🔴 वाढदिवसाचा अनावश्यक खर्च टाळून कॅन्सरग्रस्त रुग्णाला २१ हजारांची मदत.

🔴 वाढदिवसाचा अनावश्यक खर्च टाळून कॅन्सरग्रस्त रुग्णाला २१ हजारांची मदत. 

सौ. पुनमताई पवार यांच्या आवाहनाला धनंजय जाधव यांचा प्रतिसाद; सामाजिक बांधिलकीचे दर्शन.

शिवगर्जना न्यूज,

नायगाव : बाळासाहेब पांडे

नायगाव तालुक्यात वाढदिवसाचा अनावश्यक खर्च टाळून कॅन्सरग्रस्त रुग्णाच्या उपचारासाठी २१ हजार रुपयांची आर्थिक मदत देत धनंजय पाटील जाधव यांनी माणुसकीचे दर्शन घडविले. जिल्हा मध्यवर्ती सहकारी बँकेच्या संचालिका तथा भाजपा नांदेड जिल्हा सरचिटणीस सौ. पुनमताई राजेश पवार यांच्या वाढदिवसानिमित्त त्यांनी मांजरम येथील कॅन्सरग्रस्त रुग्ण शेख हुसेन शेख रजाकसाब यांना मदतीचा हात दिला.

सध्या नायगाव तालुक्यासह ग्रामीण भागात दुष्काळसदृश परिस्थितीमुळे शेतकरी आणि शेतमजूर आर्थिक संकटाचा सामना करीत आहेत. अशा परिस्थितीत कॅन्सरसारख्या गंभीर आजारावरील उपचारांचा खर्च पेलणे अनेक कुटुंबांसाठी कठीण ठरत आहे. त्यामुळे गरजू रुग्णांना आर्थिक मदत मिळणे अत्यंत महत्त्वाचे आहे.

सौ. पुनमताई पवार यांनी आपल्या वाढदिवसानिमित्त कार्यकर्त्यांना अनावश्यक खर्च टाळून आर्थिक अडचणीत असलेल्या गरजू व्यक्तींना मदत करण्याचे आवाहन केले होते. या आवाहनाला प्रतिसाद देत धनंजय पाटील जाधव यांनी रुग्णाच्या उपचारासाठी २१ हजार रुपयांची मदत दिली.

जात-धर्माच्या पलीकडे जपली माणुसकी

वाढदिवसानिमित्त होणाऱ्या खर्चाला फाटा देत गरजू रुग्णाच्या उपचारासाठी मदत करण्याचा हा उपक्रम सामाजिक बांधिलकीचे उत्तम उदाहरण ठरत आहे. संकटाच्या काळात गरजू व्यक्तीला आधार देणे, हीच खऱ्या अर्थाने समाजसेवा असल्याचा संदेश या मदतीतून देण्यात आला आहे.

धनंजय पाटील जाधव यांच्या या संवेदनशील उपक्रमाचे परिसरातून कौतुक होत असून, इतरांनीही वाढदिवसासारख्या प्रसंगी अनावश्यक खर्च टाळून गरजूंच्या मदतीसाठी पुढाकार घ्यावा, अशी अपेक्षा व्यक्त होत आहे.

🔴मुख्य संपादक: श्री शहाजी वरखिंडे                   मो. 9923072242