🛑 शिक्षणमंत्री दादाजी भुसे यांना ज्येष्ठ पत्रकार प्रल्हाद भंडारे दुगावकर यांचे निवेदन

🛑 शिक्षणमंत्री दादाजी भुसे यांना ज्येष्ठ पत्रकार प्रल्हाद भंडारे दुगावकर यांचे निवेदन.

शिवगर्जना न्यूज,

नायगाव : बाळासाहेब पांडे

महाराष्ट्रातील जिल्हा परिषद शाळांची शैक्षणिक गुणवत्ता उंचावून ग्रामीण भागातील विद्यार्थ्यांना आधुनिक व दर्जेदार शिक्षणाच्या समान संधी उपलब्ध करून देण्यासाठी राज्य शासनाने विशेष सुधारणा उपक्रम राबवावा, अशी मागणी ज्येष्ठ पत्रकार प्रल्हाद भंडारे दुगावकर यांनी केली आहे. यासंदर्भातील निवेदन त्यांनी सोमवार, दि. २१ सप्टेंबर रोजी राज्याचे शिक्षणमंत्री दादाजी भुसे यांना दिले.

ग्रामीण भागातील विद्यार्थ्यांच्या शैक्षणिक जडणघडणीत जिल्हा परिषद शाळांची भूमिका अत्यंत महत्त्वाची आहे. मात्र, अनेक शाळांमध्ये आज ही पायाभूत सुविधा, डिजिटल साधने, प्रयोगशाळा, ग्रंथालय, स्वच्छतागृहे, क्रीडा साहित्य तसेच अन्य आवश्यक शैक्षणिक साधनांची कमतरता जाणवते. बदलत्या शैक्षणिक गरजा आणि तंत्रज्ञानाचा वाढता वापर लक्षात घेता जिल्हा परिषद शाळांचे सर्वंकष सक्षमीकरण करण्याची आवश्यकता असल्याचे निवेदनात नमूद करण्यात आले आहे.

‘जि.प. शाळा सुधारणा उपक्रम’ राबविण्याची मागणी

जिल्हा परिषद शाळांमध्ये गुणवत्तापूर्ण शिक्षणाबरोबरच ‘जिल्हा परिषद शाळा सुधारणा उपक्रम’ व्यापक स्वरूपात राबविण्यात यावा. त्याअंतर्गत शाळांच्या भौतिक सुविधा अद्ययावत करणे, डिजिटल शिक्षणाला चालना देणे, विद्यार्थ्यांसाठी सुसज्ज ग्रंथालये व प्रयोगशाळा उपलब्ध करून देणे, तसेच शिक्षकांना आधुनिक अध्यापन पद्धतींचे आवश्यक प्रशिक्षण देण्याची मागणी भंडारे यांनी केली.

विद्यार्थ्यांच्या कलागुणांना, क्रीडा कौशल्याला आणि सर्जनशीलतेला वाव देण्यासाठी शाळांमध्ये नियमितपणे विविध उपक्रम राबविण्यात यावेत. केवळ पाठ्यपुस्तकापुरते शिक्षण मर्यादित न ठेवता विद्यार्थ्यांच्या सर्वांगीण विकासावर भर देण्याची गरज असल्याचेही निवेदनात स्पष्ट करण्यात आले आहे.

ग्रामीण विद्यार्थ्यांनाही आधुनिक शिक्षणाची संधी

शहरी भागातील विद्यार्थ्यांप्रमाणेच ग्रामीण भागातील विद्यार्थ्यांनाही आधुनिक तंत्रज्ञानाधारित व दर्जेदार शिक्षणाची समान संधी मिळणे आवश्यक आहे. त्यासाठी जिल्हा परिषद शाळांना केवळ पारंपरिक शिक्षणाची केंद्रे न ठेवता ज्ञान, तंत्रज्ञान, कौशल्य आणि संस्कारांची केंद्रे म्हणून विकसित करण्यासाठी शासनाने दीर्घकालीन धोरण आखावे, अशी अपेक्षा व्यक्त करण्यात आली आहे.

ग्रामीण महाराष्ट्रातील शाळांच्या सुधारणेसाठी स्वतंत्र निधीची तरतूद, नियमित देखरेख आणि शैक्षणिक गुणवत्तेचे मोजमाप करणारी प्रभावी यंत्रणा उभारल्यास जिल्हा परिषद शाळांबाबत पालकांचा विश्वास अधिक दृढ होण्यास मदत होईल. त्यामुळे शासनाने या मागण्यांचा गांभीर्याने विचार करून ग्रामीण विद्यार्थ्यांच्या शैक्षणिक भवितव्यासाठी ठोस उपाययोजना कराव्यात, अशी मागणी ज्येष्ठ पत्रकार प्रल्हाद भंडारे दुगावकर यांनी केली.

🔴मुख्य संपादक: श्री शहाजी वरखिंडे                  मो. 9923072242