🛑 भौगोलिकदृष्ट्या नायगाव जिल्हा होणे काळाची गरज खा. रवींद्र चव्हाण

🛑 भौगोलिकदृष्ट्या नायगाव जिल्हा होणे काळाची गरज खा. रवींद्र चव्हाण

जिल्हा निर्मितीसाठी सर्वपक्षीय बैठकीत एकजुटीचा निर्धार; गरज पडल्यास आंदोलनाचा इशारा.

शिवगर्जना न्यूज

नायगाव : बाळासाहेब पांडे

नायगाव हे भौगोलिकदृष्ट्या मध्यवर्ती ठिकाण असून परिसरातील नागरिकांच्या प्रशासकीय सोयीसाठी नायगाव जिल्ह्याची निर्मिती होणे ही काळाची गरज आहे, असे प्रतिपादन खा. रवींद्र चव्हाण यांनी केले. नागरिकांचा वेळ आणि पैसा वाचविण्यासोबतच प्रशासन अधिक गतिमान करण्यासाठी नायगाव जिल्हा निर्मितीची मागणी शासनाकडे प्रभावीपणे मांडण्याची गरज असल्याचे त्यांनी सांगितले.

नायगाव जिल्हा निर्मितीच्या मागणीला व्यापक स्वरूप देण्यासाठी मराठवाडा जनता विकास परिषद, छत्रपती संभाजीनगरच्या नायगाव तालुका शाखेच्या पुढाकाराने १७ सप्टेंबर रोजी अंबिका मंगल कार्यालयात सर्वपक्षीय बैठकीचे आयोजन करण्यात आले होते. या बैठकीत पक्षीय मतभेद बाजूला ठेवून जिल्हा निर्मितीच्या मागणीसाठी सर्वपक्षीय एकजुटीचा निर्धार करण्यात आला.

प्रारंभी प्रा. बालाजी कोपलवार यांनी नायगाव जिल्हा निर्मितीचे भौगोलिक, प्रशासकीय आणि विकासात्मक महत्त्व मुद्देसूदपणे मांडले. नायगाव हे मध्यवर्ती ठिकाण असल्याने शेजारील तालुक्यांतील नागरिकांना प्रशासकीय कामांसाठी तुलनेने कमी अंतराचा प्रवास करावा लागेल. स्वतंत्र जिल्हा झाल्यास नागरिकांच्या प्रशासकीय अडचणी कमी होऊन विकासकामांना अधिक गती मिळू शकते, अशी भूमिका बैठकीत मांडण्यात आली.

स्वतंत्र जिल्ह्यामुळे जलसिंचन, रस्ते, शिक्षण, आरोग्य, कृषी आणि इतर विकासकामांचे नियोजन स्थानिक पातळीवर अधिक प्रभावीपणे करता येईल, असा दावा यावेळी करण्यात आला. त्यामुळे नायगाव जिल्हा निर्मितीचा प्रश्न केवळ प्रशासकीय नसून परिसराच्या सर्वांगीण विकासाशी संबंधित असल्याचे उपस्थितांनी स्पष्ट केले.

बैठकीस मुखेडचे माजी आमदार हणमंत पाटील बेटमोगरेकर, माजी नगराध्यक्ष देबडवार, मजपचे तालुकाध्यक्ष डॉ. हिंमगिरे, डॉ. श्रावण रापनवाड, बिलोलीचे शिवाजी पाटील पाचपिपळीकर, पत्रकार शंकर पवार, उमरीच्या रेखाताई गोळेगावकर, गोविंदराव कवळे, धर्माबादचे नागोराव पाटील रोशनगावकर यांच्यासह विविध पक्षांचे पदाधिकारी, लोकप्रतिनिधी, सामाजिक कार्यकर्ते, पत्रकार आणि नागरिक उपस्थित होते.

