🛑 राजभवनात भव्य शिवस्मारक उभारण्याची मागणी —- संभाजी ब्रिगेड

🔴 राजभवनात भव्य शिवस्मारक उभारण्याची मागणी तीव्र; संभाजी ब्रिगेडचा सरकारवर जोरदार हल्लाबोल. 

♦️छत्रपती शिवाजी महाराज यांनी सर्वधर्म समभावाचा विचार देत स्वराज्याची स्थापना केली. राज्यकारभारात रयतेच्या सहभागाव्दारे लोकशाहीचा पाया रचला. 

शिवगर्जना न्यूज, 

देगलूर : प्रतिनिधी

छत्रपती शिवाजी महाराजांच्या स्मारकाच्या मुद्द्यावर राज्यातील राजकारण पुन्हा एकदा तापू लागले असून, अनेक वर्षांपासून प्रलंबित असलेल्या या प्रश्नावर आता संतप्त प्रतिक्रिया उमटू लागल्या आहेत. अरबी समुद्रात भव्य शिवस्मारक उभारण्याचे आश्वासन देऊन तब्बल तेरा वर्षे उलटून गेली, मात्र अद्याप ही प्रत्यक्षात कोणतीही ठोस उभारणी न झाल्याने जनतेत तीव्र नाराजी पसरली आहे.

संभाजी ब्रिगेडच्या वतीने या विषयावर आक्रमक भूमिका घेत, “जनतेच्या अस्मितेशी निगडित असलेला हा अत्यंत संवेदनशील मुद्दा सरकारने जाणीव पूर्वक दुर्लक्षित केला आहे,” असा आरोप करत राज्य सरकारवर कडक शब्दांत टीका करण्यात आली. शिवस्मारकाच्या नावा खाली कोट्यवधी रुपयांचा खर्च करून ही केवळ पूजन आणि घोषणा यापलीकडे काहीही घडले नाही, ही बाब अत्यंत खेदजनक असल्याचेही नमूद करण्यात आले.

अरबी समुद्रातील प्रस्तावित स्मारकाचा प्रश्न रखडलेला असताना, आता पर्यायी व तातडीने अमलात आणता येईल अशा ठिकाणी स्मारक उभारण्याची मागणी पुढे आली आहे. “राजभवन परिसर हा ऐतिहासिक, सुरक्षित व सुलभ ठिकाण असल्याने तेथे भव्य व प्रेरणादायी शिवस्मारक उभारण्यात यावे,” अशी ठाम मागणी संभाजी ब्रिगेडने पुन्हा एकदा सक्षमपणे लावून धरली आहे. गेल्या दहा-बारा वर्षांपासून सातत्याने पाठ पुरावा करून ही सरकार कडून कोणतीही ठोस दखल घेतली गेली नसल्याचा आरोप ही करण्यात आला.

या पार्श्वभूमीवर देगलूर येथील उपजिल्हाधिकारी कार्यालया मार्फत राज्याचे मुख्यमंत्री यांना निवेदन सादर करण्यात आले. “सरकारने आता तरी विलंब न करता स्पष्ट भूमिका घ्यावी आणि जनतेच्या भावनांचा आदर राखत तात्काळ निर्णय जाहीर करावा, अन्यथा राज्यभर तीव्र आंदोलन छेडले जाईल,” असा इशाराही यावेळी देण्यात आला.

यावेळी संभाजी ब्रिगेड जिल्हाध्यक्ष जेजेराव शिंदे करडखेडवाडीकर यांच्या नेतृत्वाखाली देगलूर तालुक्यातील पदाधिकारी व कार्यकर्त्यांनी मोठ्या संख्येने उपस्थित राहून प्रशासनास निवेदन दिले. यावेळी दत्ता पाटील करूरे, बालाजी पाटील आंदेगाववाडीकर, बालाजी पाटील हिंगोले, देविदास पाटील थडके, शहाजी पाटील बाबरे, व्यंकट नरवाडेसर, तानाजी सुकणाळे, सतीश पाटील झरीकर, हनुमंत कोसंबे, हनुमंत इंगोले, व्यंकट पाटील थडके, सुरेश महाराज येलबुगडे यांच्यासह अनेक कार्यकर्ते उपस्थित होते. तसेच पत्रकार बांधव यांनीही या घडामोडींना साक्षी राहून बातमीचा आढावा घेतला.

छत्रपती शिवाजी महाराजांच्या स्मारकाचा प्रश्न आता केवळ आश्वासनांपुरता मर्यादित न राहता, जनतेच्या स्वाभिमानाचा आणि अस्मितेचा ज्वलंत मुद्दा बनला असून, यावर सरकारने तातडीने निर्णय घेतला नाही तर राज्यभर आंदोलनाची ठिणगी पडण्याची चिन्हे स्पष्ट पणे दिसत आहेत.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)