी घरकुल अभियंता बरिदसाब आजमसाब तांबोळी यांना कार्यमुक्त केले आहे.

या कारवाईमुळे नायगाव पंचायत समितीतील घरकुल योजनेच्या कामकाजाची पुन्हा चर्चा सुरू झाली असून, केवळ संबंधित कर्मचाऱ्यावर कारवाई करून प्रकरण संपणार का, असा सवाल नागरिक व लाभार्थ्यांकडून उपस्थित केला जात आहे.

लाभार्थ्यांकडून पैशांची मागणी केल्याचा आरोप

रानसुगाव येथील काही घरकुल लाभार्थ्यांकडून बिल खात्यावर जमा करण्यासाठी पैशांची मागणी केल्याचे आरोप समोर आल्याचे सांगण्यात येत आहे. काही लाभार्थ्यांची रक्कम अद्याप खात्यावर जमा झाली नसल्याने त्यांना अडचणींचा सामना करावा लागत असल्याचेही सांगण्यात येते.

घरकुल योजनेच्या कामात अशा प्रकारच्या तक्रारी वारंवार होत असतील, तर त्याची सखोल चौकशी करून नेमकी वस्तुस्थिती समोर आणण्याची मागणी होत आहे.

कारवाईनंतरही प्रश्न कायम

तांबोळी यांच्यावर निलंबनाऐवजी कार्यमुक्तीची कारवाई करण्यात आल्याने या प्रकरणाची चौकशी कितपत पुढे जाते, याकडे नागरिकांचे लक्ष लागले आहे. या प्रकरणात संबंधित कर्मचाऱ्यांसोबतच देखरेख व नियंत्रणाची जबाबदारी असलेल्या अधिकाऱ्यांची भूमिकाही तपासावी, अशी मागणी होत आहे.

दरम्यान, यापूर्वी घरकुल योजनेच्या कामकाजाशी संबंधित काही कर्मचाऱ्यांवर तक्रारी झाल्याचा दावा करण्यात येत असून, त्या तक्रारींचीही चौकशी करण्याची मागणी नागरिकांकडून होत आहे. मात्र, संबंधित आरोपांची अधिकृत चौकशी झाल्यानंतरच त्यातील वस्तुस्थिती स्पष्ट होणार आहे.

लाभार्थ्यांच्या कामांची विशेष तपासणी करण्याची मागणी

घरकुल योजनेतील लाभार्थ्यांची मंजूर कामे, बिले, निधी वितरण आणि प्रत्यक्ष खात्यावर जमा झालेली रक्कम यांची तपासणी करण्यात यावी. लाभार्थ्यांकडून पैशांची मागणी झाल्याचे निष्पन्न झाल्यास संबंधितांवर नियमानुसार कारवाई करावी, तसेच संपूर्ण प्रकरणाची सखोल चौकशी करून जबाबदारी निश्चित करावी, अशी मागणी लाभार्थी व नागरिकांकडून होत आहे.

सखोल चौकशीची मागणी

घरकुल योजनेतील सर्व लाभार्थ्यांची बिले, निधी वितरण आणि खात्यावर जमा झालेल्या रकमांची तपासणी करावी. पैशांची मागणी केल्याच्या आरोपांची निष्पक्ष चौकशी करून दोषी आढळणाऱ्यांवर नियमानुसार कारवाई करावी, तसेच देखरेख व नियंत्रणाची जबाबदारी असलेल्या अधिकाऱ्यांची भूमिकाही तपासावी, अशी मागणी होत आहे.

🔴मुख्य संपादक: श्री शहाजी वरखिंडे                  मो. 9923072242