🔴 नांदेड-बिदर रेल्वेमार्गासाठी मुख्यमंत्र्यांचा पुढाकार; केंद्राला तातडीच्या कार्यवाहीचे पत्र

🛑 नांदेड-बिदर रेल्वेमार्गाला गती मिळणार; मुख्यमंत्र्यांचे केंद्राला पत्र

खासदार डॉ. अजित गोपछडे यांच्या सातत्यपूर्ण पाठपुराव्याला बळ, महाराष्ट्रातील काम तातडीने सुरू करण्याची मागणी.

मुंबई प्रतिनिधी : शिवगर्जना न्यूज

नांदेड आणि बिदर या दोन महत्त्वाच्या धार्मिक व व्यावसायिक शहरांना जोडणाऱ्या बहुप्रतीक्षित नांदेड-बिदर नवीन रेल्वेमार्गाच्या कामाला गती देण्यासाठी महाराष्ट्र सरकारने पुढाकार घेतला आहे. मुख्यमंत्री देवेंद्र फडणवीस यांनी केंद्रीय रेल्वेमंत्री अश्विनी वैष्णव यांना पत्र लिहून महाराष्ट्राच्या हद्दीतील रेल्वेमार्गाचे काम तातडीने सुरू करण्याची मागणी केली आहे.

या महत्त्वाकांक्षी रेल्वे प्रकल्पातील सुमारे ८० टक्के मार्ग महाराष्ट्राच्या हद्दीतून जाणार असल्याने कर्नाटक सरकारशी संबंधित औपचारिक प्रक्रिया पूर्ण होण्याची प्रतीक्षा न करता महाराष्ट्रातील कामाला सुरुवात करता येईल, अशी भूमिका मुख्यमंत्र्यांनी पत्रातून मांडली आहे.

या प्रकल्पाचा अंदाजित खर्च २ हजार ३५४ कोटी रुपये असून, प्रचलित धोरणानुसार महाराष्ट्र सरकार ५० टक्के आर्थिक सहभाग देण्यास तसेच आवश्यक जमीन उपलब्ध करून देण्यास तयार असल्याचेही पत्रात नमूद करण्यात आले आहे.

खासदार डॉ. अजित गोपछडे यांच्या पाठपुराव्याला मुख्यमंत्र्यांचे बळ

नांदेड येथील हजूर साहेब आणि बिदर येथील गुरुद्वारा नानक झिरा साहेब या दोन महत्त्वाच्या धार्मिक स्थळांना जोडणारा हा रेल्वेमार्ग भाविकांसाठी महत्त्वाचा ठरणार आहे. यासोबतच शेतकरी, व्यापारी, विद्यार्थी आणि सर्वसामान्य प्रवाशांच्या दळणवळणालाही या मार्गामुळे मोठी मदत होणार आहे.

या प्रकल्पासाठी राज्यसभेचे खासदार डॉ. अजित गोपछडे यांनी संसदेत शून्य तासात प्रश्न उपस्थित करण्यासह केंद्र व राज्य सरकारकडे सातत्याने पाठपुरावा केला. तसेच पत्रव्यवहार आणि मुख्यमंत्री व केंद्रीय रेल्वेमंत्र्यांच्या भेटी घेऊन प्रकल्पाच्या कामाला गती देण्याची मागणी त्यांनी केली होती.

या सातत्यपूर्ण पाठपुराव्याची दखल घेत मुख्यमंत्री देवेंद्र फडणवीस यांनी केंद्रीय रेल्वेमंत्र्यांना पत्र लिहिल्याने नांदेड-बिदर रेल्वेमार्गाच्या पुढील प्रक्रियेला महत्त्वाचे बळ मिळाले आहे.

कर्नाटकच्या मंजुरीची प्रतीक्षा न करता महाराष्ट्रातील काम सुरू करण्याची मागणी

प्रकल्पाचा मोठा हिस्सा महाराष्ट्रात येत असल्याने कर्नाटकशी संबंधित आवश्यक प्रक्रिया सुरू असतानाच महाराष्ट्राच्या हद्दीतील कामाला सुरुवात करावी, अशी मागणी मुख्यमंत्र्यांनी केंद्राकडे केली आहे.

यामुळे प्रकल्पाच्या अंमलबजावणीतील संभाव्य विलंब कमी होऊन महाराष्ट्रातील भागाचे काम वेगाने पुढे नेता येईल, अशी अपेक्षा व्यक्त केली जात आहे.

धार्मिक पर्यटनासह व्यापाराला मिळणार चालना

नांदेड-बिदर रेल्वेमार्ग पूर्ण झाल्यास मराठवाडा आणि उत्तर कर्नाटकातील रेल्वे संपर्क अधिक मजबूत होणार आहे. यामुळे धार्मिक पर्यटन, व्यापार, शिक्षण तसेच प्रवासी वाहतुकीला चालना मिळण्याची अपेक्षा आहे.

बहुप्रतीक्षित या प्रकल्पाच्या कामाला प्रत्यक्ष सुरुवात कधी होते, याकडे नांदेडसह संपूर्ण मराठवाड्यातील नागरिकांचे लक्ष लागले आहे.

🔴मुख्य संपादक: श्री शहाजी वरखिंडे                  मो. 9923072242