🔴 ‘वसुधैव कुटुंबकम्’ चा संदेश बासर यात्रेतून भक्तांच्या मनामनात रुजतोय.

🔴 ‘वसुधैव कुटुंबकम्’चा संदेश बासर यात्रेतून भक्तांच्या मनामनात रुजतोय.

ह.भ.प. मधुसूदन महाराज कापसीकर; वसंत सुगावे यांच्या पुढाकारातून हिंदोळा-बासर वाहन दिंडीचे घुंगराळ्यात उत्साहात स्वागत

शिवगर्जना न्यूज,

नायगाव : बाळासाहेब पांडे

‘वसुधैव कुटुंबकम्’ ही संकल्पना केवळ विचारांपुरती मर्यादित न राहता यात्रा, दिंडी आणि भक्तीच्या माध्यमातून भक्तांच्या मनामनात रुजत आहे. अशा धार्मिक यात्रांमुळे समाजात एकोपा, बंधुभाव आणि आध्यात्मिक संस्कार वाढीस लागतात, असे प्रतिपादन ह.भ.प. भागवताचार्य मधुसूदन महाराज कापसीकर यांनी केले.

हिंदोळा (ता. लोहा) येथील भक्त आश्रम संचलित श्रीक्षेत्र बासर वाहन दिंडीचे घुंगराळा येथे राष्ट्रवादी काँग्रेस पक्षाचे प्रदेश सरचिटणीस वसंत सुगावे पाटील यांच्या पुढाकारातून उत्साहात स्वागत करण्यात आले. यावेळी दिंडीतील कीर्तनकार, महाराज व वारकऱ्यांचा सत्कार करण्यात आला. उपस्थित भाविकांसाठी महाप्रसादाचेही आयोजन करण्यात आले होते.

यावेळी बोलताना ह.भ.प. मधुसूदन महाराज कापसीकर यांनी बासर यात्रेचे महत्त्व विशद केले. ही यात्रा २६ वर्षांचा टप्पा पूर्ण करून सुवर्ण महोत्सवाच्या दिशेने वाटचाल करीत आहे, अशी माहिती त्यांनी दिली. विविध गावांमधून वारकरी एकत्र येऊन भक्तिभावाने यात्रेत सहभागी होतात. या माध्यमातून परस्परांतील नाते दृढ होत असून ‘वसुधैव कुटुंबकम्’चा व्यापक संदेश समाजापर्यंत पोहोचत असल्याचे त्यांनी सांगितले.

या धार्मिक सोहळ्यास ह.भ.प. चंद्रकांत महाराज लाठीकर, ह.भ.प. बालाजी महाराज गुडेवार यांच्यासह मान्यवरांनी उपस्थित राहून शुभेच्छा दिल्या.

यावेळी ह.भ.प. कानगुले महाराज बळीरामपूरकर, ह.भ.प. दत्ता महाराज वळसंगवाडीकर, ह.भ.प. भगवान महाराज शेलगावकर, ह.भ.प. व्यंकट महाराज माळकौठा, ह.भ.प. प्रभाकर महाराज मिस्त्री पिंपळगावकर, ह.भ.प. मुरलीधर महाराज लातूरकर, ह.भ.प. गोपाळ महाराज बळेगावकर, ह.भ.प. गंगाधर महाराज दरेगावकर, ह.भ.प. ओंकार महाराज टाकळीकर, ह.भ.प. प्रकाश महाराज रानसुगावकर, ह.भ.प. अनसाजी महाराज रानसुगावकर, ह.भ.प. तिप्पलवाड सर बरबडेकर, ह.भ.प. उद्धव महाराज रानसुगावकर, शरद महाराज कोळंबीकर यांच्यासह अनेक महाराज व वारकरी उपस्थित होते.

 सुमारे दीड हजार भाविकांची उपस्थिती

घुंगराळा येथे झालेल्या स्वागत सोहळ्यास रानसुगाव, बळेगाव, आंतरगाव, गंगनबीड, सावरखेड, मांजरम, कहाळा, हिप्परगा, रुई बु., निळेगव्हाण, मारताळा, करमाळा, कापसी, लाठी आदी गावांतील सुमारे एक हजार ते दीड हजार भाविक व वारकरी उपस्थित होते. मोठ्या संख्येने भाविक सहभागी झाल्याने संपूर्ण घुंगराळा परिसर भक्तिमय वातावरणाने भारावून गेला होता.

कार्यक्रमाचे प्रास्ताविक वसंत सुगावे पाटील यांनी केले, तर सूत्रसंचालन ज्येष्ठ पत्रकार बाळासाहेब पांडे यांनी केले. उपस्थित वारकरी व भाविकांसाठी वसंत सुगावे पाटील यांच्या वतीने महाप्रसादाचे वाटप करण्यात आले. कार्यक्रमाच्या यशस्वी आयोजनासाठी विविध मान्यवरांनी सहकार्य केले. शिवाजी पाटील ढगे यांनी आभार मानले.

🔴मुख्य संपादक: श्री शहाजी वरखिंडे                   मो. 9923072242