🛑 शेतकऱ्यांच्या प्रगतीसाठी नांदेड जिल्ह्यात ICAR ची शाखा स्थापन करणे आवश्यक

🔴 शेतकऱ्यांच्या प्रगतीसाठी नांदेड जिल्ह्यात ICAR ची शाखा स्थापन करणे आवश्यक -खा. डॉ.अजित गोपछडे यांची राज्यसभेत मागणी. 

शिवगर्जना न्यूज, 

नांदेड प्रतिनिधी निळकंठ जाधव 

महाराष्ट्र राज्यातील नांदेड जिल्ह्यात भारतीय कृषी संशोधन परिषद (ICAR)ची शाखा स्थापन करून दुष्काळग्रस्त मराठवाड्यातील कोरडवाहु शेती तंत्र विकसित करण्याची मागणी राज्यसभा खासदार डॉ.अजित गोपछडे यांनी आज सभागृहात जोरदारपणे मांडली.

मराठवाडा हा महाराष्ट्रातील दुष्काळप्रवण भाग असून अनेक गंभीर कृषी समस्यांना गेली कित्येक वर्षे तोंड देत आहे. पाण्याची कमतरता, अनियमित पाऊस आणि हवामान बदल यांसारख्या नैसर्गिक समस्या येथे आहेत. या समस्यांमुळे पीक उत्पादनावर परिणाम होतो आणि शेतकऱ्यांना मोठ्या अडचणींचा सामना करावा लागतो. गावांमध्ये वारंवार दुष्काळी परिस्थिती निर्माण होते, ज्याचा त्यांच्या आर्थिक परिस्थितीवर विपरीत परिणाम होतो. पीक उत्पादनांत विविधतेचा अभाव असल्यामुळे शेतकऱ्यांचे उत्पन्नही अस्थिर राहते. त्यामुळे दुष्काळाची स्थिती केवळ कृषी उत्पादनावरच परिणाम करत नाही, तर शेतकऱ्यांच्या जीवनमानालाही मोठे आव्हान देते.

मराठवाड्यातील दुष्काळग्रस्त कृषी क्षेत्र बळकट करण्यासाठी, भारतीय कृषी संशोधन परिषद (ICAR) ने दुष्काळ-प्रतिरोधक पिके, प्रभावी पावसाच्या पाण्याचे व्यवस्थापन आणि हवामान-प्रतिरोधक कोरडवाहु शेती तंत्रज्ञानावर संशोधनाला प्राधान्य द्यावे.

या पार्श्वभूमीवर खा.डॉ.अजित गोपछडे यांनी आज राज्यसभेत भारत सरकारला विनंती केली की, ICAR च्या कोरडवाहु कृषि संस्थेची एक शाखा नांदेड येथे स्थापन करावी. यामुळे ICAR चे वैज्ञानिक अधिकारी स्थानिक कृषी अधिकाऱ्यांशी समन्वय साधून, मराठवाड्यातील प्रत्येक गावात शेतकऱ्यांसोबत संवाद साधून, दुष्काळ-प्रतिरोधक तथा कोरडवाहु कृषि तंत्रज्ञान संयुक्तिक विविध पिकांची माहिती देऊ शकतील, यामुळे दुष्काळ प्रवण भागाचा आर्थिक विकास शक्य होईल.

आर्थिक संकटामुळे, मराठवाड्यातील अनेक शेतकऱ्यांनी आत्महत्या करण्याचा अत्यंत दुर्दैवी निर्णय घेतला आहे. म्हणूनच, भारत सरकारला माझी विनंती आहे की, ICAR च्या ड्राय लँड रिसर्च इन्स्टिट्यूटची शाखा नांदेड येथे स्थापन करून, स्थानिक शेतकऱ्यांना आवश्यक मदत व मार्गदर्शन दिले जावे. असे प्रतिपादन खा.डॉ.अजित गोपछडे यांनी आज राज्यसभेत केले.

शिवगर्जना न्यूज संपादक : श्री शहाजी वरखिंडेबातम्या व जाहिरातीसाठी संपर्क 🗣📲📞(9923072242)