🛑 बाळासाहेब वनंजेंना प्रशासनाचा दणका! सेवेतून कमी करण्याचा इशारा

🔴 बाळासाहेब वनंजेंना प्रशासनाचा दणका! सात दिवसांत सुधारा; अन्यथा सेवेतून कमी करण्याचा इशारा.

शिवगर्जना न्यूज,

नायगाव | बाळासाहेब पांडे

नायगाव पंचायत समितीतील अधिकारी बाळासाहेब वनंजे यांच्या कामकाजाबाबत सातत्याने होत असलेल्या तक्रारींची अखेर प्रशासनाने गंभीर दखल घेतली असून, त्यांना रीतसर कारणे दाखवा नोटीस बजावण्यात आली आहे. एवढ्यावरच न थांबता, पुढील सात दिवसांत कामकाजात ठोस सुधारणा न झाल्यास थेट सेवेतून कमी करण्याची कारवाई करण्यात येईल, असा कठोर इशारा गटविकास अधिकारी वानखेडे यांनी दिल्याने पंचायत समितीच्या वर्तुळात मोठी खळबळ उडाली आहे.

लाभार्थ्यांच्या कामांमध्ये होणारा विलंब, वारंवार पंचायत समितीच्या फेऱ्या माराव्या लागणे, नागरिकांची होत असलेली गैरसोय आणि कामकाजातील कथित अनियमिततेबाबत अनेक तक्रारी प्रशासनाकडे दाखल झाल्या होत्या. या पार्श्वभूमीवर वनंजे यांना गावनिहाय जबाबदाऱ्या निश्चित करून देण्यात आल्या असून, कोणत्या दिवशी कोणत्या गावात मुख्यालयी उपस्थित राहायचे याचे स्पष्ट वेळापत्रकही देण्यात आले आहे.

गटविकास अधिकारी वानखेडे यांनी स्पष्ट शब्दांत सांगितले की, नोटीस दिल्यानंतरही सात दिवसांत अपेक्षित सुधारणा दिसून आली नाही, तर कोणतीही दया न दाखवता कठोर प्रशासकीय कारवाई करण्यात येईल. आवश्यक असल्यास सेवेतून कमी करण्याचाही प्रस्ताव पुढे पाठविण्यात येईल. दरम्यान, पंचायत समितीतील एकूणच कामकाजाबाबत नाराजी व्यक्त करताना वानखेडे यांनी अधिकाऱ्यांना सुनावले. “मला घरकुलाचेच काम आहे की काय, अशी परिस्थिती निर्माण झाली आहे. यापुढे कोणताही अभियंता अथवा संबंधित अधिकारी कामात हलगर्जीपणा करणार असेल, काम वेळेत पूर्ण करणार नसेल, तर त्याच्यावर थेट सेवेतून कमी करण्याची कारवाई करण्यात येईल,” असा सज्जड इशारा त्यांनी दिला.

या कठोर भूमिकेमुळे पंचायत समितीतील अधिकारी व कर्मचाऱ्यांमध्ये धास्तीचे वातावरण निर्माण झाले असून, प्रशासन आता कामचुकारपणा खपवून घेणार नसल्याचे स्पष्ट संकेत मिळत आहेत. पुढील सात दिवसांत वनंजे यांच्या कामकाजात सुधारणा होते की प्रशासन प्रत्यक्ष कारवाईचा बडगा उगारते, याकडे लाभार्थी आणि नागरिकांचे लक्ष लागले आहे.

🎯 प्रसारमाध्यमांच्या वृत्तानंतर प्रशासनाची तातडीची हालचाल.

बाळासाहेब वनंजे यांच्या कामकाजाबाबत लाभार्थ्यांकडून सातत्याने तक्रारी होत होत्या. या तक्रारींना प्रसारमाध्यमांनी वाचा फोडल्यानंतर प्रशासनालाही अखेर जाग आली. त्यानंतर गटविकास अधिकारी वानखेडे यांनी संबंधित अधिकाऱ्याला नोटीस बजावत गावनिहाय जबाबदाऱ्या निश्चित केल्या आहेत. सात दिवसांत सुधारणा न झाल्यास कठोर कारवाईचा इशारा देण्यात आल्याने प्रशासनाने हे प्रकरण प्रतिष्ठेचे मानून कारवाईची प्रक्रिया सुरू केल्याचे स्पष्ट झाले आहे.

🔴मुख्य संपादक: श्री शहाजी वरखिंडे

मो. 9923072242