🔴 देगलूर पालिकेचा ढिम्म कारभार मोकाट श्वानांचा हैदोस; ७५ वर्षीय वृद्धेवर जीवघेणा हल्ला.

🔴 देगलूर पालिकेचा ढिम्म कारभार मोकाट श्वानांचा हैदोस; ७५ वर्षीय वृद्धेवर जीवघेणा हल्ला. 

वृद्ध महिलेच्या पायाचा लचका तोडला; नागरिकांचा संताप अनावर, पालिका प्रशासनाला टाळे ठोकण्याचा इशारा!

शिवगर्जना न्यूज : देगलूर प्रतिनिधी

देगलूर : शहरातील मोकाट श्वानांचा प्रश्न दिवसेंदिवस गंभीर होत असून, नगरपालिका प्रशासनाच्या निष्क्रिय कारभारामुळे नागरिकांच्या जीविताचा प्रश्न ऐरणीवर आला आहे. देगलूर शहरातील लाईन गल्ली–जोशी गल्ली परिसरात १५ ऑक्टोबर रोजी मोकाट श्वानांच्या टोळीने ७५ वर्षीय श्रीमती शोभा वीरकुमार सरसंबे यांच्यावर भीषण हल्ला केला. या हल्ल्यात त्यांच्या पायाचा लचका तोडण्यात आल्याची धक्कादायक घटना घडली. या प्रकारामुळे परिसरातील नागरिकांमध्ये भीतीचे वातावरण निर्माण झाले असून, पालिका प्रशासनाविरोधात तीव्र संताप व्यक्त केला जात आहे.

🔴 लेखी तक्रारींचेही पालिकेला गांभीर्य नाही? 

शहरातील मोकाट श्वानांचा बंदोबस्त करावा, त्यांचे निर्बीजीकरण करून नागरिकांना सुरक्षितता द्यावी, अशी मागणी नागरिकांकडून वारंवार करण्यात येत आहे. यासंदर्भात लेखी तक्रारी देऊनही आणि आठ दिवसांचा अल्टिमेटम देऊनही श्वान निर्बीजीकरणाच्या निविदा प्रक्रियेला गती मिळत नसल्याचा आरोप नागरिकांनी केला आहे. प्रशासनाच्या या कथित दिरंगाईमुळे अखेर ज्येष्ठ नागरिकांवर हल्ले होण्याची वेळ आली आहे.

🔴 एखाद्याचा बळी गेल्यावरच प्रशासन जागे होणार का?

रस्त्यावरून चालणारे ज्येष्ठ नागरिक, महिला, लहान मुले आणि शाळकरी विद्यार्थ्यांना मोकाट श्वानांच्या टोळ्यांमुळे जीव मुठीत धरून वावरावे लागत आहे. एखाद्या नागरिकाचा जीव गेल्यानंतरच नगरपालिका प्रशासनाला जाग येणार का? असा संतप्त सवाल नागरिक उपस्थित करत आहेत. केवळ आश्वासने आणि कागदी घोडे नाचवून हा प्रश्न सुटणार नसून, तातडीने ठोस उपाययोजना करण्याची गरज आहे.

🔴 पालिका, तहसील कार्यालयाला टाळे ठोकण्याचा इशारा. 

मोकाट श्वानांचा तातडीने बंदोबस्त करून निर्बीजीकरणाची प्रक्रिया सुरू करावी, अशी मागणी त्रस्त नागरिकांनी केली आहे. प्रशासनाने या गंभीर प्रश्नाकडे तातडीने लक्ष न दिल्यास नगरपालिका कार्यालय, उपविभागीय अधिकारी कार्यालय आणि तहसील कार्यालयाला टाळे ठोकून उग्र ठिय्या आंदोलन छेडण्यात येईल, असा कडक इशारा नागरिकांनी दिला आहे.

🔴 आता तरी प्रशासन जागे होणार का?

७५ वर्षीय वृद्ध महिलेवरील हल्ल्याने देगलूर शहरातील नागरिकांच्या सुरक्षिततेचा प्रश्न पुन्हा ऐरणीवर आला आहे. मोकाट श्वानांचा बंदोबस्त करणे ही केवळ आश्वासनांची बाब नसून, नागरिकांच्या जीविताशी संबंधित गंभीर जबाबदारी आहे. त्यामुळे नगरपालिका प्रशासनाने आणखी एखाद्या दुर्घटनेची वाट न पाहता तातडीने कार्यवाही करावी, अशी जोरदार मागणी होत आहे.

प्रशासनाच्या निष्क्रियतेमुळे नागरिकांचा संयम सुटत चालला असून, आता देगलूरकरांना केवळ आश्वासने नकोत, तर प्रत्यक्ष कृती हवी आहे.

🔴मुख्य संपादक: श्री शहाजी वरखिंड                   मो. 9923072242