🛑 शासकीय हमीभाव हरभरा खरेदी ठप्प; बारदाना टंचाईमुळे शेतकरी अडचणीत.

🔴 शासकीय हमीभाव हरभरा खरेदी ठप्प; बारदाना टंचाईमुळे शेतकरी अडचणीत

शिवगर्जना न्यूज, 

उपसंपादक : निळकंठ जाधव

नांदेड जिल्ह्यात नायगाव तालुक्यात मोकासदरा येथे शासकीय हमी भावाने हरभरा खरेदी सुरू असताना अचानक बारदाना (गोण्या) टंचाई निर्माण झाल्यामुळे खरेदी प्रक्रिया ठप्प झाल्याचे चित्र सध्या जिल्ह्यातील विविध खरेदी केंद्रांवर दिसून येत आहे. खरेदी नोंदणीची मुदत संपण्यापूर्वीच खरेदी बंद पडल्याने शेतकरी मोठ्या अडचणीत सापडले आहेत.

जिल्ह्यात मोठ्या प्रमाणावर शेतकऱ्यांनी हरभरा विक्रीसाठी नोंदणी केली होती. मात्र, आवश्यक बारदाना उपलब्ध नसल्यामुळे खरेदी केंद्रांनी हात टेकले असून, अनेक ठिकाणी खरेदी प्रक्रिया थांबविण्यात आली आहे. यामुळे हमी भावाने माल विक्री होईल की नाही, या संभ्रमात शेतकरी आहेत.

दरम्यान, खरेदी केंद्रांवर शेतकऱ्यांच्या लांबच लांब रांगा लागल्या असून, अनेक शेतकरी दिवसभर प्रतीक्षा करून ही निराश परत जात असल्याचे चित्र आहे. वाहतूक खर्च, वेळ आणि श्रम वाया जात असल्याने शेतकऱ्यांमध्ये तीव्र नाराजी व्यक्त होत आहे.

शेतकरी संघटनांनी तातडीने बारदाना उपलब्ध करून खरेदी प्रक्रिया सुरळीत सुरू करण्याची मागणी प्रशासनाकडे केली आहे. अन्यथा, शेतकऱ्यांचे मोठे आर्थिक नुकसान होण्याची भीती व्यक्त करण्यात येत आहे.

याबाबत प्रशासनाकडून लवकरात लवकर तोडगा काढण्यात येईल, असे सांगितले जात असले तरी प्रत्यक्षात मात्र परिस्थितीत सुधारणा झालेली दिसत नाही.

(संपादकीय टिप) शेतकऱ्यांच्या हितासाठी सुरू करण्यात आलेली हमी भाव खरेदी योजना अशा प्रकारे अडथळ्यांमध्ये अडकणे चिंताजनक असून, संबंधित यंत्रणांनी याकडे तातडीने लक्ष देणे गरजेचे आहे.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)