🛑 खानापूर महसूल मंडळात समाधान शिबिराला उत्स्फूर्त प्रतिसाद.

🛑 खानापूर महसूल मंडळात समाधान शिबिराला उत्स्फूर्त प्रतिसाद. 

शिवगर्जना न्यूज, 

देगलूर प्रतिनिधी:

खानापूर ता. देगलूर, जि. नांदेड येथे अभियानांतर्गत दीड हजारांहून अधिक नागरिक उपस्थित; विविध दाखले व योजनेचा लाभ. 

देगलूर : महाराष्ट्र शासनाच्या महसूल व वन विभागाच्या छत्रपती शिवाजी महाराज महाराजस्व समाधान शिबिर अभियानांतर्गत तहसील कार्यालय देगलूर यांच्या वतीने खानापूर महसूल मंडळातील खानापूर गावातील भोसले नगर येथील जिल्हा परिषद हायस्कूल प्रांगणात समाधान शिबिराचे आयोजन करण्यात आले होते. हा कार्यक्रम भव्य-दिव्य स्वरूपात पार पडला.

या शिबिरास खानापूर महसूल मंडळातील १६ गावांमधील सुमारे दीड हजारांहून अधिक नागरिकांनी उपस्थित राहून विविध योजनांचा लाभ घेतला.

या शिबिरात महसूल, पुरवठा, आरोग्य, कृषी, महिला व बालविकास, पंचायत राज, दिव्यांग कल्याण तसेच इतर विविध शासकीय विभागांनी आपले स्टॉल लावून नागरिकांना सेवा उपलब्ध करून दिल्या.

यावेळी ७/१२ उतारे, ८अ, फेरफार, जात प्रमाणपत्र, उत्पन्न प्रमाणपत्र, रहिवासी प्रमाणपत्र यांसह विविध शासकीय दाखले नागरिकांना देण्यात आले. तसेच पुरवठा विभागामार्फत नवीन रेशन कार्ड, वृद्धापकाळ योजना, दिव्यांग प्रमाणपत्र तसेच इतर योजनांबाबत मार्गदर्शन करण्यात आले.

शिबिरामध्ये नागरिकांच्या विविध तक्रारी व निवेदनांची नोंद घेऊन त्यावर कार्यवाही करण्याचे आश्वासन अधिकाऱ्यांनी दिले. सिंगल विंडो प्रणालीद्वारे अनेक प्रलंबित कामे मार्गी लावण्यात आली.

यावेळी महिला बचत गटांनी सहभाग घेत आपले हस्त निर्मित व सेंद्रिय उत्पादनांचे स्टॉल लावले होते. महिला बचत गटांनी तयार केलेले घरगुती मसाले, हाताने बनवलेले पदार्थ व सेंद्रिय उत्पादने यांचे प्रदर्शन व विक्री करण्यात आली. उपस्थित अधिकाऱ्यांनी महिला बचत गटांना प्रोत्साहन देत त्यांच्या उत्पादनांची खरेदी करून त्यांना उत्तम दाद दिली.

या शिबिराचे आयोजन जिल्हाधिकारी राहुल कर्डिले यांच्या प्रेरणेने व उपविभागीय अधिकारी अनुप पाटील यांच्या मार्गदर्शनाखाली करण्यात आले. कार्यक्रमाचे नियोजन देगलूर तहसीलदार भरत सुर्यवंशी यांच्या मार्गदर्शनाखाली करण्यात आले.

कार्यक्रमास नायब तहसीलदार गिरीष सर्कलवाड, गणेश रायेवार, तालुका आरोग्य अधिकारी रमेश गवाले, सहाय्यक गटविकास अधिकारी, तालुका कृषी अधिकारी सोनकांबळे, खानापूरचे मंडळ अधिकारी शिवप्रसाद बालीपोगुल, खानापुरचे ग्राम महसूल अधिकारी प्रकाश तोटेवाड, तडखेलचे ग्राम महसूल अधिकारी रवी कापसे, तसेच तालुक्यातील सर्व ग्राम महसूल अधिकारी व विविध विभागांचे अधिकारी उपस्थित होते.

खानापूर महसूल मंडळातील नागरिकांची अनेक प्रलंबित कामे मार्गी लागल्याने नागरिकांनी समाधान व्यक्त केले. त्यामुळे हा कार्यक्रम अत्यंत यशस्वी ठरल्याचे प्रशासनाने सांगितले.

शिवगर्जना न्यूज संपादक : श्री शहाजी वरखिंडे बातम्या व जाहिरातीसाठी संपर्क 🗣📲📞(9923072242)