🛑 मोटर सायकल चालवतांना अंगावर विज पडून मृत्यू

🔴 मोटर सायकल चालवत असताना अंगावर विज पडून मृत्यू.

शिवगर्जना न्यूज, 

श्री क्षेत्र माहूर प्रतिनिधी : अनील बंगाळे

माहूर : तालुक्या मध्ये करंजी येथील रहिवासी हिवरा येथे मुख्याध्यापक असलेले संजय कृष्णकुमार पांडे यांच्या अंगावर गुरूवारी दुपारी साडेतीन वाजेच्या सुमारास मोटार सायकल वरती प्रवास करीत असताना अंगावर वीज पडली यातच त्यांचा दुर्देवी मृत्यू झाला आहे.

संजय पांडे हे नेहमी प्रमाणे माहूर येथे येऊन दैनंदिन घरगुती साहित्य खरेदी करून आपल्या गावी करंजीकडे दुचाकी वरून परत जात होते. मात्र माहूर-मालवाडा घाटा जवळ असलेल्या चौफुली परिसरात अचानक आकाशात काळे ढग दाटून आले आणि प्रचंड विजेच्या कडकडाटासह मुसळधार पावसाला सुरुवात झाली.

यावेळी किनवट राज्य महामार्ग चौफुली जवळ त्यांच्या अंगावरच अचानक जोरदार वीज कोसळली. विजेचा झटका एवढा तीव्र होता की, त्यांच्या हातात असलेली प्लास्टिकची पिशवी, मोबाईल फोन, आणि संपूर्ण शरीर एका झटक्यात जळून खाक झाले. प्रत्यक्ष भेट देऊन प्रथम दर्शनी निरीक्षण केले असता मोबाईल पूर्ण पणे वितळून राख झाला होता, आणि तेच मृत्यूचे मुख्य कारण असावे असा प्रथमदर्शनी अंदाज व्यक्त करण्यात येत आहे.

या दुर्घटनेमुळे परिसरात हळहळ व्यक्त करण्यात येत आहे. शिक्षक संजय पांडे हे अत्यंत मनमिळावू, कर्तव्यनिष्ठ, आणि विद्यार्थ्यांमध्ये लोकप्रिय होते. त्यांच्या आकस्मिक निधनामुळे शैक्षणिक क्षेत्रात मोठी पोकळी निर्माण झाली आहे. स्थानिक ग्रामस्थ व प्रशासनाने तातडीने घटनास्थळी धाव घेतली. मृतदेह शवविच्छेदनासाठी रवाना करण्यात आला असून, माहूर पोलीस स्टेशनचे ठाणेदार शिवप्रकाश मुळे हे तात्काळ घटनास्थळी हजर झाले. या प्रकरणी नैसर्गिक आपत्तीमुळे मृत्यू झाल्यामुळे संबंधित कुटुंबियांना सरकारी आपत्ती निवारण निधीतून मदत मिळावी, अशी मागणी देखील स्थानिकांनी केली आहे. या घटनेमुळे माहूर आणि करंजी गावांत शोककळा पसरली आहे. 

शिवगर्जना न्यूज संपादक : श्री शहाजी वरखिंडे

बातम्या व जाहिरातीसाठी संपर्क 🗣📲📞(9923072242)