🛑 करडखेडमध्ये दिव्यांग बांधव आक्रमक; १५ दिवसांत लेखी उत्तर न दिल्यास बेमुदत धरणे आंदोलनाचा इशारा

🔴 करडखेडमध्ये दिव्यांग बांधव आक्रमक; १५ दिवसांत उत्तर न दिल्यास बेमुदत धरणे आंदोलनाचा इशारा.

शिवगर्जना न्यूज | देगलूर प्रतिनिधी

करडखेड : दिव्यांग, वृद्ध निराधार मित्र मंडळ महाराष्ट्रचे संस्थापक अध्यक्ष चंपतराव डाकोरे पाटील (कुंचेलीकर) यांच्या अध्यक्षतेखाली करडखेड परिसरातील दिव्यांग बांधवांची महत्त्वपूर्ण बैठक संपन्न झाली. यावेळी दिव्यांगांच्या विविध प्रश्नांवर सविस्तर चर्चा करण्यात आली.

जिल्हाधिकारी नांदेड यांनी दिव्यांगांच्या प्रश्नांबाबत १२ बैठका व १ सुनावणी घेऊनही प्रश्न जैसे थे असल्याबद्दल बैठकीत तीव्र नाराजी व्यक्त करण्यात आली. संबंधित प्रश्नांकडे दुर्लक्ष करणाऱ्या अधिकाऱ्यांवर दप्तर दिरंगाई कायदा व दिव्यांग कायद्यानुसार कारवाई करण्याची मागणी चंपतराव डाकोरे पाटील यांनी केली.

दिव्यांगांच्या प्रशासकीय प्रश्नांबाबत नांदेड जिल्ह्यातील ग्रामसेवकांना निवेदने देण्यात येणार असून, निवेदनातील मागण्यांवर १५ दिवसांत लेखी उत्तर व आवश्यक कार्यवाही न झाल्यास ग्रामपंचायत कार्यालयासमोर तीव्र आंदोलन करण्याचा निर्णय बैठकीत घेण्यात आला.

ग्रामपंचायतीकडे प्रमुख मागण्या

दिव्यांग कायदा २०१६ बाबत ग्रामसभा किंवा बैठका किती वेळा घेण्यात आल्या, त्याची नोंद; दिव्यांग प्रमाणपत्र व मोबाईल क्रमांक नोंदवहीची माहिती; सन २०१६ पासून दिव्यांगांसाठी राखीव ५ टक्के निधीचा विनियोग व लाभार्थ्यांची माहिती देण्याची मागणी करण्यात आली.

तसेच दिव्यांगांना व्यवसायासाठी शासकीय जागा किंवा गाळे किती जणांना देण्यात आले, रोजगार हमी योजनेत काम अथवा १०० दिवसांचा भत्ता किती जणांना मिळाला, किती दिव्यांगांना घरकुलाचा लाभ मिळाला व किती प्रस्ताव पंचायत समितीकडे पाठविण्यात आले, याची माहिती मागण्यात आली.

शासनाच्या विविध विभागांतील दिव्यांगांसाठीच्या ५ टक्के आरक्षणाचा लाभ किती जणांना मिळाला, तसेच दिव्यांगांना अपमानास्पद वागणूक, मानसिक अथवा शारीरिक त्रास, अतिक्रमण आदी प्रकरणांमध्ये दिव्यांग कायद्यानुसार किती कारवाई करण्यात आली, याचीही माहिती मागण्यात आली.

याशिवाय मतदान केंद्रावर जाऊन मतदान करू न शकणाऱ्या दिव्यांगांसाठी घरोघरी मतदानाची सुविधा व नोंदणीबाबत माहिती देण्यात आली का, याचाही तपशील ग्रामपंचायतीकडून मागविण्यात आला आहे.

१५ दिवसांची मुदत; अन्यथा आंदोलन

वरील मागण्यांबाबत १५ दिवसांत समाधानकारक लेखी उत्तर व आवश्यक कृती न झाल्यास कोणतीही पूर्वसूचना न देता ग्रामपंचायत कार्यालयासमोर तसेच जिल्हाधिकारी दालनात बेमुदत धरणे आंदोलन करण्यात येईल, असा इशारा चंपतराव डाकोरे पाटील यांनी बैठकीत दिला. या आंदोलनादरम्यान स्वेच्छामरणाच्या परवानगीसाठी मागणी करण्यात येणार असल्याचेही त्यांनी सांगितले.

या बैठकीस जिल्हाध्यक्ष मनोहर येरपुरवार, दक्षिण जिल्हा उपाध्यक्ष मगदुमसाब शेख ऊंद्रिकर, जिल्हा सचिव अनिल रामदिनवार, मुखेड तालुका अध्यक्ष गणपत गौड, राहुल हंगरगे, जाफर पठाण, बालाजी मजगे, मोहन गुजलवार, किसन ठाकूर, नरसिंग धुळेकर, शैलजा कोकणे, गंगाबाई चंदनवाडी, लक्ष्मीबाई चिंनगुलवार, गंगाबाई सांडगे, अंजनबाई घुळेकर, बाबू तोटरे, शिवा वंकलवार, रमेश वंकलवार, अमिर शेख, इंगळे यांच्यासह कार्यकर्ते उपस्थित होते.

मुख्य संपादक : श्री. शहाजी वरखिंडे                      मो. 9923072242