🛑 कीर्ती गोल्ड कंपनीचा धावता टँकर जळून खाक

🔴 कीर्ती गोल्ड कंपनीचा धावता टँकर जळून खाक. 

♦️गडगा ते नरसी रस्त्यावरील घटना; जीवितहानी टळली, वाहतूक दीड तास ठप्प. 

शिवगर्जना न्यूज, 

नांदेड/ प्रतिनिधी निळकंठ जाधव 

कीर्ती गोल्ड कंपनीचे तेलाचे टैंकर (एम.एच.२४ ए. यु. ६९००) हे लातूरवरून कृष्णूर एमआयडीसीकडे निघाले होते. वाटेत खडगाव बेंद्रीजवळ मंगळवारी (दि. १ एप्रिल) दुपारी ३ वाजून ४५ मिनिटाला हायवेवर धावत्या टैंकरला शॉर्टसर्किट होऊन वायरिंगने पेट घेतला. त्यानंतर लागलेल्या आगीत टँकर जळून खाक झाला. तेलाचे टँकर रिकामे असल्यामुळे सुदैवाने जीवितहानी टळली. यामुळे तब्बल दीड तास दोन्ही बाजूने वाहतूक विस्कळीत झाली होती.

याबाबत सविस्तर माहिती अशी की, कीर्ती गोल्ड कंपनीचे टँकर लातूर वरून कृष्णुरकडे निघाले होते. दुपारी ३ वाजून ४५ मिनिटाला गडगा ते नरसी महामार्गावरील खडगाव येथील जिजाऊ इन्स्टिट्यूट ऑफ इंजिनिअरिंग कॉलेजजवळ टँकरच्या पाठीमागे वायरिंगने पेट घेतल्याने जाळ लागल्याचे चालक जयराज गोसावी यांच्या निदर्शनास येताच त्यांनी वाहन थांबवून आग विझविण्यासाठी प्रयत्न केल्याचे सांगितले. मात्र तप्त ऊन व पाण्याअभावी धावत्या टँकरने पाहता पाहता पेट घेत आगीने रौद्र रुप धारण केले. घटनास्थळी लोकांनी नायगाव व मुखेड येथील अग्निशमन दलाच्या गाडीला संपर्क साधला असता नायगावची अग्निशमन वाहन खराब झाली तर मुखेड येथील अग्निशमन दलाची गाडी उशीरा पोहोचली. तो पर्यंत कीर्ती गोल्ड कंपनीचा टँकर जागेवर जळून खाक झाला.

दरम्यान, दोन्ही बाजूने वाहनांच्या लांबच रांगा लागल्या होत्या. तब्बल दीड तासानंतर आग आटोक्यात आणण्यात यश आले. घटनेची माहिती मिळताच नायगाव पोलिस ठाण्याचे सहायक पोलिस निरीक्षक सुभाष वाकुर्डे, उपनिरीक्षक पेदे यांच्यासह त्यांच्या सहकाऱ्यांनी घटनास्थळी धाव घेतली. गडगा ते नरसी या दोन्ही बाजूची वाहतूक तब्बल दीड तास ठप्प झाली होती.

शिवगर्जना न्यूज संपादक : श्री शहाजी वरखिंडे

बातम्या व जाहिरातीसाठी संपर्क 🗣📲📞(9923072242)