बसस्थानकासह स्थानिक प्रश्नांकडेही लक्ष द्या : होटाळकर

राष्ट्रवादी काँग्रेसचे जिल्हाध्यक्ष शिवराज पाटील होटाळकर यांनी नायगावच्या जिव्हाळ्याच्या प्रश्नांकडे लोकप्रतिनिधींनी लक्ष देण्याची मागणी केली. बसस्थानक, रस्ते, ओपन स्पेस आदी प्रश्नांचे योग्य नियोजन करण्याची गरज आहे, असे त्यांनी सांगितले. तालुक्याच्या विकासाला गती देतानाच नायगाव जिल्हा निर्मितीसाठी प्रयत्न करणे आवश्यक असल्याचे स्पष्ट करत, तालुक्याचा भूमिपुत्र या नात्याने या मागणीला आपला पाठिंबा राहील, असे होटाळकर यांनी सांगितले.

गरज पडल्यास आंदोलनाचा निर्धार

माजी सभापती सय्यद रहिमसेठ, गजानन पवार, शंकर कल्याण, भाऊराव मोरे, ज्येष्ठ पत्रकार बाळासाहेब पांडे यांच्यासह अनेकांनी नायगाव जिल्हा निर्मितीच्या मागणीला जाहीर पाठिंबा दिला. गरज पडल्यास आंदोलन करून ही मागणी शासनाच्या दरबारी लावून धरण्याचा निर्धार यावेळी व्यक्त करण्यात आला.

मांजरम ग्रामपंचायतीचा ठराव

नायगाव जिल्हा निर्मितीच्या मागणीला मांजरम ग्रामपंचायतीनेही पाठिंबा दर्शविला आहे. ग्रामपंचायतीच्या वतीने जिल्हा निर्मितीच्या मागणीला समर्थन देणारा ठराव व पत्र माजी चेअरमन निळकंठ शिंदे यांनी बैठकीत सादर केले.

शासनाकडे ठोस मागणी मांडणार

नायगाव जिल्हा निर्मितीच्या मागणीसाठी सर्वपक्षीय लोकप्रतिनिधींची सहमती घेऊन महाराष्ट्र शासनाकडे ठोस मागणी मांडण्याचा निर्धार बैठकीत करण्यात आला. राजकीय पक्ष, सामाजिक संघटना, ग्रामपंचायती, लोकप्रतिनिधी आणि नागरिकांनी एकत्रित येऊन या मागणीला बळ द्यावे, असे आवाहन मराठवाडा जनता विकास परिषदेच्या वतीने करण्यात आले.

कार्यक्रमास गोपाळ पाटील कदम, माधव आप्पा बेळगे, निर्मलाताई धुपेकर, मोहनराव धुपेकर यांच्यासह मजपचे जिल्हा व तालुका पदाधिकारी, विविध गावांचे सरपंच, लोकप्रतिनिधी, पत्रकार आणि नागरिक मोठ्या संख्येने उपस्थित होते. संचालन बालाजी शिंदे व दत्ता मामा येवते यांनी केले.

दरम्यान, नायगाव बसस्थानक उभारणीचा मुद्दाही आघाडीवर घेण्यात आला असून, या मागणीसाठी लोकप्रतिनिधींच्या घरासमोर आंदोलन करण्याचा निर्धार यावेळी व्यक्त करण्यात आला. राष्ट्रगीताने कार्यक्रमाची सांगता झाली.

जिल्हा निर्मितीसाठी आता गावागावांतून आवाज

नायगाव जिल्हा निर्मितीची मागणी केवळ बैठकीपुरती मर्यादित न ठेवता ती गावागावांत पोहोचविण्याचा निर्धार यावेळी करण्यात आला. विविध राजकीय पक्ष, सामाजिक संघटना, ग्रामपंचायती, लोकप्रतिनिधी आणि नागरिकांनी एकत्र येऊन शासनाकडे ही मागणी सातत्याने लावून धरावी, असे आवाहन करण्यात आले.

🔴मुख्य संपादक: श्री शहाजी वरखिंडे                  मो. 9923072242