🛑 बालसंस्कार व युवक विकासासाठी कार्य करणाऱ्या ममता मसुरकर यांचा गौरव.

🛑 बालसंस्कार व युवक विकासासाठी कार्य करणाऱ्या ममता मसुरकर यांचा गौरव.

शिवगर्जना न्यूज,

ठाणे प्रतिनिधी : गुरुनाथ तिरपणकर

जागतिक पर्यावरण दिनाचे औचित्य साधून मराठी ग्रंथ संग्रहालय, ठाणे येथे आयोजित करण्यात आलेल्या ‘सर्वोत्तम व्यक्तिमत्त्व सन्मान सोहळा २०२६’ मध्ये विविध क्षेत्रांत उल्लेखनीय कार्य करणाऱ्या व्यक्तिमत्त्वांचा गौरव करण्यात आला. यामध्ये शैक्षणिक, सामाजिक व युवक विकास क्षेत्रातील उल्लेखनीय योगदानाबद्दल हॅप्पी हार्ट स्कूलच्या संचालिका सौ. ममता मसुरकर यांना सर्वोत्तम शैक्षणिक सेवा पुरस्कार २०२६ याने सन्मानित करण्यात आले.

यावेळी ज्येष्ठ अभिनेते दिलीप केदार यांनी आपल्या मनोगतात शिक्षण आणि संस्कार यांचे महत्त्व अधोरेखित करताना सांगितले की, “बालकांमध्ये चांगले संस्कार, सामाजिक जाणीव आणि नैतिक मूल्ये रुजविण्यासाठी कार्य करणाऱ्या व्यक्तिमत्त्वांचा गौरव होणे ही समाजासाठी अभिमानाची बाब आहे. आजची संस्कारित पिढी उद्याच्या सक्षम राष्ट्राची पायाभरणी करीत असते. अशा कार्यकर्त्यांचे योगदान समाजासाठी प्रेरणादायी ठरते.”

सौ. ममता मसुरकर या गेली अनेक वर्षे शैक्षणिक क्षेत्रात कार्यरत असून बालवयातील विद्यार्थ्यांच्या सर्वांगीण विकासासाठी सातत्याने प्रयत्नशील आहेत. त्यांनी उभारलेल्या शैक्षणिक संस्थेच्या माध्यमातून विद्यार्थ्यांमध्ये सुसंस्कृतपणा, शिस्त, आत्मविश्वास, नेतृत्वगुण आणि सामाजिक बांधिलकी यांचे संस्कार रुजविण्याचे कार्य सुरू ठेवले आहे. शिक्षणासोबतच विद्यार्थ्यांच्या मानसिक, बौद्धिक आणि सांस्कृतिक विकासाला प्राधान्य देणारी त्यांची कार्यपद्धती विशेष उल्लेखनीय मानली जाते.

तसेच या हॅपी हार्ट फाउंडेशन, ठाणे या संस्थेच्या संस्थापक-अध्यक्षा असून संस्थेच्या माध्यमातून युवक, महिला आणि विद्यार्थ्यांसाठी विविध उपक्रमांचे आयोजन केले जाते. व्यक्तिमत्त्व विकास शिबिरे, सामाजिक जनजागृती मोहिमा, शैक्षणिक मार्गदर्शन, सांस्कृतिक कार्यक्रम आणि युवकांना सकारात्मक दिशा देणारे अनेक उपक्रम त्यांनी यशस्वीपणे राबविले आहेत.

कार्यक्रमाच्या अध्यक्षस्थानी पारनेर पंचायत समितीचे माजी सभापती खंडोजी भुकन होते. त्यांनी आपल्या अध्यक्षीय भाषणात समाजात संस्कारक्षम आणि जबाबदार पिढी घडविण्यासाठी कार्य करणाऱ्या शिक्षक व सामाजिक कार्यकर्त्यांच्या योगदानाचे कौतुक केले. तसेच युवकांना योग्य दिशा देण्यासाठी अशा उपक्रमांची आवश्यकता असल्याचे मत व्यक्त केले.

या कार्यक्रमास व्यासपीठावर ‘जावई जोरात’ फेम दिगंबर गरुड, जयश्री ॲग्रोचे संचालक गणपतराव शिंदे, कार्यक्रमाचे स्वागताध्यक्ष व आयोजक प्रा. डॉ. बी. एन. खरात (युनिव्हर्सल युनिटी फाउंडेशन) तसेच निमंत्रक निर्णय राऊत (अध्यक्ष, आंबोली टुरिझम) यांची प्रमुख उपस्थिती लाभली होती.

महाराष्ट्रासह विविध राज्यांतील कलाकार, समाजसेवक, शिक्षणतज्ज्ञ, साहित्यिक, पर्यावरणप्रेमी आणि विविध सामाजिक संस्थांचे पदाधिकारी मोठ्या संख्येने या कार्यक्रमास उपस्थित होते. सौ. ममता मसुरकर यांनी शैक्षणिक आणि सामाजिक क्षेत्रात केलेल्या उल्लेखनीय कार्याबद्दल उपस्थित मान्यवरांनी त्यांचे अभिनंदन केले.

संस्कार, शिक्षण आणि सामाजिक बांधिलकी या त्रिसूत्रीच्या माध्यमातून समाजात सकारात्मक परिवर्तन घडवून आणण्याचे कार्य करणाऱ्या सौ. ममता मसुरकर यांचा सन्मान हा अनेकांसाठी प्रेरणादायी ठरल्याची भावना उपस्थितांनी व्यक्त केली.

🔴मुख्य संपादक: श्री शहाजी वरखिंडे

मो. 9923072242